ໂດຍປະຕິບັດຕາມນະໂຍບາຍ ສົ່ງລົດຫຼູຄືນເພື່ອປະມູນຂາຍ ແລ້ວຊື້ລົດໃໝ່ທີ່ຖືກກວ່າມາຮັບໃຊ້ ຂອງລັດຖະບານທີ່ໄດ້ປະກາດໄປ ໃນໄລຍະທີ່ຜ່ານມາ. ມາຮອດຕອນບ່າຍຂອງວັນທີ 28 ກຸມພາ 2017 ໄດ້ມີພິທີປະມູນແບບເປີດກວ້າງຂຶ້ນຢ່າງເປັນທາງການ ທີ່ຫໍປະຊຸມແຫ່ງຊາດ ມີນັກປະມູນແລະມວນຊົນເຂົ້າຮ່ວມຈຳນວນຫຼວງຫຼາຍ ສ້າງໃຫ້ມີບັນຍາກາດຄຶກຄື້ນມ່ວນຊື່ນພໍສົມຄວນ.
ຜົນການປະມູນເບື້ອງຕົ້ນ ໂດຍອີງຕາມການລາຍງານຂອງ ສຳນັກຂ່າວ ເສດຖະກິດ-ການຄ້າ ບອກວ່າ ເວລາ 16:30 ນາທີ ແມ່ນສຳເລັດການປະມູນໄປແລ້ວ 3 ຄັນ ເຊິ່ງເປັນລົດ BMW ລຸ້ນ 730 LI ໝາຍເລກທະບຽນ ກຜ 8893 ທີ່ເຄີຍເປັນລົດປະຈຳຕຳແໜ່ງ ທ່ານ ບຸນຍັງ ວໍລະຈິດ ເລຂາທິການໃຫຍ່ພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ. ຄັນທີ 2 ແມ່ນລົດ BENZ ລຸ້ນ S350 ເຄີຍນຳໃຊ້ເປັນລົດປະຈຳຕຳແໜ່ງທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ ຫົວໜ້າຄະນະຈັດຕັ້ງສູນກາງພັກ ແລະຄັນທີ 3 ແມ່ນລົດ BMW ລຸ້ນ 730 LI ເຄີຍນຳໃຊ້ເປັນລົດປະຈຳຕຳແໜ່ງ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ ລາຄາເລີ່ມຕົ້ນ 830 ລ້ານກີບ ແລະ ແມ່ນທ່ານ ທອງລິດ ກິ່ງແກ້ວອຸດົມ ນັກທຸລະກິດ ເປັນຜູ້ຊະນະການປະມູນໃນລາຄາ 1,330 ລ້ານກີບ.
ສ່ວນລາຍລະອຽດທັງໝົດຂອງການປະມູນ ທີມຂ່າວຈະສືບຕໍ່ນຳສະເໜີໃນໄລຍະຕໍ່ໄປ.
