ໃນວັນທີ 28 ມີນາ 2017 ຜ່ານມາ ທີ່ໂຮງແຮມດອນຈັນພາເລດ ໄດ້ຈັດກອງປະຊຸມທຸລະກິດລາວຄັ້ງທີ 10 ຂຶ້ນ ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສະຫະກຳ ແລະການຄ້າ, ມີພາກເອກະຊົນ ແລະພາກລັດທີ່ກ່ຽວຂ້ອງເຂົ້າຮ່ວມ

ໃນກອງປະຊຸມ ດັ່ງກ່າວພາກທຸລະກິດ ໄດ້ຍົກໃຫ້ຫຼາຍບັນຫາຂຶ້ນມາ ໃຫ້ພາກລັດແກ້ໄຂ ເປັນຕົ້ນແມ່ນບັນຫາດ້ານອາກອນ, ຄ່າບໍລິການອິນເຕີເນັດ, ຄ່າຂົນສົ່ງ, ມູນຄ່າການນຳເຂົ້າ ແລະສົ່ງອອກສິນຄ້າທີ່ສູງ, ການຂໍອະນຸຍາດດຳເນີນທຸລະກິດ, ການເຂົ້າເຖິງແຫຼ່ງທຶນສຳລັບວິສະຫະກິດຂະໜາດນ້ອຍ ແລະກາງ,  ການເຂົ້າຫາຕະຫຼາດແຮງງານ

ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສະຫະກຳແຫ່ງຊາດເວົ້າວ່າ: ນັບຕັ້ງແຕ່ມີການປັບປຸງໂຄງສ້າງຂອງຂະບວນການປຶກສາຫາລືຄືນໃໝ່ໃນເດືອນພຶດສະພາຜ່ານມາ ສາມາດແກ້ໄຂບັນຫາທີ່ເອກະຊົນຍົກຂຶ້ນໄດ້ 4 ບັນຫາ, ມີ 14 ກໍລະນີກຳລັງຢູ່ຂັ້ນຕອນການແກ້ໄຂ ແລະ 13 ກໍລະນີທີ່ຕ້ມີການຄົ້ນຄວ້າເພີ່ມເຕີມ ແລະຕ້ອງໃຊ້ເວລາໃນການແກ້ໄຂ, ກອງປະຊຸມທຸລະກິດຄັ້ງນີ້ແມ່ນມີ 4 ກຸ່ມບັນຫາຄື ບັນຫາທຳອິດທີ່ຕິດພັນດ້ານອາກອນ, ພິເສດແມ່ນອາກອນມູນຄ່າເພີ່ມສຳລັບການໃຫ້ບໍລິການດ້ານອິນເຕີເນັດ, ສອງບັນຫາດ້ານຄ່າຂົນສົ່ງ, ມູນຄ່າການນຳເຂົ້າ ແລະສົ່ງອອກສິນຄ້າທີ່ສູງ, ສາມແມ່ນບັນຫາທີ່ຕິດພັນກັບລະບຽບການດ້ານການຈົດທະບຽນວິສາຫະກິດ ແລະຂໍອະນຸຍາດດຳເນີນທຸລະກິດ ແລະບັນຫາສຸດທ້າຍທີ່ໄດ້ຮັບການແກ້ໄຂຄື ການເຂົ້າເຖິງແຫຼ່ງທຶນສຳລັບວິສາຫະກິດຂະໜາດນ້ອຍ ແລະກາງ ແລະການເຂົ້າຫາຂໍ້ມູນຕະຫຼາດແຮງງານ

ໃນໂອກາດດຽວກັນ ທ່ານນາຍົກ ໄດ້ກ່າວວ່າ: ການປັບປຸງກົດໝາຍ, ລະບຽບການ ແລະຂັ້ນຕອນ ແມ່ນເພື່ອສົ່ງເສີມການລົງທຶນ ແລະຮອງຮັບການເຕີບໃຫຍ່ທີ່ຍືນຍົງຂອງພາກເອກະຊົນ ໄປຄຽງຄູ່ກັບການຮັກສາສະຖຽນລະພາບ ຂອງເສດຖະກິດມະຫາພາກ, ພວກເຮົາຕ້ອງຕັ້ງໜ້າປັບປຸງສະພາບແວດລ້ອມຂອງການດຳເນີນທຸລະກິດ ເພື່ອສົ່ງເສີມການກໍ່ຕັ້ງ ແລະຂະຫຍາຍທຸລະກິດ ເຊິ່ງຈະເປັນບ່ອນສ້າງບ່ອນເຮັດວຽກໃຫ້ແກ່ໄວໜຸ່ມ ໃນແຕ່ລະປີ ໂດຍການຄາດຄະເນສະເລ່ຍສູງເຖິງ 90 ພັນຄົນ/ປີ ໃນ 10 ປີຕໍ່ໜ້າ ພ້ອມຮອງຮັບແຮງງານທີ່ເຄື່ອນຍ້າຍອອກຈາກພາກກະສິກຳເທື່ອລະກ້າວ.

ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ