ໃນວັນທີ 8 ກຸມພາ 2017 ຜ່ານມາ ທີ່ກະຊວງສາທາລະນະສຸກ ໄດ້ມີພິທີເຊັນສັນຍາແຜນງົບປະມານ ປະຈຳປີ 2017 ລະຫວ່າງກະຊວງສາທາລະນະສຸກ ແລະ ອົງການອະນາໄມໂລກ ເພື່ອໝູນໃຊ້ທຶນຈຳນວນກວ່າ 2,1 ລ້ານໂດລາສະຫະລັດ ຫຼື ປະມານ 175 ຕື້ກີບ ເຂົ້າໃນການພັດທະນາວຽກງານສາທາລະນະສຸກຮ່ວມລົງນາມຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ທ່ານນາງ Juliet Fleishl ຜູ້ຕາງໜ້າອົງການອະນາໄມໂລກ ປະຈຳລາວ ເຊິ່ງມີພະນັກງານ-ວິຊາການກ່ຽວຂ້ອງເຂົ້າຮ່ວມ.
ສຳລັບທຶນຈຳນວນດັ່ງກ່າວ ທີ່ໄດ້ຮັບໂດຍກົງຈາກອົງການອະນາໄມໂລກຄັ້ງນີ້ ຈະນຳໃຊ້ເຂົ້າໃນການພັດທະນາຂະແໜງສາທາລະນະສຸກ ໂດຍສະເພາະແມ່ນ ການເລັ່ງໃສ່ການປ້ອງກັນ ແລະ ເຝົ້າລະວັງພະຍາດຕິດຕໍ່ ການຕອບໂຕ້ພະຍາດລະບາດ ແລະ ວຽກງານຮັກສາສຸຂະພາບແມ່ ແລະ ເດັກ ຢູ່ບັນດາແຂວງເປົ້າໝາຍ ແລະ ຊຸມຊົນຫ່າງໄກສອກຫຼີກ ລວມໄປເຖິງການສ້າງຄວາມເຂັ້ມແຂງໃນລະບົບສາທາລະນະສຸກ ເປັນຕົ້ນແມ່ນ ການພັດທະນາຊັບພະຍາກອນມະນຸດ ການຈັດຕັ້ງຄັງປະກັນສຸຂະພາບທຸກທົ່ວໜ້າ ການສ້າງຄວາມເຂັ້ມແຂງທາງດ້ານຂໍ້ມູນ-ຂ່າວສານ ຈັດຕັ້ງເຝິກອົບຮົມ ການບໍລິຫານຄຸ້ມຄອງວຽກງານສາທາ ແລະ ອື່ນໆ ເພື່ອປະກອບສ່ວນເຂົ້າໃນການຈັດຕັ້ງປະຕິບັດແຜນການ 5 ປີ ຄັ້ງທີ 8 ຂອງການພັດທະນາວຽກງານດັ່ງກ່າວ ໃຫ້ມີຄວາມເຂັ້ມແຂງ ມີປະສິດທິຜົນ ແລະ ບັນລຸເປົ້າໝາຍ MDGs ບົນພື້ນຖານການວາງແຜນທີ່ດີ ໃຫ້ປາກົດຜົນເປັນຈິງເທື່ອລະກ້າວ.
ແຫຼ່ງຂ່າວ: ໜັງສືພິມ ວຽງຈັນໃໝ່