ສຳນັກຂ່າວສານປະເທດລາວ ລາຍງານເມື່ອວັນທີ 6 ເມສາ 2017 ນີ້ວ່າ ລັດຖະບານ ໄດ້ມີພິທີປະດັບຫລຽນໄຊແຮງງານໃຫ້ບຸກຄົນ, ກົມກອງ ແລະ ອານຸກຳມະການຕ່າງໆ ມີຫລຽນໄຊແຮງງານ ຊັ້ນ II ຈຳນວນ 3.100 ກວ່າທ່ານ, 37 ກົມກອງ, ຫລຽນໄຊແຮງງານ ຊັ້ນ III ຈຳນວນ 4.380 ກວ່າທ່ານ, 6 ກົມກອງ, ຫລຽນກາແຮງງານ 2.880 ທ່ານ, 1 ກົມກອງ ແລະ ມອບໃບຍ້ອງຍໍລັດຖະບານ 2.700 ກວ່າທ່ານ, 2 ກົມກອງ ແລະ ປະດັບຫລຽນກາແຮງງານ ໃຫ້ພາກທຸລະກິດທີ່ມີຜົນງານ ປະກອບສ່ວນ ເຂົ້າໃນການເປັນປະທານອາຊຽນ ແລະ ເປັນເຈົ້າພາບກອງປະຊຸມສຸດຍອດອາຊຽນຄັ້ງທີ 28-29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ໄດ້ຮັບຜົນສໍາເລັດຢ່າງຈົບງາມ.

ພິທີດັ່ງກ່າວ, ໄດ້ຈັດຂຶ້ນໃນວັນທີ 5 ເມສາ 2017 ນີ້ ທີ່ນະຄອນຫລວງວຽງຈັນ. ເປັນກຽດປະດັບໂດຍທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ມີບັນດາລັດຖະມົນຕີ, ຮອງລັດຖະມົນຕີ, ຄະນະອານຸກໍາມະການ, ພາກທຸລະກິດ, ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ໃນໂອກາດນີ້, ທ່ານນາຍົກລັດຖະມົນຕີ ໄດ້ມີຄໍາເຫັນ ແລະ ຕີລາຄາສູງ ຕໍ່ຜົນສໍາເລັດຂອງ ສປປ ລາວ ໃນການເປັນເຈົ້າພາບ ແລະ ປະທານອາຊຽນໃນປີ 2016 ເຊິ່ງເປັນການຍົກຖານະບົດບາດຂອງ ສປປ ລາວ ໃນເວທີພາກພື້ນ ແລະ ສາກົນ ໃຫ້ສູງເດັ່ນຂຶ້ນ. ຊຸກຍູ້ໃຫ້ພາກສ່ວນທີ່ກ່ຽວຂ້ອງ ພ້ອມກັນສືບຕໍ່ຈັດຕັ້ງ ຜັນຂະຫຍາຍຜົນສໍາເລັດ ຂອງກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ລວມທັງຜົນຂອງການຕົກລົງສອງຝ່າຍ ໃຫ້ເປັນຮູບປະທໍາ ເພື່ອນໍາຜົນປະໂຫຍດສູງສຸດ ຕົວຈິງມາສູ່ປະເທດ. ພ້ອມນີ້ ທ່ານນາຍົກລັດຖະມົນຕີ ຕາງໜ້າພັກ ແລະ ລັດຖະບານ ສະແດງຄວາມຂອບໃຈຢ່າງຈິງໃຈ ແລະ ຍ້ອງຍໍຊົມເຊີຍ ມາຍັງພະນັກງານ, ທະຫານ, ຕໍາຫລວດ, ນັກທຸລະກິດ, ພໍ່ຄ້າຊາວຂາຍ ແລະ ປວງຊົນລາວບັນດາເຜົ່າ ທຸກຖ້ວນໜ້າ ທີ່ໄດ້ຕັ້ງໜ້າປະກອບສ່ວນຢ່າງຫ້າວຫັນ ຕາມພາລະໜ້າທີ່ຂອງຕົນ ກໍຄື ການຮ່ວມແຮງຮ່ວມໃຈກັນເປັນເຈົ້າພາບທີ່ດີ ແລະ ຂອບໃຈບັນ ດາປະເທດອາຊຽນ, ຄູ່ເຈລະຈາອາຊຽນ ແລະ ບັນດາປະເທດເພື່ອນມິດອື່ນໆ ທີ່ໄດ້ໃຫ້ການຊ່ວຍ ເຫລືອ, ສະໜັບສະໜູນ ແລະ ການຮ່ວມມື ໃນການເປັນເຈົ້າພາບ ແລະ ປະທານອາຊຽນ ຂອງ ສປປ ລາວ ໃນປີ 2016 ໄດ້ຮັບຜົນສໍາເລັດຢ່າງຈົບງາມ. ບັນດາບົດຮຽນ ໃນການເປັນປະທານອາຊຽນ ໃນປີ 2016 ເປັນພື້ນຖານອັນສໍາຄັນ ສໍາລັບ ສປປ ລາວ ເພື່ອກະກຽມໃຫ້ແກ່ການເປັນປະທານອາຊຽນຄັ້ງທີ 3 ໃນປີ 2024 ກໍຄື ການເປັນປະທານກອງປະຊຸມພາກພື້ນ ແລະ ສາກົນ ອື່ນໆ.