ເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ແຂວງສະຫວັນນະເຂດໄດ້ເປີດເຜີຍໃນກາງເດືອນກຸມພານີ້ວ່າ ເຈົ້າໜ້າທີ່ໄດ້ຮັບຂ່າວວ່າມີ ຄົນບໍ່ດີຈຳນວນໜຶ່ງ ລັກລອບຄ້າ-ຂາຍຢາເສບຕິດຢູ່ເຂດ ບ້ານໄຊຍະມຸງຄຸນ ເມືອງອຸທຸມພອນ ແຂວງສະຫວັນນະເຂດ ຈຶ່ງໄດ້ແຕ່ງຕັ້ງເຈົ້າໜ້າທີ່ວິຊາສະເພາະລົງຕິດຕາມ ຈົນມາຮອດວັທີ 14 ກຸມພາ 2017 ຈຶ່ງໄດ້ຮູ້ວ່າມີການລັກລອບຊື້-ຂາຍຢາເສບຕິດແທ້ ຈຶ່ງໄດ້ນຳກຳລັງວິຊາສະເພາະສົມທົບ ກັບອຳນາດການປົກຄອງບ້ານ ເຂົ້າກວດຄົ້ນເຮືອນ ພ້ອມກັກຕົວເປົ້າໝາຍ ຊື່ວ່າທ້າວ ແກ້ວວິໄຊ ໂງ່ນກົງສາ ອາຍຸ 26 ປີ ຢູ່ບ້ານໄຊອຸດົມ ເມືອງອຸທຸມພອນ ແຂວງສະຫວັນນະເຂດ ພ້ອມກັບຢາບ້າ 1 ມັດ ເທົ່າກັບ 2.000 ເມັດ ແລະຢຶດລົດຈັກ 1 ຄັນພ້ອມກັບໂທລະສັບ 1 ໜ່ວຍ
ຈາກນັ້ນ ທ້າວແກ້ວວິໄຊ ໂງ່ນກົງສາ ໄດ້ສາລະພາບວ່າ ຜູ້ກ່ຽໄດ້ເລີ່ມເສບຢາບ້າຕັ້ງແຕ່ປີ 2014 ເສບມື້ລະ 1-2 ເມັດ ເຊິ່ງໄດ້ຊື້ນຳໄວໜຸ່ມພາຍໃນບ້ານ, ຕົກມາປີ 2016 ຜູ້ກ່ຽວໄດ້ເລີ່ມຄ້າ-ຂາຍຢາເສບຕິດ ເຊິ່ງຊື້ກັບຜູ້ຊາຍຄົນໜຶ່ງ ແຕ່ບໍ່ຮູ້ຊື່ ເປັນຈຳນວນຫຼາຍຄັ້ງ, ເຊິ່ງຊື້ຄັ້ງລະ 1 ມັດ ເທົ່າກັບ 2.000 ເມັດ ພາຍຫຼັງໄດ້ຢາບ້າ ກໍເອົາມາເສບຄັ້ງລະ 4-5 ເມັດ ສ່ວນທີ່ເຫຼືອ ແມ່ນເອົາໄປຂາຍໃຫ້ກັບໄວໜຸ່ມພາຍໃນບ້ານ. ມາຮອດວັນທີ 13 ກຸມພາ 2017 ຜູ້ກ່ຽວໄດ້ໄປຊື້ຢາບ້າ ກັບຊາຍຄົນໜຶ່ງ ຈຳນວນ 1 ມັດ ຫຼື 2.000 ເມັດ ກໍໄດ້ເອົາມາເຊື່ອງໄວ້ໃນເຮືອນ ແລະຕົກມາຮອດວັນທີ 14 ກຸມພາ 2017 ກໍໄດ້ມີລູກຄ້າໂທສັ່ງຊື້ຢາບ້າ ຈຳນວນ 1 ມັດ ໃຫ້ເອົາຢາໄປສົ່ງໃຫ້ ແຕ່ຜູ້ກ່ຽວບອກໃຫ້າເອົາຢູ່ເຮືອນ, ຕໍ່ມາເວລາ 13:00 ຂອງວັນດຽວກັນ ເຈົ້າໜ້າທີ່ໄດ້ເຂົ້າມາກວດຄົ້ນເຮືອນ ຈຶ່ງພົບຢາບ້າ 2.000 ເມັດທີ່ເຊື່ອງໄວ້ ຈຶ່ງຖືກຈັບຕົວມາດຳເນີນຄະດີ
ປະຈຸບັນ, ເຈົ້າໜ້າທີ່ໄດ້ສືບສວນ-ສອບສວນເພື່ອຂະຫຍາຍຜົນ ຕິດຕາມຊອກຫາຜູ້ເຂົ້າຮ່ວມມາລົງໂທດ ແລະສະຫຼຸບສຳນວນຄະດີສົ່ງໃຫ້ໄອຍະການດຳເນີນຄະດີຕາມຂັ້ນຕອນຂອງກົດໝາຍ
ແຫຼ່ງຂ່າວ: ໜັງສືພິມ ເສດຖະກິດ-ສັງຄົມ