ເມື່ອວັນທີ 31 ມີນາ 2017 ທີ່ຜ່ານມາ ສຳນັກຂ່າວເອຟພີລາຍງານວ່າ ປະທານາທິບໍດີ ໂດນັລ ທຣັມ ອອກຄຳສັ່ງໃຫ້ເຈົ້າໜ້າທີ່ລະບຸລາຍຊື່ປະເທດທີ່ເອົາປຽບການຄ້າກັບສະຫະລັດຈົນເຮັດໃຫ້ຂາດທຶນເກືອບ 50,000 ລ້ານໂດລາ ເພື່ອຈະແກ້ໄຂພາວະການຂາດດູນທາງການຄ້າຂອງສະຫະລັດ ເຊິ່ງນອກຈາກຈະມີຈີນທີ່ຖືກຈັບຕາເບິ່ງເປັນພິເສດແລ້ວ ຍັງມີປະເທດໄທ, ຍີ່ປຸ່ນ, ເຢຍລະມັນ,​ເມັກຊິໂກ, ໄອແລນ, ຫວຽດນາມ, ອິຕາລີ,​ ເກົາຫຼີໃຕ້, ອິນເດຍ, ຝຣັ່ງ, ສະວິດເຊີແລນ, ອິນໂດເນເຊຍ, ໄຕ້ຫວັນ ແລະ ການາດາ ຄວາມເຄື່ອນໄຫວນີ້ນັບເປັນປະຕິບັດການທີ່ແຂງກະດ້າງຈາກລັດຖະບານທຣັມ.

ທ່ານ ວິລເບີ ຣອສ ລັດຖະມົນຕີກະຊວງອຸດສາຫະກຳ ແລະ ການຄ້າຂອງສະຫະລັດກ່າວວ່າ ຄຳສັ່ງທີ່ອອກມານັ້ນມຸ້ງເປົ້າວິເຄາະສະພາບເຫດການອອກເປັນແຕ່ລະປະເທດ ແລະ ລາຍການຜິລິດຕະພັນ ພາຍໃນ 90 ມື້ ແຕ່ລະປະເທດທີ່ມີລາຍຊື່ນັ້ນຕ້ອງລາຍງານທຣັມໃຫ້ຮັບຮູ້ ທາງສະຫະລັດຈະກວດສອບຫຼັກຖານການໂກງ ການມີພຶດຕິກຳທີ່ບໍ່ສອດຄ່ອງໃນເລື່ອງການຄ້າທີ່ບໍ່ເປັນໄປຕາມສັນຍາກັນໄວ້ ຮວມໄປເຖິງການກວດສອບການຜ່ອນພັນດ້ານການຄ້າ ບັນຫາອັດຕາການແລກປ່ຽນ ແລະ ບັນຫາເລື່ອງຂໍ້ຈຳກັດຕ່າງໆ ຂອງອົງກອນການຄ້າໂລກ.

ເຖິງຢ່າງໃດກໍ່ຕາມ ທ່ານ ຣອສໄດ້ກ່າວຕື່ມອີກວ່າ ທາງສະຫະລັດບໍ່ໄດ້ຕ້ອງການປະຕິບັດການແກ້ແຄ້ນ ຫຼື ເໝົາລວມວ່າທັງໝົດຈົງໃຈເອົາປຽບສະຫະລັດ ເພາະບາງກໍລະນີຕ້ອງຍອມຮັບວ່າ ຄູ່ແຂ່ງໄດ້ເຮັດຜະລິດຕະພັນລາຄາຖືກກວ່າສະຫະລັດອາເມລິກາແທ້.