ຄົນລາວຫຼາຍຄົນຍັງບໍ່ຮູ້ຊໍ້າວ່າ ໃນປະເພນີບຸນປີໃໝ່ລາວນັ້ນ ເພິ່ນຈະມີກິດຈະກຳຫຍັງແດ່? ໂດຍສະເພາະແມ່ນຊາວໜຸ່ມ-ເຍົາວະຊົນ ຮູ້ພຽງແຕ່ວ່າເພິ່ນວ່າມື້ໃດເປັນມື້ບຸນ ກໍພາກັນຈັບກຸ່ມຫລິ້ນນໍ້າ, ໄປຫົດພະ ແລະທີ່ບໍ່ສົມຄວນເຮັດແມ່ນ ຕັ້ງກຸ່ມດື່ມສຸລາຈົນເມົາຕິດຕໍ່ກັນຫຼາຍວັນ ແຕ່ກິດຈະກຳທີ່ຄວນເຮັດແທ້ໆ ນັ້ນ ບໍ່ຮູ້ຊໍ້າກໍມີ. ດັ່ງນັ້ນ, ມື້ນີ້ ລາວໂພສຕ໌ ຈຶ່ງຢາກຂໍນຳສະເໜີບັນດາກິດຈະກຳທີ່ຄວນມີໃນບຸນປີໃໝ່ລາວສູ່ເພື່ອນຜູ້ອ່ານໄດ້ຮັບຮູ້ນຳກັນ ຜູ້ໃດໄດ້ປະຕິບັດກໍຈະເປັນສິລິມຸງຄຸນແກ່ຕົນເອງ ດັ່ງນີ້:
- ອະນາໄມເຮືອນ, ວັດ ແລະຮ້ານພະ
ກ່ອນຈະຮອດມື້ບຸນປີໃໝ່ລາວ ປະຊາຊົນຈະອະນາໄມເຮືອນຊານບ້ານຊ່ອງ ທັງນອກເຮືອນ ແລະໃນເຮືອນ ໃຫ້ເປັນລະບຽບຮຽບຮ້ອຍ ສະອາດງາມຕາ, ເສື້ອຜ້າແລະເຄື່ອງໃຊ້ ອັນໃດທີ່ບໍ່ຈົບບໍ່ງາມ ເພິ່ນກໍຈະຊັກລ້າງໃຫ້ສະອາດ. ຢູ່ວັດເພິ່ນກໍມີການອະນາໄມຕາມກຸດຕິ, ຕ້າຍວັດ, ຫໍແຈກ ບ່ອນໃດເປ່ເພກໍສ້ອມແປງ ໃຫ້ຈົບງາມ, ເດິ່ນວັດ ແລະລວມທັງຫໍພະ ຮ້ານພະ ພັດທະສິມມາ ພະທາດເຈດີ ກໍອະນາໄມລ້າງສ່ວຍ. - ພິທີຫົດພະ, ຫົດສົງ, ຫົດພະທາດເຈດີ, ຫົດຕົ້ນສີມະຫາໂພ
ກິດຈະກຳຫຼັກແລະໂດດເດັ່ນທີ່ສຸດແມ່ນການຫົດສົງພະພຸດທະຮູບ, ຫົດສົງພະສົງ (ອາດຈະມີພິທີເຖລາພິເສກກໍໄດ້), ຫົດສົງພະທາດເຈດີ, ຕົ້ນສີມະໂພ ແລະບູຊະນິຍະວັດຖຸອື່ນໆ. - ເຮັດບຸນ
ຊາວພຸດລາວມັກຈະເຮັດບຸນຮັບພອນໃນໄລຍະປີໃໝ່ລາວ ເຊັ່ນ ໄປຮັກສາສິນ,ໃຫ້ທານແລະຟັງເທດຢູ່ວັດ, ນິມົນພະມາສັນເຂົ້າຢູ່ເຮືອນ, ເຮັດບຸນຂຶ້ນເຮືອນໃໝ່ ເພາະຖືເປັນເລີກດີຍາມດີ. ນອກຈາກນັ້ນເພິ່ນມັກຈະມີພິທີຕົບພະທາດຊາຍຢູ່ວັດ (ເປັນກົນລະຍຸດໃນການເອົາຊາຍເຂົ້າວັດເພື່ອເປັນວັດສະດຸກໍ່ສ້າງ ໄດ້ທັງບຸນໄດ້ທັງວຽກ), ໄປເກັບດອກໄມ້ຢູ່ແຄມນ້ຳເພື່ອເອົາມາບູຊາພະໃນຫໍສົງ ພ້ອມທັງເປັນໂອກາດໃຫ້ປະຊາຊົນໄດ້ຫລິ້ນນໍ້າຢ່າງມ່ວນຊື່ນປົດປ່ອຍຈາກໜ້າວຽກ. - ສົມມາຜູ້ອາວຸໂສແລະບາສີສູ່ຂວັນ
ລູກເຕົ້າຫຼືລູກຫຼານ ທີ່ຢູ່ຫ່າງໄກກໍຈະເດິນທາງກັບບ້ານ ເພື່ອຮ່ວມເຮັດພິທີສົມມາຜູ້ເຖົ້າຜູ້ແກ່ໃນຄອບຄົວ ດ້ວຍຂັນສົມມາ, ເສື້ອຜ້າໃໝ່ ແລະຫົດສົງເພິ່ນ ເປັນຕົ້ນແມ່ນ ພໍ່ແມ່, ປ້າລຸງ, ປູ່ຍ່າ, ພໍ່ເຖົ້າແມ່ເຖົ້າ… ເປັນຕົ້ນ. ນອກຈາກນັ້ນກໍຈະມີພິທີມັດແຂນສູ່ຂວັນໃຫ້ຜູ້ອາວຸໂສ ແລະມັດແຂນອວຍພອນເຊິ່ງກັນແລະກັນ. - ຫົດນ້ຳອວຍພອນເຊິ່ງກັນແລະກັນ
ການຫົດນໍ້າອວຍພອນເຊິ່ງກັນແລະກັນຖືເປັນເລື່ອງທີ່ປະຕິບັດຢ່າງທົ່ວເຖິງ ມື້ນີ້ໃຜກໍໃຈໃຫຍ່ ບາງເທື່ອເຖິງບໍ່ຢາກໃຫ້ຫົດແຕ່ກໍຕ້ອງເກັບໄວ້ໃນໃຈ ເອົາຮອຍຍິ້ມແລະຄຳອວຍພອນອອກມາໄວ້ນອກ. ຜູ້ຫົດນໍ້າທີ່ຖືກຕ້ອງກໍຂໍອະນຸຍາດ ແລະເບິ່ງກາລະເທສະທີ່ເໝາະສົມ ພໍຫົດຈັ່ງຂໍຫົດ.
ນັ້ນແມ່ນກິດຈະກຳທີ່ສຳຄັນ ທີ່ຄົນລາວຊາວພຸດເຮົາໄດ້ປະຕິບັດສືບຕໍ່ກັນມາ. ແຕ່ວ່າມາຮອດສະໄໝປັດຈຸບັນ ທາງຝ່າຍລັດຖະບານກໍໄດ້ມີກິດຈະກຳສົ່ງເສີມການທ່ອງທ່ຽວຂຶ້ນມາຕື່ມ ເຊິ່ງຈະມີພິທີປະກາດນາງສາວງາມ ມາເປັນນາງສັງຂານໃນແຕ່ລະແຂວງ ຫຼືເມືອງທີ່ມີເງື່ອນໄຂສະດວກ (ແຕ່ກ່ອນກິດຈະກຳນີ້ແມ່ນມີຢູ່ສະເພາະຫຼວງພະບາງ).
ຫວັງວ່າບົດຄວາມນີ້ຈະເປັນປະໂຫຍດແກ່ເພື່ອນຜູ້ອ່ານບໍ່ຫຼາຍກໍໜ້ອຍ ພ້ອມກັນນີ້ຍັງມີຄວາມເຊື່ອວ່າຖ້າໃຜປະພຶດແຕ່ເລື່ອງດີໆ ໃນໄລຍະປີໃໝ່ນີ້ ຈະເປັນສິລິມຸງຄຸນແກ່ຕົນເອງ ສົ່ງຜົນໃຫ້ສຸຂະພາບແຂງແຮງ, ຄອບຄົວອຸດົມສົມບູນ ແລະເສດຖະກິດຈະເລີນກ້າວໜ້າ.