ເອເອຟພີລາຍງານ ໃນວັນທີ 28 ມີນາ 2017 ຜ່ານມາ ໄດ້ລາຍງານເຖິງຄວາມຄືບໜ້າສະຖານະການພາຍຸໄຊໂຄນ ເດັບບີ ພັດຖະຫຼົ່ມລັດ ຄວີນສ໌ແລນ ພາກຕາເວັນອອກສ່ຽງເໜືອຂອງອອສເຕຣເລຍ ເຊິ່ງພາຍຸໄດ້ພັດເຂົ້າຝັ່ງດ້ວຍຄວາມໄວລົມສູນກາງເຖິງ 263 ກິໂລແມັດ/ຊົ່ວໂມງ, ທ່ານ ມັລຄອລ໌ມ ເທິຣ໌ນບູລ ນາຍົກດລັດຖະມົນຕີ ອອສເຕຣເລຍ ປະກາດໃຊ້ແຜນຮັບມືສະຖານະການໃນລະດັບຫາຍະນະໄພແລ້ວ
ນາຍົກອອສເຕຣເລຍເວົ້າວ່າ ໄດ້ສັ່ງການໃຫ້ກຳລັງທະຫານເອົາເຮລິຄອບເຕີ ແລະເຮືອຂອງກອງທັບປະຕິບັດພາລະກິດຊ່ວຍເຫຼືອຜູ້ປະສົບໄພແລ້ວ ຫຼັງຈາກໄດ້ຮັບການແຈ້ງການເສຍຊີວິດ ແລະຄວາມເສຍຫາຍເລື້ອຍໆ ຈຶ່ງຂໍໃຫ້ປະຊາຊົນຢູ່ໃນສະຖານະການຫຼົບໄພຈົນເຖິງວັນພຸດນີ້
ເຖິງແມ່ນພາຍຸຈະອ່ອນກຳລັງລົງ ເຫຼືອລະດັບ 2 ແຕ່ພາຍຸຍັງເຮັດໃຫ້ເກີດຝົນຕົກໜັກ ແລະລົມພັດຖະຫຼົ່ມແຮງຢ່າງຕໍ່ເນື່ອງ ຜູ້ເສຍຊີວິດຄົນທຳອິດທີ່ໄດ້ຮັບການແຈ້ງ ເປັນຜູ້ຍິງທີ່ປະສົບເຫດລົດຊົນ
ສຳລັບການເສຍຫາຍເບື້ອງຕົ້ນຍັງບໍ່ທັນສະຫຼຸບໄດ້ ເພາະການສຳຫຼວດຄວາມເສຍຫາຍໃນວັນອັງຄານເປັນໄປໄດ້ຍາກ ເພາະໄຟຟ້າ ແລະສາຍໂທລະສັບໃນຊຸມຊົນຂາດ. ດ້ານໜ່ວຍກູ້ໄພປະຈຳການກຽມກຳລັງໄວ້ 2,000 ກວ່າຄົນ ແຕ່ໄດ້ຮັບຄຳສັ່ງວ່າຈະລົງພື້ນທີ່ໄດ້ ເມື່ອມີຄວາມປອດໄພແລ້ວ