ພິທີລົງນາມຮັບການຊ່ວຍເຫຼືອລ້າ ຂອງລັດຖະບານຍີ່ປຸ່ນ ຈັດຂຶ້ນທີ່ກະຊວງສາທາລະນະສຸກ ໃນວັນທີ 1 ມີນາ 2017 ຜ່ານມາ ລະຫວ່າງທ່ານ ທາເຄຊິ ຮິຄິຮາຣະ ເອກອັກຄະລາຊະທູດຍີ່ປຸ່ນ ປະຈຳລາວ ແລະ ທ່ານ ແກ່ນຄຳ ຄຳພັນ ຫົວໜ້າຫ້ອງການສາທາລະນະສຸກ ເມືອງປາກອູ ແຂວງຫຼວງພະບາງ, ທ່ານ ບຸນເພັງ ສົມພັນສຸກ ຫົວໜ້າຫ້ອງການສາທາລະນະສຸກ ເມືອງຄຳ ແຂວງຊຽງຂວາງ, ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.
ໃນການຊ່ວຍເຫຼືອຄັ້ງນີ້ ລັດຖະບານຍີ່ປຸ່ນ ໃຫ້ການຊ່ວຍເຫຼືອລ້າ ຈຳນວນ 122.962 ໂດລາສະຫະລັດ ຫຼື ປະມານ 998 ລ້ານກີບ ໃຫ້ຂະແໜງສາທາລະນະສຸກ ຈຳນວນ 3 ໂຄງການ ຜ່ານໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGPs) ເຊິ່ງທັງສາມໂຄງການ ຈະເລີ່ມຈັດຕັ້ງປະຕິບັດພາຍຫຼັງທີ່ມີການເຊັນບົດບັນທຶກ
ໂຄງການທຳອິດ ແມ່ນການກໍ່ສ້າງນ້ຳລິນທີ່ບ້ານຫາດປາງ ເມືອງປາກອູ ແຂວງຫຼວງພະບາງ ມີ 1 ຫົວງານ ອ່າງລົດຄວາມດັນ 2 ອ່າງ ອ່າງເກັບນ້ຳ 2 ອ່າງ ທໍ່ສົ່ງນ້ຳຍາວ 5,6 ກິໂລແມັດ ແລະກ໋ອກນ້ຳ 2 ຫົວ ເຊິ່ງຈະມີຜູ້ໄດ້ຜົນປະໂຫຍດ 495 ຄົນ ລວມທັງນັກຮຽນມັດທະຍົມຫາດປາງ ຈຳນວນ 234 ຄົນ; ໂຄງການທີສອງ ແມ່ນການກໍ່ສ້າງລະບົບນ້ຳລິນໃຫ້ບ້ານສຳພັນໄຊ ເມືອງຄຳ ແຂວງຊຽງຂວາງ ມີ 1 ຫົວງານ ອ່າງເກັບນ້ຳ 1 ອ່າງ ທໍ່ສົ່ງຍາວ 5,4 ກິໂລແມັດ ແລະ ກ໋ອກນ້ຳ 7 ຫົວ ປະຊາຊົນທີ່ຈະໄດ້ຮັບຜົນປະໂຫຍດ 430 ຄົນ ແລະ ໂຄງການທີສາມ ແມ່ນໂຄງການກໍ່ສ້າງສຸກສາລາໃໝ່ 6 ຫ້ອງ ຫ້ອງນ້ຳ 1 ຫຼັງ. ນອກຈາກນີ້, ຍັງມີອຸປະກອນການແພດ ປະກອບໃຫ້ສຸກສາລານຳອີກ ເຊິ່ງຈະມີປະຊາຊົນຜູ້ໄດ້ຮັບຜົນປະໂຫຍດເຖິງ 2.925 ຄົນ ໃນຈຳນວນ 7 ບ້ານ.
ແຫຼ່ງຂ່າວ: ໜັງສືພິມ ວຽງຈັນໃໝ່