ສຳນັກຂ່າວເອເອຟພີລາຍງານຈາກ ສຳນັກຂ່າວເອຊີເອັນເອຂອງເກົາຫຼີເໜືອ ວ່າ ກອງທັບເກົາຫຼີເໜືອທົດລອງເຄື່ອງຈັກລູກສອນໄຟສະມັດຖະນະສູງຊະນິດໃໝ່ ສຳລັບຂີປະນາວຸດພິໄສໄກ ເຊິ່ງ ທ່ານ ກິມ ຈອງອຶນ ຜູ້ນຳສູງສຸດແຫ່ງເກົາຫຼີເໜືອ ກ່າວວ່າການທົດລອງດັ່ງກ່າວເປັນການຖືກຳເນີດຄັ້ງໃໝ່ຂອງອຸດສາຫະກຳລູກສອນໄຟເກົາຫຼີເໜືອ ແລະວ່າເຄື່ອງຈັກນີ້ຈະຊ່ວຍໃຫ້ເກົາຫຼີເໜືອປະສົບຄວາມສຳເລັດໃນການພັດທະນາຂີປະນາວຸດອານຸພາບສູງທຽບເທົ່າກັບຂີປະນາວຸດຊັ້ນນຳ.
ທ່ານ ກິມ ຈອງອຶນ ຍັງລະບຸອີກວ່າທົ່ວທັງໂລກຈະເປັນພະຍານເຖິງໄຊຊະນະຄັ້ງຍິ່ງໃຫຍ່ໃນການພັດທະນາຂີປະນາວຸດຂອງເກົາຫຼີເໜືອໃນໄວໆ ນີ້ ເຊິ່ງຜູ້ຊ່ຽວຊານການເມືອງວິເຄາະວ່າເປັນຄຳເຕືອນເຖິງປະເທດທີ່ຕໍ່ຕ້ານເກົາຫຼີເໜືອ. ຂະນະທີ່ໜັງສືພິມໂຣດອງຊິນມຸນສະເໜີຂ່າວຄວາມສຳເລັດໃນການທົດລອງເຄື່ອງຈັກ ລວມທັງເຜີຍແພ່ພາບຜູ້ນຳ ກິມ ຮ່ວມຊົມການທົດລອງເຄື່ອງຈັກ ຈາກນັ້ນພົບປະບັນດາເຈົ້າໜ້າທີ່ທະຫານ ແລະນັກວິທະຍາສາດ ທີ່ສູນພັດທະນາຂີປະນາວຸດ.
ການທົດລອງເຄື່ອງຈັກລູກສອນໄຟຂອງເກົາຫຼີເໜືອເກີດຂຶ້ນບໍ່ທໍ່ໃດຊົ່ວໂມງກ່ອນທີ່ ທ່ານ ເຣັກຊ໌ ທິວເລີສັນ ລັດຖະມົນຕີຕ່າງປະເທດສະຫະລັດອາເມລິກາ ຈະຫາລືກັບທ່ານ ສີ ຈິ້ນຜິງ ປະທານປະເທດຈີນ ລະຫວ່າງການຢ້ຽມຢາມ 3 ຊາດມະຫາອຳນາດອາຊີ ຄື ເກົາຫຼີໃຕ້, ຍີ່ປຸ່ນ ແລະຈີນ.
ແຫຼ່ງຂ່າວ: ມະຕິຊົນ