ບັນດາພະນັກງານ ຈຳນວນ 96 ຄົນ ຂອງບໍລິສັດຣາຊ-ລາວ ບໍລິການ ຈຳກັດ ທີ່ເຮັດໜ້າທີ່ຮັບຜິດຊອບເດີນເຄື່ອງ ແລະ ບຳລຸງຮັກສາ ໂຮງໄຟຟ້າພະລັງຄວາມຮ້ອນ ຖ່ານຫີນ ເປັນໜຶ່ງໃນບໍລິສັດທີ່ຮັບເໝົາຍ່ອຍໃນໂຄງການໄຟຟ້າຟ້າຫົງສາ ເຊິ່ງບໍ່ໄດ້ກ່ຽວກັບບໍລິສັດອື່ນໆທີ່ເຮັດວຽກຢູ່ໂຄງການດຽວກັນນີ້. ໄດ້ພ້ອມກັນ ຂຽນໃບລາອອກ ທັງໝົດ 96 ຄົນ ໃນວັນທີ 28 ມີນາ 2017 ຜ່ານມາ, ເນື່ອງຈາກບໍ່ພໍໃຈ ທີ່ໄດ້ສະເໜີ ຂໍໃຫ້ພິຈາລະນາ ປັບຂຶ້ນເງິນເດືອນ ແລະ ສະຫວັດດີການຕ່າງໆ ໃຫ້ມີຄວາມເໝາະສົມ ແຕ່ບໍ່ໄດ້ຮັບການແກ້ໄຂ. ໃນຂະນະທີ່ ບໍລິສັດ ຣາຊ-ລາວ ລະບຸວ່າມີຄວາມຍິນດີຮັບຂໍ້ສະເໜີ ດັ່ງກ່າວ ແລະ ພ້ອມທີ່ຈະຮ່ວມກັນປຶກສາຫາລື ກັບທຸກຝ່າຍ ເພື່ອຫາທາງອອກທີ່ດີກວ່ານີ້.
ໜຶ່ງໃນຕົວແທນຜູ້ອອກແຮງງານ ເປີດເຜີຍວ່າ: ກ່ອນທີ່ພະນັກງານທັງ 96 ຄົນຈະພ້ອມກັນສະໝັກໃຈຂຽນໃບລາອອກ ເກີດຂຶ້ນພາຍຫຼັງທີ່ໄດ້ຍື່ນຂໍ້ສະເໜີ ຮຽກຮ້ອງໃຫ້ບໍລິສັດ ຣາຊ-ລາວ ເພື່ອຂໍປັບຂຶ້ນເງິນເດືອນ ທີ່ເຫັນວ່າຍັງບໍ່ທັນເປັນທຳ ແລະ ສະຫວັດດີການ ກໍຍັງບໍ່ເໝາະສົມເທົ່າທີ່ຄວນ ແຕ່ປະກົດວ່າ ບໍ່ທັນໄດ້ຮັບການຕອບຮັບ ແລະ ຊີ້ແຈງເຖິງສາເຫດຕ່າງໆ ໃຫ້ມີຄວາມຊັດເຈນ ທັງມີຄວາມຊັກຊ້າ ອັນສ້າງຄວາມບໍ່ພໍໃຈ ຕໍ່ພະນັກງານ ຫຼາຍສົມຄວນ. ສຳລັບການຮຽກຮ້ອງດັ່ງກ່າວ ປະກອບມີ ຄື:
+ ການຂໍປັບຂຶ້ນເງິນເດືອນ, ຄ່າອາຫານ, ຄ່າລົດກັບບ້ານ, ຄ່າບຸກເບີກ, ຄ່າກະວຽກ, ການລາປ່ວຍ, ການລາກິດ ແລະ ການພັກວຽກປົກກະຕິ ໃນແຕ່ລະເດືອນ ເຊິ່ງທຸກຢ່າງຕ້ອງການ ໃຫ້ມີການປັບປຸງແກ້ໄຂ ກ່ອນທີ່ຈະມີສັນຍາໃໝ່ຂຶ້ນ ໃນເດືອນມິຖຸນາປີນີ້. ເພາະບາງຄົນເຮັດວຽກ 3 ປີແຕ່ການຂຶ້ນເງິນເດືອນໃຫ້ພວກຕົນ ແມ່ນມີອັດຕາທີ່ໜ້ອຍຖ້າສົມທຽບກັບຄວາມເປັນຈິງ ຂະນະທີ່ການເຮັດວຽກໜັກຂຶ້ນກວ່າເກົ່າ.
+ ບໍລິສັດ ໄດ້ນຳເອົາພະນັກງານຈາກຕ່າງປະເທດ ເຂົ້າມາເຮັດວຽກໃນຂະແໜງນີ້ ເຊິ່ງມີປະສົບການໜ້ອຍກວ່າ ພະນັກງານລາວ ທີ່ເຮັດວຽກມາ 2-3 ປີແລ້ວ, ແຕ່ກັບໄດ້ເງິນເດືອນ ແລະ ສະຫວັດດີການທີ່ສູງກວ່າ ໃນທຸກດ້ານ ອັນໄດ້ສ້າງຄວາມເອົາລັດເອົາປຽບ ຫຼື ສອງມາດຕະຖານ ຄື: ໃຫ້ເງິນເດືອນພື້ນຖານພະນັກງານລາວພຽງແຕ່ 1.800.000 ກີບ ຫາ 2.000.000 ກວ່າກີບຕໍ່ເດືອນ (ຊັ້ນສູງ-ປະລິນຍາຕີ) ແຕ່ພະນັກງານຄົນໄທຊໍ້າພັດໃຫ້ເງິນເດືອນພື້ນຖານສູງເຖິງ 4.000.000 ກີບຕໍ່ເດືອນ.
+ ການພັກວຽກປົກກະຕິ ຂອງພະນັກງານບຳລຸງຮັກສາ ໃນໄລຍະຜ່ານມາ ຈາກເດີມ ທີ່ເຄີຍພັກໜຶ່ງອາທິດ/ເດືອນ ກໍຈະປັບປຸງໃຫ້ມີການພັກແຕ່ວັນອາທິດ ຫຼື 4 ວັນ/ເດືອນ ແລະ ອື່ນໆ ເປັນການເພີ່ມເວລາເຮັດວຽກຫຼາຍ ເວລາພັກໜ້ອຍລົງ.
+ບໍລິສັດດັ່ງກ່າວບໍ່ມີຄວາມໂປ່ງໃສ ແລະ ບໍ່ປະຕິບັດຕາມກົດໝາຍແຮງງານຂອງ ສປປ ລາວ
+ປົກປິດເຊື່ອງອໍາບາງນະໂຍບາຍ ແລະ ແບ່ງແຍກສິດທິຂັ້ນພື້ນຖານຂອງພະນັກງານ-ກໍາມະກອນ ເຊິ່ງໄດ້ກໍໃຫ້ເກີດຄວາມແຕກແຍກຂາດຄວາມສາມາດຄີພາຍໃນ
ຢ່າງໃດກໍຕາມ ທຸກຂໍ້ສະເໜີຂ້າງເທິງ ກຸ່ມຜູ້ອອກແຮງງານ ໄດ້ດຳເນີນການຖືກຕ້ອງຕາມກົດໝາຍ ຫາກບໍ່ໄດ້ຄວາມເປັນທຳ ຈາກບໍລິສັດ ກໍຈະເປັນໄປຕາມຄວາມປະສົງທຸກປະການ, ສະນັ້ນ ຈຶ່ງຕ້ອງການໄດ້ຄຳຕອບທີ່ຊັດເຈນໂດຍໄວ.
ສ່ວນທາງດ້ານທ່ານ ບຸນທະໜອງ ປະທານກຳມະບານຂອງບໍລິສັດ ຣາຊ-ລາວ ບໍລິການ ຈຳກັດ ກໍໄດ້ຊີ້ແຈງຕໍ່ນັກຂ່າວວ່າ: ປັດຈຸບັນທາງບໍລິສັດ ກຳລັງຄົ້ນຄວ້າພິຈາລະນາ ທຸກຂໍ້ສະເໜີດັ່ງກ່າວ ເພື່ອນຳໄປປັບປຸງແກ້ໄຂ ແລະ ຫາທາງອອກທີ່ດີຮ່ວມກັນ, ແຕ່ໃນຂະນະນີ້ ຍັງບໍ່ສາມາດເປີດເຜີຍໄດ້ວ່າ ທຸກຂໍ້ສະເໜີຈະໄດ້ຮັບການແກ້ໄຂ ໃນທິດທາງໃດ ແລະ ເຊື່ອວ່າ ທຸກບັນຫາທີ່ເກີດຂຶ້ນຕ້ອງມີຂໍ້ສະຫຼຸບ ໃຫ້ເປັນເອກະພາບກັນ. ທັງນີ້ທາງບໍລິສັດ ກໍໄດ້ກະກຽມຈັດກອງປະຊຸມສາມຝ່າຍ ລະຫວ່າງຕົວແທນຜູ້ໃຊ້ແຮງງານ, ຜູ້ອອກແຮງງານ ແລະ ກຳມະບານ ຄາດວ່າຈະມີຂຶ້ນ ໃນຕົ້ນເດືອນເມສານີ້ ເພື່ອສ້າງຄວາມເຂົ້າໃຈແກ່ທຸກຝ່າຍ
ທັງໆທີ່ພະນັກງານຄົນໄທທັງໝົດທີ່ບໍລິສັດຈັດຫາງານນໍາເຂົາມາເຮັດວຽນຢູ່ໂຮງໄຟຟ້າພະລັງງານຄວາມຮ້ອນຫົງສານັ້ນບໍ່ມີສີມື ແລະ ຄົນລາວເປັນຜູ້ຝຶກອົບຮົມໃຫ້ ແຕ່ເປັນຫຍັງເງິນເດືອນຂັ້ນພື້ນຖານຈິງສູງກວ່າ
ຫລ້າສຸດເມືອວັນທີ 31 ມີນາ 2017 ສຳນັກຂ່າວສານປະເທດລາວ ໄດ້ລາຍງານເພີ່ມເຕີມວ່າ ທ່ານ ປັນຍາສັກ ພະນັກງານເຮັດວຽກຢູ່ໂຮງງານໄຟຟ້າຄວາມຮ້ອນຫົງສາໃນແຂວງໄຊຍະບູລີຢືນຢັນເວລາ 4:30 ນາທີຂອງວັນທີ 31/3/2017 ນີ້ວ່າພວກຕົນຈໍານວນ 97 ຄົນບໍ່ໄດ້ປະທ້ວງຄືສື່ສັງຄົມອອກລາຍຕີຄວາມຫມາຍແບບຜິດໆ ອັນສ້າງຄວາມແຕກຕື່ນໃຫ້ສັງຄົມເນື່ອງຈາກວ່າພວກພຽງແຕ່ຂຽນໃບສະເຫນີຂໍຄວາມເຫັນໃຈເພື່ອໃຫ້ເພີ່ນຈາລະນາແຂ້ໄຂບາງຈຸດ ປັດຈຸບັນພວກຕົນ 97 ຊີວິດຢູ່ເຮັດວຽກຢູ່ໂຮງງານປົກກະຕິ ສະນັ້ນເລື່ອງນີ້ເພີ່ນກຳລັງມີການປຶກສາຫາລືແກ້ໄຂຫາຂໍ້ສະຫຼຸບຢູ່ພະນັກງານກະເຮັດວຽກປົກກະຕິພຽງແຕ່ຍັງລໍຖ້າເລື່ອງທີ່ຂໍໃຫ້ໄດ້ຮັບການແກ້ໄຂຢ່າງຍຸຕິທຳໂດຍທາງແຮງງານແລະກຳມະບານລວມເຖິງຄະນະບໍລິຫານລະດັບສູງຂອງບໍລິສັດທີ່ກ່ຽວຂ້ອງໄດ້ປະຊຸມຫາທາງແກ້ໄຂຕອນເຊົ້າຂອງວັນທີ່ 31 ເມສາ 2017 ນີ້ ດຽວນີ້ບັນຫາພວມໄດ້ຮັບການແກ້ໄຂຕາມຂັ້ນຕອນ ຄົນທີ່ເສບຂ່າວກະຕ້ອງຫາຂໍ້ມູນຕາມແຫຼ່ງຂໍ້ມູນທີ່ເຊື່ອຖືໄດ້ບໍ່ແມ່ນບາງສື່ເອົາໄປເວົ້າກະເຂົ້າໃຈຜິດກັນໝົດເຊິ່ງອາດເປັນຊ່ອງວ່າງໃຫ້ຄົນບໍ່ດີສວຍໃຊ້ໂອກາດປຸກປັ່ນຍຸແຍ່ໃຫ້ເກີດຄວາມແຕກແຍກ ແລ້ວກະຂໍແຈ້ງວ່າຕອນນີ້ອ້າຍນ້ອງພະນັກງານຈຳນວນດັ່ງກ່າວໄດ້ຖອນໃບລາອອກແລ້ວເກືອບ 50% ແລະຈະມາຖອນອີກຈຳນວນຫຼາຍເພື່ອຫາທາງອອກທີ່ດີກ່ວາໄດ້ຜົນປະໂຫຍດທັງສອງຝ່າຍ ຂອບໃຈ
ແຫລ່ງຂ່າວຈາກ: ສຳນັກຂ່າວສານປະເທດລາວ