ຕາມຂ່າວຈາກປະເທດໄທ ວັນທີ 4 ເມສາ 2017 ມື້ວານນີ້ ນາງ ລີນາ ຈັງຈັນຈາ ຫຼື ລີນ່າຈັງ ໄດ້ເດິນທາງໄປທີ່ສະຖານເອກອັກຄະລັດຖະທູດລາວ ປະຈຳນະຄອນຫຼວງບາງກອກ ປະເທດໄທ ເພື່ອຍື່ນຫນັງສືຕໍ່ເອກອັກຄະລັດຖະທູດລາວປະຈຳປະເທດໄທ ຮຽກຮ້ອງໃຫ້ທາງການລາວສົ່ງໂຕ ໂກຕີ ຫຼື ທ້າວ ວຸດທິພົງ ກະຊະທຳມະຄຸນ ອະດີດແກນນຳຄົນເສື້ອແດງ ກັບປະເທດໄທເພື່ອດຳເນີນຄະດີຕາມກົດໝາຍ ແຕ່ປາກົດວ່ານາງລີນ່າຈັງບໍ່ໄດ້ຮັບອະນຸຍາດໃຫ້ເຂົ້າໄປໃນສະຖານທູດ ໂດຍລີນ່າຈັງໄດ້ຢືນດ່າລັດຖະບານລາວຢູ່ຕໍ່ຫນ້າສະຖານທູດດ້ວຍຖ້ອຍຄຳຫຍາບຄາຍ ພ້ອມທັງຮຽກຮ້ອງໃຫ້ເລຂານຸການອອກມາຮັບໜັງສື ແຕ່ບໍ່ເປັນຜົນ ສຸດທ້າຍເຈົ້າໜ້າທີ່ສະຖານທູດໄດ້ໃຫ້ລີນ່າຈັງເຂົ້າຍື່ນໜັງສືໄດ້ທີ່ປ່ອງຮັບເອກະສານເລື່ອງຈຶ່ງຈົບລົງ.
ໃນຂະນະທີ່ເລື່ອງ ໂກຕີ ທີ່ຝ່າຍໄທສົງໄສວ່າກຳລັງລີ້ໄພຢູ່ໃນປະເທດລາວນັ້ນ, ທາງການລາວຍັງບໍ່ໄດ້ມີປະຕິກິລິຍາໃດໆ ເປີດເຜີຍສູ່ສັງຄົມວ່າ ໂກຕີ ລີ້ຢູ່ໃນປະເທດລາວຕາມທີ່ຝ່າຍໄທສົງໄສຫຼືບໍ່. ແນວໃດກໍຕາມ, ບັນຫາດັ່ງກ່າວນັ້ນຄາດວ່າທາງການລາວກັບໄທໄດ້ໂອ້ລົມກັນຢູ່ແລ້ວ ແລະປະຊາຊົນພຽງຄົນ 2 ຄົນ ຄົງບໍ່ສາມາດແກ້ໄຂໄດ້ ຄົງຕ້ອງປະໄວ້ໃຫ້ເປັນໜ້າທີ່ຂອງທາງການລະຫວ່າງສອງປະເທດແກ້ໄຂ.
