spot_img
Homeຂ່າວພາຍ​ໃນຊະຕາກຳສີ້ນໄໝລາວ ໃນຍຸກສີ້ນໄໝທຽມຈາກຈີນ ເຂົ້າມາຕີຕະຫຼາດ

ຊະຕາກຳສີ້ນໄໝລາວ ໃນຍຸກສີ້ນໄໝທຽມຈາກຈີນ ເຂົ້າມາຕີຕະຫຼາດ

Published on

ສີ້ນ ເປັນເຄື່ອງນຸ່ງເອກະລັກຂອງແມ່ຍິງລາວ ທີ່ມີຄວາມເປັນເອກະລັກທາງດ້ານຮູບຊົງ ແລະລວດລາຍ ທີ່ເປັນມູນມໍລະດົກສືບທອດມາແຕ່ບູຮານນະການ. ສີ້ນໄໝ ແມ່ນສີ້ນທີ່ຖືກຕ່ຳຈາກເສັ້ນໄໝ ເຊິ່ງແຕ່ກ່ອນຈະມີແຕ່ໄໝມ້ອນ ແຕ່ມາຮອດຍຸກສະໄໝໃໝ່ ຈະມີໄໝຫລາບນຳ (ໄໝຫລາບແມ່ນເສັ້ນໄໝທີ່ຜະລິດໂດຍໂຮງງານຈາກວັດຖຸອື່ນທີ່ບໍ່ແມ່ນເສັ້ນໃຍຂອງໂຕມ້ອນ). ລວດລາຍຂອງສີ້ນແມ່ນມໍລະດົກອັນລ້ຳຄ່າ ເພາະມັນເປັນສີໄມ້ລາຍມືທີ່ຖືກພັດທະນາມາຈາກຫົວຄິດປະດິດສ້າງ ຈາກລຸ້ນສູ່ລຸ້ນ ຈົນມາເຖິງປັດຈຸບັນ ເຊິ່ງເປັນສິ່ງທີ່ບໍ່ສາມາດເອົາວັດຖຸອື່ນ ຫຼືສິລະປະແບບອື່ນມາປ່ຽນແທນໄດ້ (ບໍ່ຄືເສັ້ນໄໝ ທີ່ຍັງສາມາດເອົາໄໝຫລາບ ມາປ່ຽນແທນໄໝມ້ອນໄດ້).

ໃນຫຼາຍປີມານີ້ ເນື່ອງຈາກສີ້ນໄໝເປັນທີ່ນິຍົມນຸ່ງແລະສາມາດເປັນສິນຄ້າທີ່ມີລາຄາແພງ. ດັ່ງນັ້ນ, ຈຶ່ງເຮັດໃຫ້ນັກການຄ້າແຜ່ນແພຈາກຕ່າງປະເທດ ໂດຍສະເພາະແມ່ນຈີນ ໄດ້ນຳເອົາຮູບແບບແລະລວດລາຍຂອງສີ້ນ ໄປຜະລິດ ແລ້ວສົ່ງກັບເຂົ້າມາຂາຍໃນປະເທດລາວດ້ວຍລາຄາຖືກໆ ເປັນທາງເລືອກໜຶ່ງໃຫ້ແກ່ເອື້ອຍນ້ອງແມ່ຍິງລາວ ໂດຍສະເພາະແມ່ນຜູ້ທີ່ລາຍໄດ້ບໍ່ຫຼາຍ ແລະທັງຍັງເປັນແມ່ຍິງສ່ວນຫຼາຍຂອງປະເທດ ນັ້ນສະແດງໃຫ້ເຫັນວ່າຜູ້ທີ່ຈະຊື້ສີ້ນໄໝຈີນມານຸ່ງ ກໍມີຈຳນວນຫຼາຍເຊັ່ນດຽວກັນ.

ການເຂົ້າມາຂອງຕີຕະຫຼາດຂອງສີ້ນໄໝຈີນ ເຮັດໃຫ້ຕະຫຼາດສີ້ນໄໝພາຍໃນຖືກກະທົບກະເທືອນພໍສົມຄວນ ໂດຍສະເພາະແມ່ນຜູ້ສ້າງລາຍຮັບຈາກການຕ່ຳສີ້ນໄໝ ເຊິ່ງເຄີຍມີກຸ່ມຜູ້ຕ່ຳສີ້ນໄໝຈາກແຂວງຈຳປາສັກ ໄດ້ອອກມາກ່າວແລ້ວເມື່ອ 3 ປີກ່ອນວ່າ ຖ້າຫາກພາກລັດບໍ່ສາມາດສະກັດກັ້ນການນຳເຂົ້າສີ້ນໄໝທຽມຈາກຈີນແລ້ວ ພາກສ່ວນຕ່ຳຫູກກໍຄົງຢູ່ລຳບາກ ຫຼືອາດຈະຢຸດເຊົາອາຊີບຕ່ຳຫູກໄປເຮັດອາຊີບອື່ນ.

ສີ້ນໄໝທຽມຈາກປະເທດຈີນມີລາຄາຢູ່ປະມານ 20,000 – 30,000 ກີບ ສຳລັບສີ້ນທີ່ບໍ່ໄດ້ລີດຜ້າກາວ, ແຕ່ຖ້າລີດຜ້າກາວແລ້ວ ລາຄາກໍຈະຢູ່ປະມານ 50,000 – 60,000 ກີບ. ໃນຂະນະທີ່ສີ້ນລາວ ຖ້າເປັນຜ້າຝ້າຍກໍຈະຢູ່ປະມານຜືນລະ 50,000 –​ 70,000 ກີບ ແຕ່ຖ້າເປັນສີ້ນໄໝຈະເປັນໄໝຫລາບຫຼືໄໝມ້ອນ ລາຄາກໍຈະຢູ່ປະມານ 200,000 ກີບ ຂຶ້ນໄປຈົນເຖິງຫຼາຍລ້ານກີບ ກໍມີ.

ຕາມການສອບຖາມຜູ້ທີ່ໄດ້ນຸ່ງສີ້ນໄໝຈີນແລ້ວ ໄດ້ຄຳເຫັນວ່າ ສີ້ນໄໝຈີນ ເຖິງແມ່ນວ່າລາຄາຈະຖືກແຕ່ວ່ານຸ່ງບໍ່ຄັກ ເນື່ອງຈາກບໍ່ນຸ່ມນວນຄືກັບສີ້ນລາວ ມັນຈະແຂງແລະເປັນຂຸຍ ຫຼືຢືດຍານໄດ້ງ່າຍ ຖ້າທຽບໃສ່ລາຄາແລ້ວກໍພໍນຸ່ງໄດ້ ແຕ່ຖ້າມາທຽບໃສ່ຄວາມໝັ້ນໃຈລະຫວ່າງນຸ່ງສີ້ນໄໝລາວກັບສີ້ນໄໝຈີນແລ້ວ ສີ້ນໄໝລາວຈະສ້າງຄວາມພູມໃຈ ນຸ່ງແລ້ວມີຄວາມໝັ້ນໃຈຫຼາຍກວ່າ.

ຖ້າຫາກວ່າມື້ໜຶ່ງເກີດກໍລະນີສີ້ນຈີນແກ້ໄຂຈຸດອ່ອນຄື ເຮັດໃຫ້ເນື້ອຜ້ານຸ່ມນວນແລະທົນທານຂຶ້ນຕື່ມ ແລະຄັດລອກລວດລາຍສີ້ນລາວໄດ້ ມື້ນັ້ນຊະຕາກຳຂອງສີ້ນໄໝລາວຈະຢູ່ຍາກຢ່າງແນ່ນອນ.

ບົດຄວາມຫຼ້າສຸດ

ງົດງາມທີ່ສຸດຈາກທົ່ວໂລກ ຕາດກວາງຊີ ແຂວງຫຼວງພະບາງ ຖືຈັດຢູ່ໃນ 21 ນໍ້າຕົກທີ່ສວຍງາມຈາກທົ່ວໂລກ ປີ 2025

ວາລະສານ ການທ່ອງທ່ຽວຊື່ດັງຂອງໂລກ Travel + Leisure ໄດ້ຈັດອັນດັບ Top 21 Most Beautiful Waterfalls in the World...

ໄທເລີ່ມປະຕິບັດແລ້ວ ທະນາຄານເລີ່ມປາບປາມຂະບວນການບັນຊີມ້າ ຖ້າກວດພົບຄວາມສົງໄສ ຈະອາຍັດບັນຊີທັນທີ

ບັນຊີມ້າແມ່ນບັນຊີທະນາຄານທີ່ຖືກນໍາໃຊ້ໂດຍອາດຊະຍາກອນ ເພື່ອເກັບເງິນ ຫຼື ຟອກເງິນທີ່ໄດ້ມາແບບຜິດກົດໝາຍ ແມ່ນບັນຊີທີ່ຖືກຈ້າງໃຫ້ເປີດ ຫຼື ຖືກລັກຂໍ້ມູນໄປໃຊ້ ເພື່ອເປັນທາງຜ່ານຂອງເງິນທີ່ໄດ້ມາຈາກການກະທຳຜິດກົດໝາຍ ລວມທັງການພະນັນ. ໃນຊ່ວງໜຶ່ງອາທິດທີ່ຜ່ານມາ ທາງທະນາຄານເເຫ່ງປະເທດໄທ ເລີ່ມກວດສອບ ແລະ ລົງມືປະຕິບັດຢ່າງເຂັ້ມງວດ ໃນການອາຍັດບັນຊີມ້າ...

ຄວາມຫວັງໃໝ່ຂອງເນປານ ແຕ່ງຕັ້ງລັດຖະມົນຕີຄົນໃໝ່ ໂດຍຈະປະຕິບັດໜ້າຮັກສາການ 6 ເດືອນ

ພາຍຫຼັງຄວາມວຸ່ນວາຍຂອງເຫດການປະທ້ວງໃນປະເທດເນປານ ເຮັດໃຫ້ອະດີດນາຍຍົກລັດຖະມົນຕີໄດ້ລາອອກ ພ້ອມທັງເດີນທາງອອກນອກປະເທດ ນຳພາໃຫ້ເນປານບໍ່ມີຄົນດຳລົງຕໍາເເໜ່ງນາຍົກລັດຖະມົນຕີໃນໄລຍະໜຶ່ງ. ເຊິ່ງໃນວັນທີ 12 ກັນຍາ 2025 ທີ່ຜ່ານມາ, ໄດ້ມີການປະກາດແຕ່ງຕັ້ງ ທ່ານ ນາງ  ສຸຊີລາ ກາກີ ຂຶ້ນຮັບຕໍາແໜ່ງຮັກສາການນາຍົກລັດຖະມົນຕີ...

ສະຫຼົດ! ຊາຍອາຍຸ 26 ປີ (ເສຍຊີວິດ) ຍ້ອນຂັບລົດຕຳງົວ ທີ່ບ້ານວຽງແກ້ວ ເມືອງຈັນທະບູລີ ນະຄອນຫຼວງວຽງຈັນ

ບັນຫາການປ່ອຍສັດຊະຊາຍ ສ່ຽງເຮັດໃຫ້ຄົນອື່ນເກີດອຸບັດຕິເຫດ ເຖິງຂັ້ນເສຍຊີວິດໄດ້. ບັນຫາການປ່ອຍສັດລ້ຽງ (ງົວ, ຄວາຍ, ແບ້, ມ້າ...) ຍັງຄົງຖືກພົບເຫັນເລື້ອຍໆຢູ່ຫຼາຍໆຂົງເຂດ ຕັ້ງແຕ່ເຂດຊານເມືອງຈົນໄປເຖິງໃນເມືອງ. ຈົນກາຍເປັນຄວາມເຄີຍຊິນໄປແລ້ວສຳລັບຜູ້ສັນຈອນໄປມາທີ່ຕ້ອງລະວັງເອງ ແຕ່ບາງຄັ້ງກໍມີອຸບປະຕິເຫດຕາມມາ ເຊັ່ນ: ລົດໃຫຍ່ຕຳງົວ, ລົດຈັກຕຳງົວ,...