ຍີ່ປຸ່ນ ໄດ້ໃຫ້ທຶນຊ່ວຍເຫລືອລ້າ ຈຳນວນຫລາຍກ່ວາ 165, 000 ໂດລາສະຫະລັດ ໃຫ້ລັດຖະບານລາວ ເພື່ອ ການຝຶກອົບຮົມວິຊາຊີບ ໃຫ້ແກ່ຜູ້ພິການທາງສະໝອງ ແລະ ເພື່ອປັບປຸງຊີວິດການເປັນຢູ່ຂອງເຂົາເຈົ້າໃຫ້ດີຂື້ນ.
ທຶນຊ່ວຍເຫລືອໃນຄັ້ງນີ້ ຈະຖືກນຳໃຊ້ເຂົ້່າໃນການຊ່ວຍສ້າງ ຜູ້ຊີ້ນຳການຝຶກອົບຮົມຜູ້ພິການທາງປັນຍາ ແນໃສ່ເພື່ອພັດທະນາຄວາມສາມາດ ດ້ານວິຊາຊີບ ແລະ ສ້າງແບບຢ່າງ ໃນການເຮັດວຽກທີ່ດີ ໃຫ້ແກ່ເຂົາເຈົ້າ ກໍຄື ສ້າງຄວາມຮັບຮູ້ຄວາມເຂົ້າໃຈ ໃຫ້ແກ່ສັງຄົມ ຕໍ່ຄວາມສາມາດ ແລະ ຄວາມບຸກບືນຂອງຄົນພິການ ໃນການເພິ່ງພາຕົນເອງ ແລະ ການກຸ້ມຕົນເອງຂອງຜູ້ພິການທາງປັນຍາ ໃນການດຳລົງຊີວິດຂອງເຂົາເຈົ້າ ໃນສັງຄົມພິທີເຊັ່ນສັນຍາການ ຊ່ວຍເຫລືອດັ່ງກ່າວ ໄດ້ຈັດຂຶ້ນໃນວັນທີ 19 ມັງກອນນີ້ ຢູ່ ນະຄອນຫລວງວຽງຈັນ ລະຫວ່າງ ທ່ານ ທາເຄຊິຣິຄິຮາຣະ ເອກອັກຄະລະຊະທູດ ຍີ່ປຸ່ນ ປະຈຳ ສປປ ລາວ ແລະ ທ່ານ ນາງ ຢູກິ ນາກະມຸຣະ ຜູ້ຈັດການໂຄງການປະຈຳ ອົງການພັດທະນາຄົນພິການອາຊີ (ADDP).
ອົງການ ADDP ໄດ້ໃຫ້ຊ່ວຍເຫລືອຜູ້ພິການ ໃນ ສປປ ລາວ ນັບແຕ່ປີ 1995 ເປັນຕົ້ນມາ ພາຍໃຕ້ການສະໜັບສະໜຸນທຶນ ຈາກລັດຖະບານຍີ່ປຸ່ນ ນັບແຕ່ປີ 2011, ຜ່ານມາ ອົງການນີ້ ໄດ້ຈັດຕັ້ງປະຕິບັດ ໂຄງການຕ່າງໆ ເພື່ອສົ່ງເສີມຄວາມສາມາດ ຂອງຜູ້ພິການທາງກາຍະພາບ ຢູ່ນະຄອນຫລວງວຽງຈັນ ແລະ ແຂວງຫົວພັນເຊີ່ງ ຖືເປັນການປະກອບສ່ວນສຳຄັນ ເຂົ້າໃນການພັດທະນາສະພາບແວດລ້ອມ ການດຳລົງຊິວີດຂອງຜູ້ພິການໃນປະເທດລາວ ຢ່າງເຂັ້ມແຂງ.
ຂ່າວຈາກ: ສຳນັກຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!