ໃນຕອນເຊົ້າຂອງວັນທີ 17 ມັງກອນ 201ຈ ຜ່ານມາ ເຈົ້າໜ້າທີ່ພະແນກສະກັດກັ້ນ ແລະຕ້ານຢາເສບຕິດແຂງຄຳມ່ວນ ໄດ້ຮັບແຫຼ່ງຂ່າວຈາກພົນລະເມືອງດີວ່າ ຈະມີກຸ່ມຄົນບໍ່ດີຈຳນວນໜຶ່ງລັກລອບເຄື່ອນໄຫວຄ້າຂາຍຢາເສບຕດ (ປະເພດຢາບ້າ) ຢູ່ຂອບເຂດບ້ານປຸ່ງເໜືອ ເມືອງຫີນບູນ ແຂງຄໍາມ່ວນ ຕົກມາຮອດວັນທີ 18 ມັງກອນ 2017 ທາງເຈົ້າໜ້າທີ່ໄດ້ນຳກຳລັງພະນັກງານ ວິຊາສະເພາະລົງກວດກາຕິດຕາມສະຖານທີ່ເປົ້າໝາຍດັ່ງກ່າວ
ພໍມາຮອດເວລາ 11 ໂມງ ຂອງວັນດຽວກັນ ກໍໄດ້ພົບເຫັນພວກກຸ່ມເປົ້າໝາຍ ກຳລັງເຄື່ອນໄຫວ ລັກລອບຄ້າຂາຍສິ່ງຜິດກົດໝາຍຂອບເຂດບ້ານດັ່ງກ່າວ ແລະໃນເວລາທີ່ພວກກ່ຽວກຳລັງເຄື່ອນໄຫວຊື້-ຂາຍກັນນັ້ນ ທາງເຈົ້າໜ້າທີ່ສະເພາະຈຶ່ງໄດ້ສະແດງຕົວ ນຳກຳລັງເຂົ້າຈັບກຸມ ແລະສາມາດກັກຕົວຜູ້ຖືກຫາໄດ້ 2 ຄົນຄື: ທ້າວ ຄຳໂກ້ ໄຊຊົມພູ ອາຍຸ 40 ປີ ອາຊີບເຮັດນາ ຢູ່ບ້ານປຸ່ງເໜືອ ເມືອງຫີນບູນ ແລະທ້າວ ມີດ ຫຼວງສຸວັນນະວົງ ອາຍຸ 42 ປີ ອາຊີບກຳມະກອນ ຢູ່ໂພນຂາມ ເມືອງບໍລິຄັນ ແຂວງບໍລິຄຳໄຊ ພ້ອມຂອງກາງຢາບ້າ 20 ມັກ ກັບ 4 ຖົງນ້ອຍ ເທົ່າກັບ 40.614 ເມັດ ແລະລົດວີໂກ້ແຊັມສີດໍາ 1 ຄັນ ໝາຍເລກທະບຽນ ຄຳມ່ວນ ກກ 9435 ສ່ວນເຖົ້າແກ່ສອງຄົນບໍ່ຮູ້ຊື່ ໄດ້ເອົາຕົວລົບໜີໄປໄດ້
ຜ່ານການສືບສວນສອບສວນ ເບື້ອງຕົ້ນ ຂອງເຈົ້າໜ້າທີ່ພວກກ່ຽວທັງສອງ ໄດ້ຮັບສາລະພາບວ່າ ຢາບ້າຈຳນວນດດັ່ງກ່າວ ແມ່ນເປັນຂອງພວກກ່ຽວທັງສອງແທ້ ແລະກຳລັງຈະເອົາໄປຂາຍໃຫ້ເຖົ້າແກ່ສອງຄົນນັ້ນໃນລາຄາ 960.000 ບາດ
ປະຈຸບັນ ເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ແຂວງຄຳມ່ວນ ກຳລັງດຳເນີນການ ສືບສວນສອບສວນ ພວກກ່ຽວທັງສອງ ທັງຂະຫຍາຍຜົນ ຫາກຸ່ມແກ້ງ ທີ່ຮ່ວມຂະບວນການໃນຄັ້ງນີ້ ເພື່ອມາດຳເນີນຄະດີຕາມກົດໝາຍຢ່າງເຂັ້ມງວດ
ຂ່າວ: ເສດຖະກິດ-ສັງຄົມ