ຍຸກນີ້ເປັນຍຸກແຫ່ງຄາຄອງຊີບແພງ ຫຼາຍຄອບຄົວມັກພົບກັບບັນຫາລາຍຈ່າຍຫຼາຍກວ່າລາຍຮັບ ມີເງິນບໍ່ພໍໃຊ້ຈ່າຍ ຂະໜາດຄົນໂສດຍັງບໍ່ສ້າງຄອບຄົວບາງຄົນກໍ່ຍັງເອົາຕົວເກືອບບໍ່ລອດກັບລາຍຈ່າຍໃນແຕ່ລະເດືອນ ສຳລັບຄົນມີຄອບຄົວເປັນພໍ່ແມ່ຄົນແລ້ວ ແຮງເປັນບັນຫາກຸ້ມໃຈໂດຍສະເພາະຄົນທີ່ມີລູກນ້ອຍມີລາຍຈ່າຍບໍ່ຈັກຄ່ານົມ, ຄ້າຜ້າອ້ອມ, ຄ່າຂອງຫຼິ້ນ ແລະ ອື່ນໆ ສາລະພັດ ໃນຄໍລຳ ແມ່ ແລະ ລູກມື້ນີ້ ແອັດເລີຍມີເຄັດລັບການລ້ຽງລູກຢ່າງປະຢັດມານຳສະເໜີ ເຊິ່ງຈະມີວິທີໃດແນ່ນັ້ນ ເຮົາມາອ່ານພ້ອມກັນເລີຍ

1. ໃນໄລຍະລູກໄດ້ອາຍຸ ພຽງ 1 ມື້ ຫາ 1 ປີ ຄວນລ້ຽງລູກດ້ວຍນົມແມ່ເປັນຫຼັກ ເຊິ່ງຈະປະຢັດລາຍຈ່າຍກວ່າໃຫ້ລູກກິນນົມຜົງຕັ້ງແຕ່ເກີດ
2. ໃຊ້ຜ້າອ້ອມສຳເລັດຮູບໃນຍາມທີ່ພາລູກນ້ອຍອອກໄປນອກເຮືອນ ເຊັ່ນ: ໄປຊັກວັກຊີນ, ໄປພົບຍາດພີ່ນ້ອງ, ໄປທ່ຽວກັບພໍ່ແມ່ ຫຼື ເວລານອນເທົ່ານັ້ນ ສ່ວນຢູ່ເຮືອນທຳມະດາກໍ່ໃຫ້ໃຊ້ພຽງຜ້າອ້ອມແພທຳມະດາ ກໍ່ພໍແລ້ວ
3. ພະຍາຍາມໃຊ້ຜ້າເຊັດໜ້າ ແທນການໃຊ້ເຈ້ຍທິດຊູຊະນິດເປືອກເຮັດເຊັດຄວາມສະອາດໃຫ້ລູກ
4. ຕອນລູກຍັງນ້ອຍ ສຳລັບຂອງຫຼິ້ນພໍ່ແມ່ຄວນນຳຂອງທີ່ມີຢູ່ມາປະຢຸກໃຊ້ໃຫ້ເປັນຂອງຫຼິ້ນ ເມື່ອຄົນໃນສະໃໝ່ກ່ອນເຮັດໃຫ້ລູກຫຼິ້ນ ວິທີນີ້ນອກຈາກຈະຊ່ວຍໃຫ້ປະຢັດລາຍຈ່າຍໄດ້ແລ້ວ ຍັງຊ່ວຍຮັກສາຂອງຫຼິ້ນເກົ່າແກ່ບໍ່ໃຫ້ສູນຫາຍໄປອີກດ້ວຍ
5. ຊື້ວັດຖຸສິ່ງຂອງທີ່ຄິດວ່າຈຳເປັນທີ່ສຸດໃຫ້ລູກເທົ່ານັ້ນ
6. ພະຍາຍາມໃຫ້ລູກກິນອາຫານທີ່ມີປະໂຫຍດ ແລະ ກິນສະອາດ, ຢູ່ສະອາດ ສະເໝີ ລູກຈິ່ງໄດ້ມີສຸຂະພາບແຂງແຮງບໍ່ເຈັບປ່ວຍງ່າຍ

ພຽງສິ່ງເລັກໜ້ອຍທີ່ກ່າວມາຂ້າງເທິງນີ້ກໍ່ຈະຊ່ວຍໃຫ້ທ່ານສາມາດປະຢັດລາຍຈ່າຍບາງສ່ວນອອກໄປໄດ້ແລ້ວ.