ເວັບໄຊ ຂ່າວສົດ ລາຍງານເມື່ອວັນທີ 24 ກຸມພາ 2017 ວ່າ. ທີມ “ໝາຈິ້ງຈອກ” ເລສເຕີຣ ຊີຕີ້ ປະກາດປົດ “ເຄລາດິໂອ ຣານິເອຣີ່ ເຮດ” ຄູຝຶກຊາວອິຕາລຽນ ພົ້ນຈາກຕຳແໜ່ງຜູ້ຈັດການທີມເປັນທີ່ຮຽບຮ້ອຍແລ້ວ ຫຼັງຈາກທີ່ໄລຍະຫຼັງມານີ້ຜົນຂອງການແຂ່ງຂັນຖົດຖອຍຫຼົງຫຼາຍ ເສຍເຖິງ 5 ເກມຕິດຕໍ່ກັນ ແລະ ມີຄວາມສ່ຽງຕໍ່ການຕົກຊັ້ນ ເມື່ອປັດຈຸບັນຍັງຢູ່ໃນອັນດັບທີ 17 ຂອງຕາຕະລາງ ແລະ ມີແຕ້ມຫຼາຍກວ່າທີມໃນໂຊນຕົກຊັ້ນພຽງ 1 ຄະແນນເທົ່ານັ້ນ.

ຣານິເອຣີ່ ເຄີຍສ້າງປະຫວັດສາດອັນຍິ່ງໃຫຍ່ໂດຍການພາທີມ ເລສເຕີຣ ຊີຕີ້ ຄ້ວາແຊັມພຣີເມຍລີກ ສະໄໝທຳອິດມາຄອງໄດ້ສຳເລັດ ເມື່ອລະດູການທີ່ຜ່ານມາ ແຕ່ເລື່ອງດັ່ງກ່າວບໍ່ສາມາດຊ່ວຍໃຫ້ເຂົາລອດຕົວຈາກການຖືກປົດໄດ້ ເນື່ອງຈາກຜົນງານໃນປີນີ້ຕົກຕ່ຳເກີນໄປ

ໂດຍຖະແຫຼງການຂອງສະໂມສອນລະບຸວ່າ: “ຄະນະຜູ້ບໍລິຫານໃຫຍ່ຮູ້ສຶກບໍ່ພໍໃຈທີ່ຕ້ອງມີການປ່ຽນແປງຜູ້ນຳ ແລະ ຍອມຮັບວ່າເປັນເລື່ອງທີ່ເຈັບປວດ ແຕ່ເຖິງຢ່າງໃດກໍ່ຕ້ອງຈຳເປັນທີ່ຕ້ອງປ່ຽນເພື່ອທີມໃນຕອນນີ້”