ຂປລ. ໃນຕອນເຊົ້າຂອງວັນທີ່ 30 ມັງກອນ 2017 ຜ່ານມານີ້ ເຈົ້າໜ້າທີ່ໜ່ວຍສະເພາະກິດ ປກສ ແຂວງບໍ່ແກ້ວ ໄດ້ກວດຄົ້ນລົດຕູ້ເປົ້າໝາຍ ບໍ່ມີໝາຍເລກທະບຽນ ຢູ່ດ່ານຂົວນ້ຳເກິງເກົ່າ ໄດ້ພົບເຫັນຢາບ້າ ຈຳນວນ 2 ມັດ ກັບ 8 ຖົງ, ມີຢາບ້າ 5.600 ເມັດ ຊຸກເຊື່ອງຢູ່ໃນແກັດນ້ຳຕານ ແລະ ໄດ້ກັກຕົວ ທ້າວ ແສງແກ້ວ ພຸດທະປັນຍາ ອາຍຸ 23 ປີ ອາຊີບ ກຳມະກອນ ຢູ່ບ້ານສາຍລົມ ເມືອງ ແລະ ແຂວງຫລວງພະບາງ.
ຜ່ານການສືບສວນ-ສອບສວນ ໃນເບື້ອງຕົ້ນຜູ້ກ່ຽວ ໄດ້ຮັບສາລະພາບວ່າ: ຢາບ້າຈຳນວນດັ່ງກ່າວ ແມ່ນຂອງຜູ້ກ່ຽວແທ້ ເຊິ່ງຕົນໄດ້ໄປຊື້ນຳ ທ້າວ ກໍ (ນາມສົມໝຸດ) ຢູ່ບ້ານໂພນໂຮມ ເມືອງຕົ້ນເຜິ້ງ ແຂວງບໍ່ແກ້ວ ເພື່ອຈະນຳຢາຈຳນວນດັ່ງກ່າວ ໄປຂາຍຢູ່ແຂວງຫລວງພະບາງ, ຫລັງຈາກຜູ້ກ່ຽວໄດ້ຊື້ຢານໍາ ທ້າວ ກໍ ແລ້ວກໍໄດ້ເໝົາລົດຕູ້ຄັນດັ່ງກ່າວຈາກ ເມືອງຕົ້ນເຜິ້ງ ເພື່ອມາສົ່ງຕົນເອງຢູ່ ເມືອງຫ້ວຍຊາຍ ແລ້ວກໍຈະຈ້າງລົດໂດຍສານໄປແຂວງຫລວງພະບາງ ແຕ່ພໍມາຮອດດ່ານຂົວນ້ຳເກິງເກົ່າ ໄດ້ຖືກເຈົ້າໜ້າທີ່ກັກຕົວໄດ້ກ່ອນ, ດັ່ງນັ້ນເຈົ້າໜ້າທີ່ ຕຳຫລວດ ປກສ ແຂວງບໍ່ແກ້ວ ຈຶ່ງກັກຕົວຜູ້ກ່ຽວໄວ້ ເພື່ອດຳເນີນຄະດີຕາມລະບຽບກົດໝາຍຕໍ່ໄປ.
ຕິດຕາມເຮົາທາງFacebook ກົດຖືກໃຈເລີຍ!