ຈາກກໍລະນີທີ່ມີຂ່າວວ່າຜູ້ໂດຍສານ ແຈ້ງວ່າຕົນເອງບໍ່ໄດ້ຮັບຄວາມເປັນທຳ ຈາກການໃຊ້ບໍລິການລົດໂດຍສານ ຄື ໄດ້ນັ່ງຕັ່ງເສີມ ພ້ອມທັງຕ້ອງຈ່າຍເງິນຄ່າຂີ່ລົດແພງກວ່າປົກກະຕິ ທີ່ຖືກນຳສະເໜີອອກສູ່ສັງຄົມ ເມື່ອວັນທີ 18 ເມສາ 2017 ທີ່ຜ່ານມານັ້ນ ໄດ້ມີຜູ້ເຂົ້າມາອ່ານຂ່າວແລະປະກອບຄຳເຫັນຈຳນວນຫຼວງຫຼາຍ (ອ່ານຂ່າວນັ້ນຢູ່ນີ້: https://www.laopost.com/2017/04/18/88680) ພ້ອມທັງໄດ້ຮັບຂໍ້ມູນເພິ່ມເຕີມວ່າ ສະພາບການໃຫ້ບໍລິການຂອງລົດເມແມ່ນມີລັກສະນະກິນປຽບຜູ້ໃຊ້ບໍລິການຢູ່ທຸກສາຍທາງແລະເກືອບທຸກຄັນລົດ ເຊັ່ນ ການຮັບຜູ້ໂດຍສານເກີນບ່ອນນັ່ງ, ການເກັບເງິນແພງແລະບໍ່ມີມາຕະຖານ, ສະພາບລົດທັງບໍ່ສະອາດແລະບໍ່ຮັບປະກັນຄວາມປອດໄພ ແລະວ່າ ບັນຫາແບບນີ້ເກີດຂຶ້ນເປັນປະຈຳ ໂດຍສະເພາະແມ່ນໄລຍະບຸນປີໃໝ່ທີ່ມີປະຊາຊົນເດິນທາງກັບບ້ານ ແຕ່ບັນຫາບໍ່ໄດ້ຖືກແກ້ໄຂໃຫ້ດີຂຶ້ນເລີຍ.
ຜູ້ອ່ານທີ່ເຄີຍໃຊ້ບໍລິການລົດເມແລະເຄີຍພົບບັນຫາ ໄດ້ໃຫ້ຄຳເຫັນໃນລັກສະນະຮຽກຮ້ອງເຖິງພາກລັດ ໂດຍສະເພາະແມ່ນກະຊວງໂຍທາທິການແລະຂົນສົ່ງ ວ່າ: ມາຮອດປັດຈຸບັນນີ້ ປະເທດລາວຂອງເຮົາໄດ້ເອົາໂຕເອງເຊື່ອມຈອດກັບບັນດາປະເທດອ້ອມຂ້າງ ໂດຍສະເພາະແມ່ນ AEC ເຊິ່ງກ່ອນຈະລວມໂຕກັນນັ້ນ ປະເທດລາວກໍໄດ້ກຽມຄວາມພ້ອມທຸກຢ່າງ ເວົ້າສະເພາະເລື່ອງວຽກງານຂົນສົ່ງໂດຍສານ ກໍເຫັນວ່າມີໃບໜ້າໃໝ່ ມີລົດປັບອາກາດຫຼາຍກວ່າ 90% ແລ້ວ. ແຕ່ຂອດການໃຫ້ບໍລິການຂອງລົດໂດຍສານນັ້ນຍັງບໍ່ມີການພັດທະນາເທົ່າທີ່ຄວນ ຈຶ່ງຢາກສະເໜີໃຫ້ພາກສ່ວນລັດຖະບານ ປັບປຸງມາຕະຖານການໃຫ້ບໍລິການລົດໂດຍສານຕື່ມ ເຊັ່ນ:
1. ສະພາບເຕັກນິກລົດ ຄວນຫັນໃຫ້ເປັນມາຕະຖານທີ່ດີຮັບປະກັນຄວາມປອດໄພ ແລະອຳນວຍຄວາມສະດວກແກ່ຜູ້ເດິນທາງ ເຊັ່ນ ເຄື່ອງປັບອາກາດ ແລະ ສະພາບເຕັກນິກລົດອື່ນໆ ທີ່ເຫັນວ່າຈຳເປັນ.
2. ຮັບປະກັນຄວາມຍຸຕິທຳ ຄວນມີກົດລະບຽບໃນການເກັບຄ່າບໍລິການເປັນມາຕະຖານດຽວກັນ, ກຳນົດລາຄາລະອຽດຕາມໄລຍະທາງໃກ້ຫຼືໄກ, ມີການຕັກເຕືອນ ສຶກສາອົບຮົມ ໄປເຖິງຂັ້ນປະຕິບັດວິໄນຕໍ່ຜູ້ໃຫ້ບໍລິການໂດຍສານ ໃນກໍລະນີມີການຮ້ອງຮຽນ.
3. ຮັບປະກັນຄວາມສະອາດ ລົດຕ້ອງມີຄວາມສະອາດ ບໍ່ມີກິ່ນເໝັນ, ບໍ່ມີຄວາມເປິເປື້ອນແລະຮົກເຮື້ອ, ຈຸດພັກລົດຄວນໃຫ້ມີຫ້ອງນໍ້າໃຫ້ບໍລິການທີ່ສະອາດ ແລະລວມທັງສຶກສາອົບຮົມຜູ້ໂດຍສານໃຫ້ຮູ້ຈັກຮັກສາອະນາໄມໃນເວລາຢູ່ເທິງລົດ.
4. ເທິງລົດທຸກຄັນຄວນມີຂໍ້ມູນ ແນະນຳການປະຕິບັດໂຕຂອງຜູ້ໂດຍສານ ແລະມີຂໍ້ມູນຕິດຕໍ່ສຸກເສີນຫຼືຂໍ້ມູນຕິດຕໍ່ຫາພາກສ່ວນທີ່ກ່ຽວຂ້ອງໂດຍກົງ ໃນກໍລະນີມີອຸບັດເຫດຫຼືຜູ້ໂດຍສານຮູ້ສຶກວ່າບໍ່ໄດ້ຮັບຄວາມເປັນທຳ.
ແລະອື່ນໆ ທີ່ເຫັນວ່າສົມຄວນ…
ໂດຍທັງໝົດທີ່ກ່າວມານັ້ນ ຄວນຈະສ້າງເປັນກົດລະບຽບອອກມາບັງຄັບໃຊ້ ກັບທັງເຈົ້າຂອງລົດ, ເຈົ້າໜ້າທີ່ທີ່ກ່ຽວຂ້ອງ ແລະທັງຜູ້ໂດຍສານເອງ ຕ້ອງໄດ້ປະຕິບັດ ທັງນີ້ກໍເພື່ອເປັນການຍົກລະດັບການໃຫ້ບໍລິການລົດໂດຍສານຂຶ້ນໃຫ້ທຽບທັນກັບເພື່ອນບ້ານໃກ້ຄຽງ ຮັບປະກັນທັງຄວາມປອດໄພ ຮັບປະກັນຄວາມເພິ່ງພໍໃຈຂອງລູກຄ້າ.
