ບັນເທີງຕ່າງແດນມື້ນີ້ ແອັດມີຂ່າວຄາວຂອງສາວ ເລດີ ກາກ້າ ມາຝາກແຟນໆ ຖ້າຂຶ້ນຊື່ເລື່ອງໂຊລທີ່ເຮັດໃຫ້ຄົນເບິ່ງຕ້ອງລະທຶກຫວາດສຽວຕື່ນເຕັ້ນຈົນອ້າປາກຄ້າງ ຕ້ອງຍົກໃຫ້ນັກຮ້ອງສາວ ໄວອາຍຸ 30 ປີຄົນນີ້ ເລດີ ກາກ້າ ຕົວແມ່ແຫ່ງວົງການດົນຕີ ເມື່ອວັນທີ 5 ກຸມພາ 2017 ທີ່ຜ່ານມາ ນາງໄດ້ຮັບເຊີນສະແດງຄອນເສີດໃນຊ່ວງພັກເວລາ ໃນເສິກອາເມລິກັນຟຸດບອລເອັມເອຟແອລ ລາຍການແຂ່ງຂັນກິລາທີ່ສຳຄັນ ເຊິ່ງມີການຖ່າຍທອດສົດທາງໂທລະພາບ ແລະ ມີຈຳນວນຄົນເບິ່ງໃນແຕ່ລະປີບໍ່ຕ່ຳກວ່າ 100 ລ້ານຄົນ ໂດຍຈັດຂຶ້ນໃນສະໜາມ ເອັນອາຣຈີ ສະເຕດຽມ ເມືອງ ອຸສຕັນ ລັດເທກຊັສ
ການສະແດງຄອນເສີດຂັ້ນເວລາພັກຂອງ ເລດີ ກາກ້າ ທີ່ຂຶ້ນໂຊລໃນ “ຊູເປີໂບລ ຮາຟໄທມ໌ ໂຊລ ຄັ້ງທີ 51” ພຽງ 12 ນາທີ ແຕ່ນາງກໍ່ທຸ້ມສຸດຕົວ ງານນີ້ນາງລົງທຶນໂຫນສະລິງຮ້ອງເພງ ເຊິ່ງມີຄວາມສູງເຖິງ 79 ແມັດ ກ່ອນທີ່ຈະລອຍຕົວລົງມາຮ້ອງເພງທ່າມກາງດາວເຕັ້ນດ້ານລຸ່ມກວ່າ 40 ຊີວິດ ຈົນຮຽກສຽງຮືຮາໃຫ້ຄົນເບິ່ງທັງສະໜາມເລີຍ
ເຫັນແບບນີ້ແລ້ວແອັດພໍເຂົ້າໃຈວ່າເປັນຫຍັງນາງຈິ່ງໂດ່ງດັງໄປທົ່ວໂລກ ເພາະນາງສຸກໆກັບທຸກສິ່ງທີ່ນາງເຮັດແທ້ໆ
