ໃນວັນທີ 15 ສິງຫານີ້ ຢູ່ຫ້ອງວ່າການລັດຖະບານ ໄດ້ມີກອງປະຊຸມປຶກສາຫາລື ກ່ຽວກັບການກະກຽມຄວາມພ້ອມຂອງ
ສປປ ລາວ ໃນການເປັນເຈົ້າພາບກອງປະຊຸມ ແລະ ເປັນປະທານອາຊຽນໃນປີ 2016 ນີ້ ໂດຍການເປັນປະທານຂອງທ່ານ
ທອງສິງ ທຳມະວົງ ນາຍົກລັດຖະມົນຕີ, ມີບັນດາຮອງນາຍົກລັດຖະມົນຕີ ແລະ ລັດຖະມົນຕີກະຊວງຕ່າງໆເຂົ້າຮ່ວມຢ່າງ
ພ້ອມພຽງ.
ກອງປະຊຸມໄດ້ປຶກສາຫາລືແບ່ງຄວາມຮັບຜິດຊອບ ແລະ ຊີ້ນຳໃຫ້ບັນດາກະຊວງ, ຂະແໜງການກ່ຽວຂ້ອງກະກຽມໃຫ້
ແກ່ການເປັນເຈົ້າພາບຈັດກອງປະຊຸມສຸດຍອດອາຊຽນ 2016. ພ້ອມທັງກຳນົດພາລະບົດບາດ,ໜ້າທີ່ຮັບຜິດຊອບລະ
ອຽດ ແລະ ສ້າງແຜນການດຳເນີນງານຢ່າງເປັນລະບົບ ຕາມຄວາມເໝາະສົມຂອງແຕ່ລະກະຊວງ ແລະ ຂະແໜງການ
ເພື່ອນຳໄປຈັດຕັ້ງຜັນຂະຫຍາຍ ຕາມຂັ້ນຕອນຂອງຮ່າງແຜນດຳເນີນການກະກຽມຮັບໃຊ້ ກອງປະຊຸມອາຊຽນທີ່ລາວ
ຈະໄດ້ຮັບກຽດເປັນປະທານຄັ້ງທີ II ໃນປີ 2016 ທີ່ຈະມາເຖິງນີ້ ໃຫ້ໄດ້ຮັບຜົນສຳເລັດ.
ພ້ອມນີ້, ກອງປະຊຸມໄດ້ມອບໝາຍໃຫ້ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງ
ການຕ່າງປະເທດ ທັງເປັນຮອງປະທານຄະນະກຳມະການຊີ້ນຳລະດັບຊາດ, ເປັນຜູ້ປະຈຳການ ແລະ ເປັນຜູ້ອະນຸມັດການ
ແຕ່ງຕັ້ງອະນຸກຳມະການຕ່າງໆ ໃຫ້ນຳເອົາຜົນຂອງກອງປະຊຸມໃນຄັ້ງນີ້ ໄປກະກຽມແຕ່ງຕັ້ງບັນດາອະນຸກຳມະການຕ່າງໆ
ຕາມໜ້າວຽກທີ່ໄດ້ຮັບການມອບໝາຍ.
ສປປ ລາວ, ໄດ້ຮັບກຽດເປັນປະທານອາຊຽນຄັ້ງທຳອິດໃນປີ 2004-2005 ໂດຍໄດ້ເປັນປະທານ ແລະ ເຈົ້າພາບຈັດກອງ
ປະຊຸມສຸດຍອດອາຊຽນຄັ້ງທີ X, ກອງປະຊຸມອາຊຽນກັບຄູ່ເຈລະຈາ ແລະ ກອງປະຊຸມຕ່າງໆນັບແຕ່ກອງປະຊຸມລະດັບວິ
ຊາການ,ກອງປະຊຸມເຈົ້າໜ້າທີ່ອາວຸໂສ ແລະ ກອງປະຊຸມລະດັບລັດຖະມົນຕີຂະແໜງການຕ່າງໆອີກດ້ວຍ.
ແຫຼ່ງຂ່າວ: http://laophatthananews.blogspot.com/2014/08/2016.html