ເວັບໄຊ ໜັງສືພິມປະຊາຊົນ ລາຍງານຄັ້ງວັນທີ 16 ກຸມພານີ້ວ່າ ທີ່ອົງການກວດສອບແຫ່ງລັດ ໄດ້ມີພິທີປະກາດແຕ່ງຕັ້ງ ທ່ານ ບຸນປອນ ວັນນະສີ ແລະ ທ່ານ ບຸນເລີດ ເທບວົງສາ ເປັນຮອງປະທານອົງການກວດສອບແຫ່ງລັດ ໃນວັນທີ 15 ກຸມພາຜ່ານມາ ພາຍໃຕ້ການເຂົ້າຮ່ວມຂອງ ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ, ທ່ານ ນາງ ວຽງທອງ ສີພັນດອນ ປະ ທານອົງການກວດສອບແຫ່ງລັດ ແລະ ພາກສ່ວນກ່ຽວຂ້ອງ ເຂົ້າຮ່ວມນຳ.
ທ່ານ ນາງ ສີໃສ ລືເດດມູນສອນ ໄດ້ໃຫ້ກຽດໂອ້ລົມ ແລະ ໄດ້ສະແດງຄວາມຍ້ອງຍໍຊົມເຊີຍ ຕໍ່ພະນັກງານການນຳທີ່ໄດ້ຮັບການແຕ່ງຕັ້ງ ເປັນຮອງປະທານອົງການກວດສອບແຫ່ງລັດ 2 ທ່ານຄັ້ງນີ້ ຊຶ່ງແມ່ນການປັບປຸງການຈັດຕັ້ງຂອງ ອົງການກວດສອບແຫ່ງລັດ ໃຫ້ມີຄວາມເຂັ້ມແຂງ, ຄົບຊຸດເປັນກ້າວໆ ແລະ ມີຖັນແຖວພະນັກງານທີ່ເຕີບໃຫຍ່ ແລະ ມີລະດັບວິຊາສະເພາະ ນັບມື້ນັບສູງຂຶ້ນ, ສາມາດເຄື່ອນໄຫວວຽກງານວິຊາສະເພາະ ຕາມຄວາມຮຽກຮ້ອງຕ້ອງການ ຂອງໜ້າທີ່ວຽກງານໃນແຕ່ລະໄລຍະ ສາມາດປະຕິບັດໜ້າທີ່ວຽກງານກວດສອບ ໃຫ້ມີຄຸນນະພາບ, ມີມາດຕະຖານ, ມີຄວາມໂປ່ງໃສ ແລະ ເປັນກຳລັງແຮງຊຸກດັນ, ສ້າງບຸກຄະລາກອນ ໃຫ້ມີຄວາມຮູ້ຄວາມສາມາດ, ມີຄວາມຮັບຜິດຊອບ ເຮັດໃຫ້ວຽກງານຄຸ້ມຄອງລັດ, ຄຸ້ມຄອງຫົວໜ່ວຍງົບປະມານແຫ່ງ ລັດ ໃນການນຳໃຊ້ງົບປະມານ ແຫ່ງລັດມີປະສິດທິພາບ ແລະ ປະສິດທິຜົນ, ຮັບປະກັນຄຸນນະພາບເຮັດໃຫ້ການພັດທະນາເສດຖະກິດ-ສັງຄົມ ແລະ ພື້ນຖານໂຄງລ່າງດີຂຶ້ນ ຕາມຄວາມຮຽກຮ້ອງຕ້ອງການ, ເປັນເຈົ້າການໃນການປະຕິບັດລະບຽບກົດໝາຍຢ່າງເຂັ້ມງວດ ແລະ ສ້າງສະຕິຕື່ນຕົວໃຫ້ສັງຄົມ ໄດ້ມີຄວາມຮັບຜິດຊອບຢ່າງຕັ້ງໜ້າ ເພື່ອເຮັດໃຫ້ອົງການກວດສອບແຫ່ງລັດມີການເຕີບໃຫຍ່ຂະຫຍາຍຕົວ ແລະ ເຂັ້ມແຂງຂຶ້ນໄປເລື້ອຍໆ.
ແຫລ່ງຂ່າວ: ປະຊາຊົນ