ຈາກລາຍງານທີ່ເວັບໄຊ໌ ເວັບໄຊອ໊ອດດິຕີ້ເຊັນທຣັລ ນຳມາສະໜີເມື່ອວັນທີ 1 ມີນາ 2017 ວ່າ ແອນເດຣສຊາ ລູກັສ ແລະ ລໍເຣນ ເມເນກອນ ນັກສຶກສາວິສະວະກຳອາຫານ 2 ຄົນ ຈາກມະຫາວິທະຍາໄລ ສະຫະພັນລັດຣິໂອແກຣນ ປະເທດ ບຣາຊິນ ໄດ້ພັດທະນາສູດການເຮັດແປ້ງຈາກແມງສາບ ທີ່ມີສ່ວນປະກອບເປັນໂປຣຕິນຫຼາຍກວ່າແປ້ງຈາກເຂົ້າສາລີປົກກະຕິເຖິງ 40% ແລະ ສາມາດນຳໄປໃຊ້ໃນການອົບຂະໜົມປັງ ຫຼື ອາຫານໄດ້ທຸກຊະນິດ ນອກຈາກນີ້ແມງສາບຍັງຸດົມໄປດ້ວຍກຣົດອະມິໂນທີ່ຈຳເປັນຫຼາຍຊະນິດ
ທີມວິໄຈລະບຸວ່າ ສາເຫດທີ່ເລືອກແມງສາບກໍ່ເພາະວ່າ ມັນມີໂປຣຕິນສູງຫຼາຍເກືອບ 70% ອີກທັງຍັງມີກຣົດອະມິໂນທີ່ຈຳເປັນຫຼາຍເຖິງ 8 ໃນ 9 ຊະນິດ ຮວມໄປເຖິງກຣົດໄຂມັນຄຸນນະພາບສູງເຊັ່ນ: ໂອເມກ້າ 3 ແລະ 9 ເຊິ່ງເຮົາສາມາດນຳມາໃຊ້ໄດ້ທັງໝົດເກືອບ 100% ມີເສດເຫຼືອຢູ່ໜ້ອຍຫຼາຍ ດ້ວຍແຫຼ່ງໂປຣຕິນທີ່ຄ່ອນຂ້າງອຸດົມສົມບູນແບບນີ້ ຈະຊ່ວຍເພີ່ມພູນສານອາຫານໃຫ້ກັບມະນຸດ ໂດຍສະເພາະຄົນທີ່ເປັນໂຣກຂາດສານອາຫານ
ທັງນີ້ຈາກການຄາດຄະເນຂອງຢູເອັນລະບຸວ່າ ໃນປີ 2050 ໂລກເຮົາຈະຂາດແຄນພື້ນທີ່ການຜະລິດອາຫານພຽງພໍຕໍ່ປະຊາກອນໂລກ ໃນກໍລະນີການລ້ຽງແມງສາບເປັນອາຫານນີ້ຈະເປັນຜົນດີ ເພາະໃຊ້ເນື້ອທີ່ຈຳກັດ ແລະ ຍັງບໍ່ສົ່ງຜົນກະທົບຕໍ່ສິ່ງແວດລ້ອມ ເນື່ອງຈາກໃຊ້ປະລິມານນ້ຳໜ້ອຍ ແລະ ປ່ອຍປະລິມານແກ໊ສເສຍທີ່ກໍ່ໃຫ້ເກີດບັນຫາໂລກຮ້ອນໄດ້ໜ້ອຍທີ່ສຸດ ນອກຈາກນີ້ ແມງສາບຍັງສາມາດໃຊ້ປະໂຫຍດໄດ້ໝົດທັງຕົວ ຕ່າງຈາກສັດໃຫຍ່ທີ່ມະນຸດບໍ່ສາມາດບໍລິໂພກໄດ້ທຸກສ່ວນ “ເຖິງແມ່ນວ່າແນວຄິດນີ້ໃນປັດຈຸບັນຍັງບໍ່ສາມາດນຳໃຊ້ໄດ້ ແຕ່ເຊື່ອວ່າໃນອານາຄົດແມ່ນຈະຕ້ອງຖືກນຳໄປໃຊ້ແນ່ນອນ”
ແຫລ່ງຂໍ້ມູນຈາກ: https://hilight.kapook.com/view/149883