ມື້ເຊົ້ານີ້້ 8 ສິງຫາ 2014 ມີລາຍງານວ່າ: ເຈົ້າໜ້າທີ່ຕຳຫຼວດຊາຍແດນຈັງຫວັດມຸກດາຫານ ປະເທດໄທ ໄດ້ທຳການກວດຄົ້ນລົດກະບະໂຕໂຍຕ້າ ສີຂາວ ເລກທະບຽນ ກກ 8598 ສະຫວັນນະເຂດ ເຊິ່ງມີ ນາງ ມະຕະພອນ (ນ້ອຍ) ອາຍຸ 42 ປີ ປະຊາຊົນເມືອງໄກສອນພົມວິຫານ ແຂວງສະຫວັນນະເຂດ ເປັນຄົນຂັບ.
ຈາກການຄົ້ນລົດຂອງເຈົ້າໜ້າທີ່ພົບວ່າພາຍໃນລົດມີທະນະບັດສະກຸນເງິນບາດໄທຈຳນວນຫຼວງຫຼາຍຢູ່ກ້ອງເບາະນັ່ງທັງດ້ານໜ້າແລະດ້ານຫຼັງ ແລະໃນກ່ອງເຄື່ອງມືແປງລົດ ເມື່ອເອົາອອກມາກວດແລະນັບເປັນເງິນບາດໃບລະ 1000 ບາດ ມັດລະ 1 ລ້ານບາດ ລວມໄດ້ທັງໝົດ 30 ມັດ ລວມເປັນ 30 ລ້ານບາດ ໂດຍມີສາຍຮັດຂອງທະນາຄານກຸງສີອະຍຸດທະຍາ ເຈົ້າໜ້າທີ່ຈຶ່ງໄດ້ຍຶດແລະກວດສອບເງິນທັງໝົດ.
ຈາກການສອບຖາມ ນາງ ມະຕະພອນ ໃຫ້ການວ່າ ເງິນຈຳນວນດັ່ງກ່າວຕົນໄດ້ຮັບມາຈາກເຖົ້າແກ່ຢູ່ລາວໃຫ້ເອົາເງິນມາໂອນເປັນຄ່າຊື້ເຄື່ອງດື່ມຊູກຳລັງຍີ່ຫໍ້ໜຶ່ງ ແລະທະນາຄານໄດ້ປິດຍ້ອນໝົດເວລາເຮັດວຽກ ຕົນຈຶ່ງໄດ້ເອົາເງິນດັ່ງກ່າວທັງໝົດກັບໄປປະເທດລາວ ແຕ່ກໍມາຖືກເຈົ້າໜ້າທີ່ຈັບເສຍກ່ອນ.
ແນວໃດກໍຕາມ, ຝ່າຍເຈົ້າໜ້າທີ່ໄທຍັງບໍ່ເຊື່ອ ຈາກນັ້ນຈຶ່ງໄດ້ແຈ້ງໃຫ້ນາງ ມະຕະພອນ ຮູ້ວ່າ ຕາມກົດໝາຍໄທແມ່ນຫ້າມເອົາເງິນສົດສະກຸນເງິນບາດອອກນອກປະເທດເກີນຄັ້້ງລະ 500,000 ບາດ ໂດຍບໍ່ໄດ້ຮັບອະນຸຍາດ.
ຈາກນັ້ນເຈົ້້າໜ້າທີ່ຈຶ່ງໄດ້ນຳໂຕນາງ ມະຕະພອນ ພ້ອມຂອງກາງເປັນລົດກະບະ ແລະເງິນຈຳນວນ 30 ບ້ານບາດ ສົ່ງໃຫ້ພະນັກງານສອບສວນ ຈັງຫວັດມຸກດາຫານ ເພື່ອດຳເນີນຄະດີຕາມກົດໝາຍໄທຕໍ່ໄປ.
