ສຳນັກຂ່າວເອເອຟພີລາຍງານ ເມື່ອວັນທີ 8 ເມສາ 2017 ຜ່ານມາວ່າ ເກີດເຫດເຮືອໂດຍສານຂ້າມແມ່ນໍ້າ 2 ລຳຕຳກັນ ທີ່ແມ່ນໍ້າພະສິມ ເມືອງພະສິມ ທາງພາກຕາເວັນຕົກຂອງນະຄອນຢາງກຸ້ງ ມີຜູ້ເສຍຊີວິດຢ່າງໜ້ອຍ 20 ຄົນ ເຈົ້າໜ້າທີ່ສາມາດຊ່ວຍເຫຼືອຊີວິດໄວ້ໄດ້ປະມານ 30 ຄົນ ຈາກຜູ້ໂດຍສານທັງໝົດປະມານ 60-80 ຄົນ ສ້າງຄວາມກັງວົນໃຫ້ກັບໜ່ວຍກູ້ໄພທີ່ພ້ອມກັນລະດົມຄົ້ນຫາ ຄາດວ່າຈະມີຜູ້ເສຍຊີວິດເພີ່ມຂຶ້ນອີກ
ທາງດ້ານເຈົ້າໜ້າທີ່ຕຳຫຼວດບອກວ່າ ການສືບສວນເບື້ອງຕົ້ນພົບວ່າເຮືອອັບປາງ ໄດ້ຊົນກັບເຮືອໂດຍສານອີກລຳໜຶ່ງ ເຊິ່ງຕອນເກີດເຫດເປັນຕອນກາງຄືນ ແລະຜູ້ໂດຍສານເກືອບທັງໝົດ ຢູ່ລະຫວ່າງເດີນທາງກັບຈາກງານແຕ່ງດອງ ຜູ້ເສຍຊີວິດເປັນຜູ້ຍິງ 16 ຄົນ ແລະຊາຍ 4 ຄົນ ແລະຍັງມີຜູ້ສູນຫາຍອີກຢ່າງໜ້ອຍ 9 ຄົນ ທັງໝົດນັ້ນເປັນຍາດພີ່ນ້ອງກັນ ບໍ່ກໍ່ມາຈາກບ້ານດຽວກັນ, ນອກຈາກນີ້ຕຳຫຼວດຍັງພົບວ່າ ເຮືອໂດຍສານທັງສອງລຳ ທີ່ຊົນກັນບໍ່ໄດ້ເປີດໄຟສ່ອງ ຂະນະແລ່ນຂ້າມແມ່ນໍ້າ ທີ່ນຳສູ່ໂສກອະນາດຕະກຳດັ່ງກ່າວ