ງານມະຫະກຳບຸນຊ້າງປະຈໍາປີ 2017 ໄດ້ຈັດຂຶ້ນດ້ວຍບັນຍາກາດຄືກຄື້ນແຕ່ວັນທີ 17-19 ກຸມພານີ້ທີ່ແຂວງໄຊຍະບູລີ, ໂດຍມີທ່ານນາຍົກລັດຖະມົນຕີ ທອງລຸນ ສີສຸລິດ ແລະ ພັນລະຍາ, ພ້ອມດ້ວຍແຂກທັງພາຍໃນ ແລະ ຕ່າງປະເທດ, ນັກທ່ອງທ່ຽວ ແລະ ມວນຊົນເຂົ້າຮ່ວມຢ່າງຫລວງຫລາຍ.
ງານມະຫະກຳບຸນຊ້າງປີນີ້, ໄດ້ມີຫລາຍກິດຈະກຳໜ້າສົນໃຈທີ່ສາມາດດຶງດູດນັກທ່ອງທ່ຽວ ແລະ ມວນຊົນເຂົ້າຮ່ວມຊົມໄດ້ເປັນຢ່າງດີ ເຊັ່ນ: ຂະບວນແຫ່ຊ້າງຈຳນວນ68 ເຊືອກ, ຂະບວນກ້ອນກຳລັງຈາກບັນດາເມືອງ, ການສະແດງຊ້າງຄຳຮູ້ 20 ກວ່າລາຍການ, ບາສີສູ່ຂວັນຊ້າງ,ສະ ແດງສີລະປະວັນນະຄະດີ, ມີຕະຫລາດນັດວາງສະແດງສິນຄ້າ ແລະ ຜະລິດຕະພັນກະສິກໍາຕ່າງໆທັງພາຍໃນ ແລະ ຕ່າງປະເທດ, ກິດຈະກຳຂີ່ຊ້າງຊົມເມືອງ, ຊົມວິທີປຸງແຕ່ງຜະລິດຕະພັນຊາ, ການເຜີຍແຜ່ຄວາມຮູ້ກ່ຽວກັບການອະນຸລັກຊ້າງລາວ, ຕັກບາດຖວາຍສັງຄະທານ, ງານປະກວດຊ້າງງາມປະຈຳປີ ແລະ ກິດຈກຳອື່ນໆ.
ທ່ານເຈົ້າແຂວງໄຊຍະບູລີ ຍັນຍົງ ສີປະເສີດ ໄດ້ກ່າວວ່າ: ການຈັດບຸນຊ້າງນີ້ເພື່ອເປັນການອານຸລັກຮັກສາຊ້າງ, ຊຶ່ງເປັນສັດຄູ່ບ້ານຄູ່ເມືອງທີ່ປະຊາຊົນລາວນັບຖື, ນອກຈາກນີ້ກໍເປັນການໂຄສະນາສົ່ງເສີມການທ່ອງທ່ຽວເພື່ອດຶງດູດໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຫຼາຍຂຶ້ນ. ຄະນະກໍາມະການຈັດງານບຸນດັ່ງກ່າວ ໃຫ້ຮູ້ວ່າ: ບຸນຊ້າງໄຊຍະບູລີໄດ້ມີມາແຕ່ເຫີງນານ, ໂດຍປະຕິບັດຕາມຄວາມເຊື້ອໃນຮີດຄອງປະເພນີທີ່ປະຊາຊົນລາວໄດ້ໃຊ້ຊີວິດຕິດພັນກັບຊ້າງຕະຫຼອດມາ, ຊຶ່ງເຂົາເຈົ້າຖືວ່າຊ້າງເປັນໜຶ່ງໃນສະມາຊິກຄອບຄົວ, ສະນັ້ນເຈົ້າຂອງເຮືອນ ແລະ ເຈົ້າວົງຕະກຸນທີ່ມີຊ້າງຈຶ່ງໄດ້ພ້ອມພາກັນເຮັດບຸນຊ້າງ ເພື່ອສຳມາຄາລະວະຕໍ່ຊ້າງຄືຜູ້ທີ່ມີບຸນຄຸນຕໍ່ເຂົາເຈົ້າ,ຊຶ່ງຮີດຄອງດັ່ງກ່າວໄດ້ສືບທອດກັນມາຫລາຍເຊັ່ນຄົນຈົນເຖິງປັດຈຸບັນ.
ເນື້ອໃນຂ່າວຈາກ: ໜັງສືພິມລາວພັດທະນາ