ຫວ່າງບໍ່ດົນມານີ້, ເຈົ້າໜ້າທີ່ຕຳຫຼວດ ປກສ ເມືອງໄຊ, ແຂວງອຸດົມໄຊ, ໄດ້ນໍາກໍາລັງເຂົ້າກວດຄົ້ນເຮືອນເປົ້າໝາຍຢາເສບຕິດທີ່ອັນຕະລາຍຫລັງໜຶ່ງ ຢູ່ທີ່ບ້ານໂຮມສຸກ ແລະສາມາດຈັບຕົວເຄືອຂ່າຍຜູ້ຜະລິດຢາບ້າ ໄດ້ສອງຄົນຄື: ທ້າວ ຊາຍເຊີ ອາຍຸ 58 ປີ ແລະ ທ້າວ ຄຳແພງ ອາຍຸ 33 ປີ, ພ້ອມກັບຂອງກາງ ຢາບ້າຈຳນວນ 1.446 ເມັດ, ແປ້ງຝຸ່ນຫົວເຊື້ອ ເພື່ອຜະລິດຢາບ້າສີຂາວ, ສີແດງ, ສີບົວ, ສີຂຽວ, ສີຕັບໝູ ແລະຖົງຢາງບັນຈຸຢາບ້າ ຈໍານວນໜຶ່ງ, ພ້ອມອຸປະກອນ ສໍາລັບສະລັກ ເຄື່ອງໝາຍໃສ່ຢາບ້າ 12 ອັນ ພ້ອມຕາຊັ່ງຝິ່ນ 1 ອັນ, ເຈົ້າໜ້າທີ່ຕຳຫຼວດ ຈຶ່ງໄດ້ຢຶດໄວ້ເປັນຫລັກຖານ ເພື່ອດໍາເນີນຄະດີຕາມລະບຽບກົດໝາຍ.

ທາງເຈົ້າໜ້າທີ່ໃຫ້ຮູ້ອີກວ່າ: ການມ້າງເຄື່ອຂ່າຍແຫລ່ງຜະລິດຢາເສບຕິດອັນຕະລາຍຄັ້ງນີ້ ແມ່ນໄດ້ຮັບລາຍງານຈາກພົນລະເມືອງດີ ວ່າເຮືອນຫລັງດັ່ງກ່າວ ໄດ້ມີການລັກລອບເຄື່ອນໄຫວຜະລິດ ແລະ ຈໍາໜ່າຍຢາເສບຕິດຢ່າງຕໍ່ເນື່ອງ.

ແຫຼ່ງຂ່າວ: ໜັງສືພິມ ລາວພັດທະນາ