ຈາກກໍລະນີທີ່ມີສື່ສັງຄົມອອນລາຍຊື່ດັງຈຳນວນໜຶ່ງໄດ້ ໂພສຂໍ້ຄວາມໃນທຳນອງວ່າ ປີໃໝ່ນີ້ ຫ້າມເຈັບ ຫ້າມປ່ວຍ ຫ້າມຕາຍ ເນື່ອງຈາກທາງໂຮງໝໍພັກສະຫຼອງປີໃໝ່ລາວ. ພ້ອມທັງຮູບພາບທີ່ເປັນຂໍ້ຄວາມແຈ້ງການຂອງໂຮງໝໍ ມິດຕະພາບ 150 ຕຽງ ລະບຸວ່າ ວັນທີ 12 ເມສາ 2017 ບໍ່ຮັບຄົນເຈັບ (ມີສະຫຼຸບປີໃໝ່), ວັນທີ 13-17 ເມສາ 2017 ແມ່ນພັກບຸນປີໃໝ່ລາວ. ຈາກກໍລະນີດັ່ງກ່າວນັ້ນໄດ້ເຮັດໃຫ້ສັງຄົມເຂົ້າສະແດງຄວາມຄິດເຫັນໄປຕ່າງໆ ນານາ ເຊິ່ງສ່ວນຫຼາຍມີການຕໍ່ວ່າໄປຍັງໂຮງໝໍ 150 ຕຽງ.

ຕອນເຊົ້າມື້ນີ້, ວັນທີ 12 ເມສາ 2017 ນັກຂ່າວລາວໂພສໄດ້ສອບຖາມໄປຍັງ ຫ້ອງການບໍລິຫານໂຮງໝໍ 150 ຕຽງ ເຖິງກໍລະນີດັ່ງກ່າວ ຈຶ່ງໄດ້ຮັບຄຳຕອບຢ່າງຊັດເຈນວ່າ: ໃນໄລຍະບຸນປີໃໝ່ລາວນີ້ ທາງໂຮງໝໍ 150 ຕຽງບໍ່ໄດ້ປິດໃຫ້ບໍລິການ ແຕ່ຍັງໄດ້ກະກຽມຄວາມພ້ອມເພິ່ມຂຶ້ນກວ່າປົກກະຕິ ໂດຍສະເພາະແມ່ນພະແນກສຸກເສີນ ແມ່ນໄດ້ຈັດຕັ້ງເວນຍາມເປັນພິເສດ ເພາະອາດຈະມີເຫດສຸກເສີນເກີດຂຶ້ນຫຼາຍໃນໄລຍະນີ້.

ແລະບອກວ່າສ່ວນທີ່ປິດການໃຫ້ບໍລິການຊົ່ວຄາວນັ້ນແມ່ນພະແນກເຂດນອກ ເຊິ່ງຄົນເຈັບເຂດນອກຄືຄົນເຈັບບໍ່ສຸກເສີນ ສາມາດລໍຖ້າເວລາໃນການເຂົ້າຮັບການກວດພະຍາດໄດ້ ເຊັ່ນ ເຈັບຫຼັງ, ປວດແອວ ແລະອື່ນໆ ທີ່ບໍ່ຮ້າຍແຮງແລະບໍ່ກະທັນຫັນ. ສ່ວນຄົນເຈັບທີ່ສຸກເສີນ ເຊັ່ນ ເຈັບແຮງ, ເປັນໄຂ້, ເກີດລູກ ແລະອື່ນໆ ທີ່ເຫັນວ່າສຸກເສີນ ກໍຍັງສາມາດເຂົ້າຮັບການປິ່ນປົວປົກກະຕິຢູ່, ຍັງມີການຜ່າຕັດ, ໃຫ້ຢາ ແລະປິ່ນປົວຄົນເຈັບປົກກະຕິທຸກຢ່າງ.