ຕາມການໃຫ້ສຳພາດຂອງ ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ທັງເປັນຮອງປະທານຈັດງານມະຫະກຳບຸນຊ້າງປີ 2017 ວ່າ: ການຈັດງານມະຫະກຳບຸນຊ້າງປີນີ້ ຈະມີຄວາມແຕກຕ່າງຈາກປີກາຍ ເຊິ່ງຈະເລັ່ງໃສ່ກິດຈະກຳຂອງຊ້າງເປັນຫຼັກ ເຊິ່ງຈະມີການສະແດງຂອງຊ້າງຄຳຮູ້ຮອດ 21 ລາຍການຄື: ຊ້າງຄຳຮູ້ ຈັບປ້າຍຊົມເຊີຍງານມະຫາກຳບຸນຊ້າງ ປະຈຳປີ 2017, ຊ້າງຈັບທຸງຊາດຍ່າງອອກໜ້າຂະບວນແຫ່, ຊ້າງຕີກອງ, ຊ້າງຢືນລຽນແຖວເພື່ອຄຳນັບແຂກ ແລະປະຕິບັດທ່າພື້ນຖານຕາມຄຳສັ່ງຂອງຄວານຊ້າງ, ຊ້າງຊັກທຸງຊາດຂຶ້ນເສົາ, ຊ້າງດຶງເຊືອກກັບຄົນ, ຊ້າງແຕ້ມຮູບ, ຊ້າງເຕະບານ, ຊ້າງແລ່ນແຂ່ງກັນ, ຊ້າງເຂົ້າເຄື່ອນ, ຊ້າງໃສ່ໝວກໃຫ້ຄົນ, ຊ້າງມອບຊໍ່ດອກໄມ້, ຊ້າງແກວ່ງບ້ວງ, ຄົນຂີ່ງວງຊ້າງ, ຊ້າງຟ້ອນໃສ່ແຄນ, ຊ້າງຕັ້ງຫົວຜັກທຽມ, ຊ້າງຍົກ 2 ຂາຂຶ້ນ, ຊ້າງນັ່ງຍົກສອງຂາໜ້າຫັນໜ້າເຂົ້າຫາກັນ, ຊ້າງເປົ່າແຄນ, ຊ້າງ 2 ໂຕຈັບບ້ວງໃຫ້ຄົນນັ່ງທາງກາງ ແລະຊ້າງຢືນລຽນແຖວຂອບໃຈແຂກ.

ນອກຈາກນີ້, ຍັງມີຂະບວນການແຫ່ຂອງກ້ອນກຳລັງຕ່າງໆເຊັ່ນ: ຂະບວນແຫ່ປ້າຍງານມະຫະກຳບຸນຊ້າງ, ໂລໂກ້ທ່ອງທ່ຽວ, ໂລໂກ້ບຸນຊ້າງ, ຂະບວນຕາງໜ້າ 8 ເຜົ່າ, ຂະບວນເຍົາວະຊົນ, ຊາວໜຸ່ມ, ນັກຮຽນ-ນັກສຶກສາ, ປ້າຍຍິນດີຕ້ອນຮັບສູ່ງານມະຫາກຳບຸນຊ້າງ, ຊະບວນຊ້າງ68 ເຊືອກ ປະສານສຽງເປົ່າສະໄນ ແລະຊົມການສະແດງສິລະປະຂອງ 8 ຊົນເຜົ່າ

ສຳລັບງານມະຫະກຳບຸນຊ້າງ ຂອງແຂວງໄຊຍະບູລີປີນີ້ ຈະເປີດຂຶ້ນຢ່າງເປັນທາງການ ໃນວັນທີ 18 ກຸມພາ 2017 ແລະປິດວັນທີ 19 ກຸມພາ 2017 ສ່ວນກິດຈະກຳຕ່າງໆຈະເລີ່ມຈັດຂຶ້ນໃນມື້ນີ້ ວັນທີ 13 ກຸມພາ 2017 ເປັນຕົ້ນໄປ

ແຫຼ່ງຂ່າວ: ເສດຖະກິດ-ການຄ້າ