ຕາມການລາຍງານຂອງນັກຂ່າວທ້ອງຖິ່ນ ໃນວັນທີ 21 ມີນາ 2017 ຜ່ານມາ ເຈົ້າໜ້າທີ່ຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງບໍລິຄຳໄຊ ໄດ້ສົມທົບກັບອຳນາດການປົກຄອງ ແລະເຈົ້າໜ້າທີ່ເມືອງທ່າພະບາດ ພາຍໃນແຂວງຕົນເອງ ເຂົ້າໄປກວດຄົ້ນເຮືອນເປົ້າໝາຍຫຼັງໜຶ່ງຢູ່ເມືອງດັ່ງກ່າວ
ໃນການກວດຄົ້ນຄັ້ງນີ້ ສາມາດຢຶດຂອງກາງປະເພດຢາບ້າໄດ້ ຈຳນວນ 12.000 ເມັດ, ກັນຊາອັດແທ່ງ 2 ແທ່ງໃຫຍ່ ແລະ 12 ແທ່ງນ້ອຍ, ອາວຸດປືນ (ປືນສັ້ນ) 2 ກະບອກ, ລູກປືນ 27 ລູກ, ມີດ 1 ດວງ ພ້ອມໂທລະສັບມືຖືອີກ 5 ຫນ່ວຍ, ເງິນກີບ 640,000 ກີບ, ເງິນບາດໄທຈຳນວນ 2,000 ບາດ, ລົດຈັກ 4 ຄັນ ພ້ອມວັດຖຸມີຄ່າອີກຈຳນວນໜຶ່ງ ແລະສາມາດຈັບຕົວຜູ້ຕ້ອງຫາໄດ້ 10 ຄົນຄື: 1. ທ. ນັດທະພົງ ອາຍຸ 22 ປີ ຢູ່ບ້ານໜອງແສງ, 2. ທ. ນັນທະວັດ ອາຍຸ 19 ປີ ຢູ່ບ້ານຄຳແສນ, 3. ທ. ພົງເທບ ອາຍຸ 22 ປີ ບ້ານນາຈະເລີນ, 4. ນາງ ກິລາຄອນ (ປາ) ອາຍຸ 17 ປີ ບ້ານໂນນສະຫວ່າງ ທັງ 4 ຄົນນີ້ຢູ່ເມືອງບຶງການ ແຂວງບຶງການ ປະເທດໄທ, 5. ທ. ບຸນມາ ແກ້ວບົວບານ ອາຍຸ 37 ປີ ຢູ່ບ້ານເລົ່າ ເມືອງທ່າແຂກ ແຂວງຄຳມ່ວນ, 6. ທ. ດາລານີ ອາຍຸ 25 ປີ ຢູ່ບ້ານສີວິໄລ ເມືອງໂພນໂຮງ ແຂວງວຽງຈັນ, 7. ນາງ ມຸກ ອາຍຸ 18 ປີ ຢູ່ບ້ານໂພນສີ ເມືອງນາຊາຍທອງ ນະຄອນຫຼວງວຽງຈັນ, 8. ທ. ລຳເງິນ ອາຍຸ 50 ປີ ບ້ານທ່າບົກ ເມືອງທ່າພະບາດ, 9. ນາງ ຄຳຄູນ ອາຍຸ 17 ປີ ຢູ່ບ້ານຄຳບອນ ເມືອງປາກຊັນ, 10. ນາງ ນິ້ມ ອາຍຸ 19 ປີ ຢູ່ບ້ານສົມສະໜຸກ ເມືອງປາກກະດິງ.
ດັ່ງນັ້ນນ ທາງເຈົ້າໜ້າທີ່ ປກສ ແຂວງບໍລິຄຳໄຊ ຈຶ່ງໄດ້ກັກຕົວຜູ້ກະທຳຜິດທັງໝົດ ມາດຳເນີນຄະດີ ສືບສວນ-ສອບສວນ ຕາມກົດໝາຍ ເພື່ອຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີອີກຕໍ່ໄປ
ແຫຼ່ງຂ່າວ: ໜັງສືພິມ ລາວພັດທະນາ