ສຳນັກຂ່າວຕ່າງປະເທດ ລາຍງານໃນວັນທີ 6 ກຸມພາຜ່ານມານີ້ວ່າ ເຈົ້າໜ້າທີ່ຕຳຫລວດມຽນມາ ໄດ້ອອກມາເປີດເຜີຍລະບຸ ໄດ້ຈັບກຸມພຣະອາສະຣາ ພະສົງຊາວມຽນມາ ພາຍຫລັງທີ່ກວດຄົ້ນລົດເກັງພົບຢາບ້າ ຈຳນວນ 400,000​ ເມັດ ໃນຂະນະທີ່ພຣະດັ່ງກ່າວກຳລັງຂັບອອກຈາກບ້ານສ່ວຍບາໂຮ ເມືອງໝ່ອງດໍ ລັດຍະໄຂ່,  ພາຍຫລັງໄດ້ມີການກວດຄົ້ນພາຍໃນວັດຂອງພຣະອາສະຣາ ເຈົ້າໜ້າທີ່ຕຳຫລວດຍັງພົບຢາບ້າອີກ ຈຳນວນ 4.2​ ລ້ານເມັດ.

ທັງນີ້ ມຽນມາເປັນໜຶ່ງໃນປະເທດຜູ້ຜະລິດຢາເສບຕິດລາຍໃຫຍ່ຂອງໂລກ ຜະລິດຢາບ້າຈຳນວນມະຫາສານ ລວມທັງຝິ່ນ ແລະ ກັນຊາ, ເມື່ອປີກາຍນີ້ ເຈົ້າໜ້າທີ່ຕຳຫລວດມຽນມາລະບຸ ມີຄະດີກ່ຽວຂ້ອງກັບຢາເສບຕິດ ເພີ່ມຂຶ້ນປະມານ 50% ຈາກປີ 2015 ເທົ່າກັບ 13,500​ ຄະດີ ຊຶ່ງສະທ້ອນໃຫ້ເຫັນເຖິງ ການເຕີບໃຫຍ່ຂອງທຸລະກິດເຖື່ອນ ທີ່ຍັງຄົງປາບປາມໄດ້ຍາກຢູ່ມຽນມາ.