ອີງຕາມການລາຍງານຂ່າວຂອງຫຼາຍສຳນັກໃນປະເທດໄທບອກວ່າ ມື້ວານນີ້, ວັນທີ 20 ມີນາ 2017 ພົນເອກ ປຣະວິດ ວົງສຸວັນ ຮອງນາຍົກລັດຖະມົນຕີ ແລະລັດຖະມົນຕີກະຊວງປ້ອງກັນປະເທດຂອງໄທ ຢືນຢັນວ່າຈະປະສານມາຍັງທາງການປະເທດລາວໃຫ້ຈັບໂຕ ໂກຕີ໋ ແກນນຳກຸ່ມການເມືອງຮາດຄໍໃນປະເທດໄທ ທີ່ຝ່າຍໄທຂ້ອນຂ້າງແນ່ໃຈວ່າຜູ້ກ່ຽວກຳລັງລີ້ໄພຢູ່ໃນ ສປປ ລາວ ສົ່ງໃຫ້ແກ່ທາງການໄທ.
ການຈະຂໍໃຫ້ລາວຊ່ວຍຈັບແລະສົ່ງໂຕ ໂກຕີ໋ ໃຫ້ໄທນັ້ນ ສືບເນື່ອງມາຈາກເມື່ອວັນທີ 18 ມີນາ 2017 ທີ່ຜ່ານມາ ເຈົ້າໜ້າທີ່ທະຫານແລະຕຳຫຼວດໄທ ໄດ້ບຸກເຂົ້າກວດຄົ້ນເຮືອນຫຼັງໜຶ່ງທີ່ເປັນຂອງ ໂກຕີ໋ ທີ່ຈັງຫວັດປະທຸມທານີ ໃກ້ນະຄອນຫຼວງບາງກອກ ປະເທດໄທ ແລະໄດ້ພົບເຫັນອາວຸດເສິກຈຳນວນຫຼວງຫຼາຍ.
ແນວໃດກໍຕາມ, ມາຮອດປັດຈຸບັນຍັງບໍ່ປາກົດຂ່າວວ່າ ທາງການລາວໄດ້ຮັບຈົດໝາຍຮ້ອງຂໍ ຈາກຝ່າຍປະເທດໄທໃນເລື່ອງດັ່ງກ່າວ ແລະກໍຍັງບໍ່ມີການຢືນຢັນຫຼືປະຕິເສດວ່າ ໂກຕີ໋ ລີ້ໄພຢູ່ໃນປະເທດລາວແທ້ຫຼືບໍ່ ຈາກຝ່າຍປະເທດລາວ.
