ສຳນັກຂ່າວສານປະເທດລາວ ລາຍງານວ່າ ກະຊວງການເງິນ ເຜີຍແຜ່ວິໄນ 10 ຂໍ້ຫ້າມຕໍ່ພະນັກງານ-ລັດຖະກອນ ແຕ່ສູນກາງຮອດທ້ອງຖິ່ນຂອງຂະແໜງການເງິນໃຫ້ຮັບຮູ້ ແລະ ເຂົ້າໃຈຢ່າງເລີກເຊິ່ງໃນການປະຕິບັດໜ້າທີ່ຮັບໃຊ້ຜົນປະໂຫຍດລວມຂອງຊາດ ຖ້າອອກນອກກອບຈາກໃສ່ວິໄນ ແລະ ສຶກສາອົບຮົມທັນໂດຍບໍ່ລະເວັ້ນ ຂະນະທີ່ ລັດຖະບານພວມຜັນຂະຫຍາຍມາດຕະການປະຢັດ-ຕ້ານການຟູມເຟືອຍໄປຄວບຄູ່ກັບການເລັ່ງລັດປາບປາມການສໍ້ລາດບັງຫລວງທີ່ເປັນໄພຄຸກຄາມຕໍ່ປະເທດຊາດ.

ຫລ້າສຸດໃນວັນທີ 23 ມີນາ 2017, ກະຊວງການເງິນໄດ້ສໍາມະນາເຜີຍແຜ່(ຮ່າງ)ຂໍ້ຕົກລົງຂອງລັດຖະມົນຕີກະຊວງການເງິນ ວ່າດ້ວຍຂໍ້ຫ້າມ ແລະ ວິໄນ ຂອງພະນັກງານ-ລັດຖະກອນ ຂະແໜງການເງິນ ແລະ ຄົ້ນຄ້ວາປຶກສາຫາລືບົດແນະນໍາການຈັດຕັ້ງປະຕິບັດ ຄໍາສັ່ງຂອງນາຍົກລັດຖະມົນຕີ ເລກທີ 35/ນຍ, ລົງວັນທີ 06 ກັນຍາ 2007 ວ່າດ້ວຍການຫັນວຽກງານພາສີ, ສ່ວຍສາອາກອນ ແລະ ຄັງເງິນແຫ່ງຊາດ ລວມສູນຕາມສາຍຕັ້ງ ຂື້ນໂດຍກົງກັບກະຊວງການເງິນ ໂດຍໃຫ້ກຽດເປັນປະທານຂອງທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ຊື່ງມີ ບັນດາຫົວໜ້າກົມ, ຮອງກົມ, ຜູ້ຊ່ວຍວຽກຄະນະນໍາກະຊວງ, ຄະນະພະແນກອ້ອມຂ້າງກະຊວງການເງິນເຂົ້າ ຮ່ວມ.

ກອງປະຊຸມຄັ້ງນີ້ເພື່ອຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ຄວາມເປັນແບບຢ່າງຂອງພະນັກງານ-ລັດຖະກອນ, ສະກັດກັ້ນ, ຕ້ານພະຍາດອາດຍາສິດ ແລະ ປະກົດການຫຍໍ້ທໍ້ຕ່າງໆທີ່ເກີດຂື້ນໃນຂະແໜງການເງິນ.

ທ່ານ ບຸນໂຈມ ອຸບົນປະເສີດ ໄດ້ສະເໜີ ແລະ ເນັ້ນໜັກໃຫ້ພະນັກງານ-ລັດຖະກອນ ຂະແໜງການເງິນນັບແຕ່ສູນກາງຮອດທ້ອງຖິ່ນ ຈົ່ງຍົກສູງຄວາມຮັບຜິດຊອບຕໍ່ໜ້າທີ່ການເມືອງ, ຄວາມເປັນແບບຢ່າງຂອງພະນັກງານ-ລັດຖະກອນ, ສະກັດກັ້ນ, ຕ້ານພະຍາດອາດຍາສິດ ແລະ ປະກົດການຫບໍ້ທໍ້ຕ່າງໆທີ່ເກີດຂື້ນໃນຂະແໜງການເງິນ, ປະຕິບັດກົດໝາຍ ແລະ ລະບຽບການຢ່າງເຂັ້ມງວດ, ຄຸ້ມຄອງ, ປ້ອງກັນພະນັກງານລັດຖະກອນ ໃຫ້ມີລະບຽບວິໄນເຂັ້ມງວດ, ຮັກສາໄດ້ຈັນຍາບັນ ແລະ ນໍ້າໃຈຮັບໃຊ້ຊາດ ຮັບໃຊ້ປະຊາຊົນ, ຍົກສູງບົດບາດ ແລະ ຄວາມສາມາດຂອງພະນັກງານລັດຖະກອນຂະແໜງການເງິນ, ເພື່ອຮັບປະກັນໃຫ້ພະນັກງານ-ລັດຖະກອນກໍ່ຄືການຈັດຕັ້ງຂັ້ັນຕ່າງໆ ຂອງຂະແໜງການເງິນມີຄວາມໂປ່ງໃສ, ເຂັ້ມແຂງ, ໜັກແໜ້ນ, ເຂັ້ມງວດໃນການປະຕິບັດກົດໝາຍ ແລະ ລະບຽບການທີ່ກ່ຽວຂ້ອງ, ກະຊວງການເງິນຈື່ງໄດ້ອອກຂໍ້ຕົກລົງວ່າດ້ວຍຂໍ້ຫ້າມ ແລະ ວິໄນສໍາລັບພະນັກງານ-ລັດຖະກອນ ແຕ່ສູນກາງຮອດທ້ອງຖິ່ນຂອງຂະແໜງການເງິນ ມີຢູ່ 10 ຂໍ້ຫ້າມ ເປັນຕົ້ນ ຫ້າມສ້າງ ແລະ ລາຍງານຂໍ້ມູນທີ່ບໍ່ຖືກຕ້ອງ ຫຼືບໍ່ມີມູນຄວາມຈິງ, ສ້າງກຸ່ມກ້ອນ, ປັ່ນປ່ວນ, ແບ່ງແຍກຄວາມສາມັກຄີພາຍໃນກໍ່ໃຫ້ເກີດມີຄວາມເສຍຫາຍຕໍ່ການຈັດຕັ້ງຫຼືບຸກຄົນອື່ນ; ຫ້າມສົມຮູ້ຮ່ວມຄິດ, ປົກປ້ອງ, ເຊື່ອງອໍາການກະທໍາຜິດຂອງຜູ້ລະເມີດກົດໝາຍ ແລະ ລະບຽບການກ່ຽວກັບພາສີ, ສ່ວຍສາອາກອນ, ຊັບສິນຂອງລັດ ແລະ ກົດໝາຍ, ລະບຽບການອື່ນຂອງຂະ ແໜງການເງິນ, ຫ້າມປອມແປງເອກະສານ, ຖານຂໍ້ມູນ, ໃບຮັບ(ເກັບ)ເງິນອາກອນ, ພາສີ, ຊັບສິນ, ຄັງເງິນ ແລະ ອື່ນໆ; ຫ້າມນໍາໃຊ້ເອກະສານປອມເພື່ອຫາຜົນປະໂຫຍດສ່ວນຕົວ; ຫ້າມປົກປິດ, ສົມຮູ້ຮ່ວມຄິດເຊື່ອງອໍາຂໍ້ມູນ, ຫຼັກຖານຫຼືບົດລາຍງານການເງິນ, ຫ້າມສວຍໃຊ້ໜ້າທີ່ໃນການຕົກລົງ, ປອມແປງມາດຖານເຕັກນິກ, ບໍລິມາດ, ລາຄາຫົວໜ່ວຍ, ການປະມູນ, ການຈັດຊື້-ຈັດຈ້າງ, ສັນຍາສໍາປະທານ, ການຍັກຍອກ, ສໍ້ໂກງເອົາຊັບສິນເງິນຄໍາຂອງລັດ ແລະ ຍັງມີຂໍ້ຫ້າມອື່ນໆອີກນອກຈາກບັນດາຂໍ້ຫ້າມທີ່ກ່າວມາຂ້າງເທິງນັ້ນ ຖ້າຫາກພະນັກງານ-ລັດຖະກອນຂະແໜງການເງິນລະເມີດບັນດາຂໍ້ຫ້າມດັ່ງກ່າວຈະຖືກປະຕິບັດມາດຕະການລົງວິໄນຕາມລະບຽບການ ແລະ ກົດໝາຍຢ່າງເຂັ້ມງວດ.

ນອກນີ້ກອງປະຊຸມຍັງໄດ້ເຊື່ອມຊຶມ ຄໍາສັ່ງຂອງນາຍົກລັດຖະມົນຕີ ສະບັບເລກທີ 35/ນຍ ວ່າດ້ວຍການຫັນວຽກ ງານ ພາສີ, ສ່ວຍສາອາກອນ ແລະ ຄັງເງິນແຫ່ງຊາດ ລວມສູນສາຍຕັ້ງຂື້ນໂດຍກົງກັບກະຊວງການເງິນຊື່ງເຫັນໄດ້ວ່າ: ຜ່ານການຈັດຕັ້ງປະຕິບັດການຄຸ້ມຄອງວຽກງານພາສີ, ສ່ວຍສາອາກອນ ແລະ ຄັງເງິນແຫ່ງຊາດຂື້ນກັບກະຊວງການເງິນນັບແຕ່ປີ 2007 ເຖິງປັດຈຸບັນ  ແມ່ນມີຫລາຍດ້ານທີ່ພົ້ນເດັ່ນໃນຂະບວນການຈັດຕັ້ງຜັນຂະຫຍາຍ ວຽກງານດັ່ງກ່າວ, ມີຄວາມສອກຄ່ອງຕາມທິດຊີ້ນໍາຂອງກົມການເມືອງສູນກາງພັກ ແລະ ລັດຖະບານເຮັດໃຫ້ການຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດເຂົ້າສູ່ລະບົບລວມສູນເປັນເອກະພາບຕາມກົດໝາຍ ແລະ ລະບຽບການຕ່າງໆຂອງຂະແໜງການເງິນວາງອອກ. ຄຽງຄູ່ກັບບັນຫາທີ່ພົ້ນເດັ່ນນັ້ນ ກໍ່ຍັງມີຫລາຍບັນຫາທີ່ຄົງຄ້າງເປັນຕົ້ນແມ່ນ: ການສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານ-ລັດຖະກອນ ຍັງບໍ່ທັນເປັນລະບົບຄົບຊຸດ, ນິຕິກໍາລຸ່ມກົດໝາຍທີ່ກ່ຽວກັບການຄຸ້ມຄອງວຽກງານການເງິນຍັງບໍ່ທັນຄົບຖ້ວນ ຫຼື ບັນດານິຕິກໍາທີ່ມີຢູ່ແລ້ວຍັງບໍ່ທັນລະບຸຈະແຈ້ງໃນການຄຸ້ມຄອງສາມຂະແໜງສາຍຕັ້ງ, ການຈັດຕັ້ງຜັນຂະຫຍາຍບັນດາກົດ ໝາຍ, ນິຕິກໍາລຸ່ມກົດໝາຍທີ່ມີໃນປັດຈຸບັນຍັງບໍ່ທັນທົ່ວເຖິງ, ການປະສານສົົມທົບ ແລະ ການແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນ ໃນການຄຸ້ມຄອງ ສາມຂະແໜງສາຍຕັ້ງຍັງບໍ່ທັນຈະແຈ້ງ ແລະ ຊັດເຈນເທົ່າທີ່ຄວນຊື່ງບັນຫາດັ່ງກ່າວນັ້ນແມ່ນຈະໄດ້ຮັບການປັບປຸງແກ້ໄຂຕໍ່ໄປ.