ໃນທ້າຍເດືອນມີນາ ຜ່ານມາ ທີ່ຫ້ອງການອຸດສາຫະກຳ ແລະການຄ້າ ເມືອງບົວລະພາ ແຂວງຄຳມ່ວນ ສົມທົບກັບພາກສ່ວນ ກ່ຽວຂ້ອງ ໄດ້ນຳເອົາສິນຄ້າທີ່ນຳເຂົ້າຜິດກົດໝາຍ ແລະໝົດອາຍຸ(ສິນຄ້າເສຍຄຸນນະພາບ) ມາຈູດທຳລາຍ ໃນນັ້ນປະກອບມີອາຫານສຳເລັດຮູບ ແລະເຄື່ອງດື່ມປະເພດຕ່າງໆເປັນຕົ້ນແມ່ນ ໝີ່ໄວໆ, ປາກະປ໋ອງ, ເຂົ້າໝົມ, ເຂົ້າຊີລີແລັກ ແລະ ເຄື່ອງສຳອາງປະເພດຕ່າງໆ, ນ້ຳອັດລົມ, ນົມສຳເລັດຮູບ ແລະ ອື່ນໆ. ລວມມູນຄ່າເກືອບ 2 ລ້ານກີບ.
ສິນຄ້າດັ່ງກ່າວ ແມ່ນໄດ້ຢຶດມາຈາກຮ້ານຄ້າ ທີ່ຈຸດສຸມຫລັງຄັງ-ວັງມະເນີ ມີຈຳນວນທັງໝົດ 13 ຮ້ານ ແລະມີ 9 ຮ້ານ ທີ່ມີສິນຄ້າປະເພດດັ່ງກ່າວ. ຈຸດປະສົງຂອງການທຳລາຍ ໃນຄັ້ງນີ້ ກໍເພື່ອປະຕິບັດຕາມຄຳສັ່ງ ແລະ ແຈ້ງການຂອງພະແນກອຸດສາຫະກຳການຄ້າແຂວງ ໃຫ້ປະກົດຜົນເປັນຈິງ ແລະ ເພື່ອເປັນການສະກັດກັ້ນ ການລັກລອບການນຳເຂົ້າສິນຄ້າປະເພດຕ່າງໆ ແບບຜິດກົດໝາຍ ແລະ ສິນຄ້າທີ່ໝົດອາຍຸ.
ແຫຼ່ງຂ່າວ: ສຳນັກຂ່າວສານປະເທດລາວ