ຂປລ. ຕາມທິດທາງ, ໜ້າທີ ແລະ ຄາດໝາຍ ໃນແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII (2016-2020) ຮັບປະກັນໃຫ້ ເສດຖະກິດເຕີບໂຕ ຕາມທິດສີຂຽວ ແລະ ຍືນຍົງ, ໂດຍໃຫ້ບັນດາ ກະຊວງ-ອົງການ ທຽບເທົ່າກະຊວງ ແລະ ທ້ອງຖິ່ນ ສຸມໃສ່ສ້າງແຜນພັດທະນາ ເສດຖະກິດ-ສັງຄົມ ຂອງຕົນ ໃຫ້ແທດເໝາະກັບຕົວຈິງ.
ເພື່ອເຮັດໃຫ້ ແຜນການດັ່ງກ່າວ, ບັນລຸຕາມເປົ້າໝາຍທີ່ວາງໄວ້ ນາຍົກລັດຖະມົນຕີ ແຫ່ງ ສປປ ລາວ ໄດ້ມີຄຳເຫັນຊີ້ນຳ ໂດຍມອບໃຫ້ ບັນດາກະຊວງ-ອົງການ ທຽບເທົ່າກະຊວງ ແລະ ທ້ອງຖິ່ນ ຕ້ອງສູ້ຊົນເຮັດໃຫ້ ລວມຍອດຜະລິດຕະພັນພາຍໃນ (GDP) ເພີ່ມຂຶ້ນບໍ່ຫລຸດ 7,5%, ຄຸ້ມຄອງເງິນເຟີ້ ໃຫ້ຕ່ຳກວ່າ 5%, ຄຸ້ມຄອງອັດຕາແລກປ່ຽນ ໃຫ້ສົມເຫດສົມຜົນ ແລະ ຮັບປະກັນ ສະຖຽນລະພາບ, ເກັບລາຍຮັບງົບປະມານລວມ ໃຫ້ໄດ້ຢ່າງໜອ້ຍ 19,6% ຂອງ GDP, ໃນນີ້ ສູ້ຊົນເກັບລາຍຮັບພາຍໃນ ໃຫ້ໄດ້ 17% ຂອງ GDP, ລາຍຈາຍບໍ່ໃຫ້ເກີນ 25,4% ຂອງ GDP ແລະ ການຂາດດຸນລວມບໍ່ໃຫ້ເກີນ 5,9% ຂອງ GDP, ຊຸກຍູ້ການສົ່ງອອກສິນຄ້າ ໃຫ້ເພີ່ມຂຶ້ນຢ່າງໜ້ອຍ 15%, ສູ້ຊົນເຮັດໃຫ້ ແຜນລາຍຮັບມີທ່າອ່ຽງເພີ່ມຂຶ້ນ ຕາມການຂະຫຍາຍຕົວ ຂອງເສດຖະກິດ, ຄາດໝາຍລາຍຮັບທັງໝົດ (ລວມລາຍຮັບ ຈາກການຊ່ວຍເຫລືອລ້າ) ຕ້ອງສູ້ຊົນໃຫ້ໄດ້ 25.491 ຕື້ກີບ ໃນນັ້ນລາຍຮັບພາຍໃນ ບໍ່ໃຫ້ຫລຸດ 22.020 ຕື້ກີບ, ການສ້າງແຜນລາຍຈ່າຍ ງົບປະມານແຫ່ງລັດ ໃຫ້ອີງໃສ່ຄວາມອາດສາມາດ ເກັບລາຍຮັບຕົວຈິງ, ຈັດສັນແຜນລາຍຈ່າຍງົບປະມານ ໃຫ້ໄປຕາມແຜນວຽກບູລິມະສິດ ຂອງແຕ່ລະ ຂະແໜງການ ດ້ວຍການປະຢັດ ແລະ ຕ້ານການຟູມເຟືອຍ ຢ່າງເຄັ່ງຄັດ ເພື່ອໃຫ້ມີ ສ່ວນສະສົມແຮໄວ້, ຮັບປະກັນ ລາຍຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍໃຫ້ພຽງພໍ, ລາຍຈ່າຍບໍລິຫານ ຕ້ອງຮັບປະກັນ ການເຄື່ອນໄຫວວຽກງານ ຂອງກົງຈັກລັດ ໃຫ້ເປັນປົກກະຕິ, ຈຳກັດລາຍຈ່າຍຊື້ໃໝ່, ລາຍຈ່າຍດັດສົມ ແລະ ສົ່ງເສີມຕ້ອງໄປຕາມແຜນວຽກ, ແຜນງານຢ່າງມີຈຸດສຸມ, ລາຍຈ່າຍເງິນແຮ ລັດຖະບານ ແລະ ເງິນແຮທ້ອງຖິ່ນ ໃຫ້ນຳໃຊ້ເຂົ້າໃນ ລາຍຈ່າຍບັງເອີນ ແລະ ຮີບດ່ວນ ເປັນຕົ້ນ ວຽກງານປ້ອງກັນຊາດ-ປ້ອງກັນຄວາມສະຫງົບ, ໄພທຳມະຊາດ ແລະ ພະຍາດລະບາດ. ສືບຕໍ່ຊຳລະໜີ້ສິນ ໃຫ້ໄປຕາມສັນຍາຜູກພັນ ເຊິ່ງຄາດໝາຍລາຍຈ່າຍງົບປະມານ ໃນປີ 2017 ນີ້ ບໍ່ໃຫ້ເກີນ 33.150 ຕື້ກີບ.
ເພື່ອຮັບປະກັນ ໃຫ້ເສດຖະກິດ ຂະຫຍາຍຕົວຢ່າງໜ້ອຍ 7,5% ມີຄວາມຕ້ອງການລົງທຶນ ທັງໝົດໃນການພັດທະນາ ເສດຖະກິດ-ສັງຄົມ ໃຫ້ຢູ່ໃນຂອບ 30-35% ຂອງ GDP ໃນນັ້ນການລົງທຶນ ຂອງລັດກວມ 25% ໃນນີ້ ງົບປະມານພາຍໃນ 4.300 ຕື້ກີບ (ກວມ11%) ແລະ ທຶນຊ່ວຍເຫລືອທາງການ ເພື່ອການພັດທະນາ ບໍ່ໃຫ້ຫລຸດ 5.600 ຕື້ກີບ (ກວມ 14%), ສົ່ງເສີມການລົງທຶນພາຍໃນ, ທຶນສັງຄົມ ແລະ ຕ່າງປະເທດ ໃຫ້ໄດ້ 21.420 ຕື້ກີບ (ກວມ55%) ແລະ ການລົງທຶນຈາກລະບົບການເງິນ, ເງິນຕາ 7.800 ຕືກີບ (ກວມ 20%) ຂອງການລົງທຶນ ລວມທັງໝົດ.
ແຫລ່ງຂ່າວ:
