ອໍານາດການປົກຄອງ ແຂວງຈໍາປາສັກ ຢືນຢັນວ່າຕົນເອງ ຈະມອບໃຫ້ເມືອງຈໍາປາສັກ ເປັນຜູ້ຫ້າງຫາກະກຽມ ແລະ ດໍາເນີນການຈັດງານ ບຸນນະມັດສະການ ຜາສາດຫີນວັດພູຈໍາປາສັກ ລະຫວ່າງ 8-11 ກຸມພາ 2017, ຄາດວ່າຈະມີນັກທ່ອງທ່ຽວ ພາຍໃນ ແລະ ຕ່າງປະເທດ ຮ່ວມສະຫລອງ 5 ແສນຄົນປີນີ້.
ການສະເຫລີມສະຫລອງ ບຸນນະມັດສະການ ຜາສາດຫີນວັດພູຈໍາປາສັກ ຢູ່ພາກໃຕ້ຂອງລາວ ໄດ້ປະຕິບັດ ແລະ ສືບທອດກັນມາ ຕາມປະເພນີ ໃນແຕ່ລະປີດ້ວຍຄວາມ ເບີກບານມ່ວນຊື່ນ ສ່ວນອໍານາດການປົກຄອງທ້ອງຖິ່ນ ເມືອງຈໍາປາສັກ ກໍໃຫ້ຄໍາໝັ້ນສັນຍາວ່າ ຈະພະຍາຍາມບຸກບືນ ແລະ ສູ້ຊົນປະສານສົມທົບ ກັບຜູ້ປະກອບການກ່ຽວຂ້ອງ ເພື່ອຮັບປະກັນ ບໍ່ໃຫ້ມີຫາງສຽງທາງລົບ ໂດຍສະເພາະ ການເກັບຄ່າຝາກລົດແພງເກີນໄປ, ບໍລິການສະຖານທີ່ ຝາກລົດຫຍຸ້ງຍາກ, ການເກັບຄ່າຜ່ານເຂົ້າໄປ ກາບໄຫວ້ສະຖານສັກສິດ ກໍຈະມີນະໂຍບາຍ ບໍ່ໃຫ້ເກັບປະມານ 3 ມື້.
ການສະເຫລີມສະຫລອງ ບຸນດັ່ງກ່າວຄາດວ່າ ຈະເລີ່ມຄົບງັນຕາມປະເພນີ ໃນວັນທີ 8 ກຸມພາ ແລະ ວັນທີ 9 ກຸມພາ ຈະເປັນການເປີດງານບຸນວັດພູ ຢ່າງເປັນທາງການ ໃນງານຈະມີການ ແຫ່ປ້າຍມໍລະດົກ, ແຫ່ຂະບວນ ທີ່ເປັນເອກກະລັກ ຂອງແຕ່ລະເມືອງ ເຊິ່ງຈະມີຄະນະນໍາ ຈາກສູນກາງ, ແຂວງ ແລະ ເມືອງເຂົ້າຮ່ວມ. ຕະຫລອດໄລຍະ ການສະຫລອງນັ້ນ ຈະມີກິດຈະກໍາຕ່າງໆເຊັ່ນ: ວາງສະແດງ ສິນຄ້າ, ຄ້າຂາຍ-ສິນຄ້າພື້ນເມືອງ, ການແຂ່ງຂັນກິລາມວນຊົນ, ການສະແດງສິລະປະ ວັນນະຄະດີ, ລໍາເລື່ອງ, ປາລັດຕື້ ແລະ ອື່ນໆ.
ທ່ານ ນາງ ມາລາ ຈັນທະລານ ຮອງຫົວໜ້າ ພະແນກຖະແຫລງຂ່າວ ວັດທະນະທໍາ ແລະ ທ່ອງທ່ຽວ ໄດ້ໃຫ້ສຳພາດ ໃນວັນທີ 31 ມັງກອນ 2017 ນີ້ວ່າ: ການຈັດງານບຸນ ນະມັດສະການຜາສາດຫີນວັດພູ ໃນທຸກໆປີນັ້ນແມ່ນເນັ້ນໃສ່ ການອະນຸລັກຮັກສາ ແລະ ສົ່ງເສີມຮີດຄອງປະເພນີ ອັນດີງານຂອງຊາດເປັນຫລັກ ບໍ່ສາມາດປະຖິ້ມບາງສິ່ງດັ້ງເດີມ ແລະ ວິຖີຊີວິດອັນເກົ່າແກ່ ໂດຍສະເພາະ ການຄ້າຂາຍເຂົ້າຫລາມ-ປີ້ງໄກ່ ແລະ ກິດຈະກໍາປິ່ນອ້ອມອື່ນໆ ເຊິ່ງບັນຫາດັ່ງກ່າວ ເປັນສິ່ງດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໃຫ້ເຂົ້າມາທ່ຽວຊົມ ລວມທັງສໍາຜັດ ອາຫານພື້ນເມືອງຈາກແດນໃຕ້, ນອກຈາກການຈັດງານບຸນແລ້ວ ພາຍໃນແຂວງຍັງມີ ສະຖານທີ່ທ່ອງທ່ຽວທໍາມະຊາດ, ປະຫວັດສາດ, ວັດທະນະທໍາ ແລະ ອື່ນໆ ຢ່າງຫລວງຫລາຍເຊັ່ນ: ນໍ້າຕົກຄອນພະເພັງ, ຕາດເຍືອງ, ຕາດຜາສ້ວມ, ຕົ້ນໄມ້ມະນີໂຄດ, ລ່ອງເຮືອຊົມເກາະ 4.000 ດອນ, ຊົມສວນກາເຟ, ບ້ານຊົນເຜົ່າ.
ຂ່າວ: ສຳນັກຂ່າວສານປະເທດລາວ