ບົດຄວາມເກມ: ມື້ນີ້ໃນອະດີດ ວັນທີ 21 ມັງກອນ ຫຼືມື້ວາງຈຳໜ່າຍເກມ Resident Evil 2

0
1732

ວັນທີ 21 ມັງກອນ ປີ 1998 ຫຼືມື້ນີ້ເມື່ອ 19 ປີກ່ອນ ເປັນມື້ວາງຈຳໜ່າຍຂອງເກມ Resident Evil 2 ເທິງເຄື່ອງ PS1 ໃນປະເທດສະຫະລັດອາເມຣິກາ. ສຳລັບພາກນີ້ໄດ້ມີການປ່ຽນໂຕລະຄອນຫຼັກຈາກພາກທຳອິດ ເຊິ່ງແຕ່ກ່ອນແມ່ນເປັນ ຄຣິສ ເຣດຟິວ ແລະ ຈິວ ວາເລນທາຍ ສອງເຈົ້າໜ້າທີ່ຈາກໜ່ວຍ S.T.A.R.S. ປະຈຳສະຖານີຕຳຫຼວດເມືອງແຣັກຄູນ ມາເປັນ ລີອອນ ສະກ໋ອດ ເຄນເນດີ້ ຕຳຫຼວດໜ້າໃໝ່ທີ່ຫາກ່ອນເຂົ້າມາປະຈຳການທີ່ເມືອງແຣັກຄູນເປັນມື້ທຳອິດ ແລະ ແຄລຣ໌ ເຣດຟິວ ນ້ອງສາວຂອງຄຣິສ ເຣດຟິວ ໂຕເອກຈາກພາກທຳອິດ. ໃນຂະນະທີ່ໂຕຮ້າຍຫຼັກຂອງພາກ 2 ນີ້ໄດ້ແກ່: ວິນລ້ຽມ ເບີຄິນ ນັກວິທະຍາສາດຈາກບໍລິສັດ Umbrella ທີ່ຄິດຄົ້ນເຊື້ອ G-Virus ທີ່ເປັນເຊື້ອໄວຣັສສາຍພັນໃໝ່ຂຶ້ນມາໄດ້ສຳເລັດ ແຕ່ວ່າລາວພັດຖືກຫັກຫຼັງໂດຍອົງກອນທີ່ລາວສັງກັດຢູ່ດ້ວຍການສົ່ງທະຫານມາກຳຈັດ ແລະຍາດເອົາຕົວຢ່າງເຊື້ອ G-Virus ໄປ, ແຕ່ກ່ອນທີ່ເບີຄິນຈະສິ້ນລົມຫາຍໃຈລາວໄດ້ເຮັດການສີດເຊື້ອ G-Virus ເຂົ້າສູ່ຮ່າງກາຍຕົນເອງຈົນກາຍຮ່າງເປັນອະສູນອອກລ່າ ແລະລ້າງແຄ້ນທຸກຄົນທີ່ຫັກຫຼັງຕົນ ລວມເຖິງລີອອນ ແລະແຄລຣ໌ທີ່ຫຼົງເຂົ້າມາໃນເມືອງມໍລະນະແຫ່ງນີ້. 

Fact ເລັກນ້ອຍກ່ຽວກັບເກມ Resident Evil 2

  • ເຫດການຂອງພາກ 2 ຈະເຊື່ອມໂຍງກັບພາກ 3 ນຳ ໂດຍເຫດການຂອງພາກ 2 ຈະຢູ່ໃນຊ່ວງວັນທີ 29-30 ກັນຍາ 1998 ສ່ວນພາກ 3 ຈະຢູ່ລະຫວ່າງວັນທີ 28 ກັນຍາ – 1 ຕຸລາ 1998 ຫຼືຈະເວົ້າງ່າຍໆກໍຄື: ເຫດການພາກ 3 ນັ້ນເລີ່ມກ່ອນພາກ 2 ແລະກໍຈົບຫຼັງເຫດການພາກ 2 ນັ້ນເອງ. 

  • ຄວາມລັບຢ່າງໜຶ່ງຂອງເກມນີ້ທີ່ຫຼາຍຄົນອາດຈະແນມຂ້າມນັ້ນກໍຄື: ພາຍໃນຫ້ອງຂອງໜ່ວຍ S.T.A.R.S. ທີ່ຢູ່ໃນສະຖານີຕຳຫຼວດເມືອງແຣັກຄູນນັ້ນຈະມີໂຕະເຮັດວຽກຂອງໂຕລະຄອນຈາກພາກທຳອິດຢູ່ ບ່ອນນີ້ຫາກຜູ້ຫຼິ້ນລອງກົດສຳຫຼວດໂຕະຂອງ Wesker ໃຫ້ຄົບ 50 ເທື່ອ ກໍຈະໄດ້ໄອເທັມທີ່ຊື່ວ່າ: Film D ມາ ເຊິ່ງຫາກນຳມັນໄປລ້າງໃນຫ້ອງເຊບຊັ້ນລຸ່ມ ກໍຈະໄດ້ຮູບຂອງ Rebecca ສາວຈາກທີມ Bravo ທີ່ເປັນໂຕລະຄອນເອກຂອງພາກ 0 ໃນຊຸດກິລາມາເຊີຍຊົມ. 

  • ໃນຊ່ວງທຳອິດຂອງເກມ ທາງຝັ່ງເນື້ອເລື່ອງ A ກ່ອນທີ່ຈະເຂົ້າໄປໃນຮ້ານຂາຍປືນຫາກສັງເກດຂ້າງທາງດີໆ ຈະເຫັນຮ້ານທີ່ມີປ້າຍດ້ານເທິງວ່າ: Arukas ເຊິ່ງປ້າຍນີ້ເປັນ Easter Egg ທີ່ເຊື່ອມໂຍງກັບອີກເກມໜຶ່ງຂອງທາງ Capcom ທີ່ວາງຈຳໜ່າຍໄປກ່ອນໜ້ານັ້ນ ຖ້າຫາກນຳເອົາຄຳວ່າ Arukas ມາວາງຮຽງຈາກຫຼັງມາໜ້າກໍຈະໄດ້ເປັນຄຳວ່າ: Sakura ໂຕລະຄອນສາວໜ້າໃໝ່ທີ່ປະກົດໂຕຄັ້ງທຳອິດໃນເກມ Street Fighter Alpha 2 ນັ້ນເອງ. 

  • ໃນຝັ່ງເນື້ອເລື່ອງ A ຫາກຜູ້ຫຼິ້ນຕັ້ງໜ້າໄປທີ່ສະຖານີຕຳຫຼວດໂດຍທີ່ບໍ່ເກັບໄອເທັມໃດໆເລີຍ ເມື່ອເຂົ້າມາໃນສ່ວນຂອງລານໜ້າສະຖານີຕຳຫຼວດຈະພົບ ແບຣກ ວິກເກີຣ໌ ນັກບິນປະຈຳໜ່ວນ S.T.A.R.S. ທີ່ກາຍເປັນຊອມບີ້ໄປຮຽບຮ້ອຍແລ້ວ ຫາກກຳຈັດລາວໄດ້ກໍຈະໄດ້ກະແຈມາດອກໜຶ່ງ, ໂດຍກະແຈດອກນີ້ສາມາດໃຊ້ເປີດລ໋ອກເກີ້ທີ່ຢູ່ພາຍໃນຫ້ອງເຊບຊັ້ນ 1F ຂອງສະຖານີຕຳຫຼວດໄດ້ ເຊິ່ງທາງລີອອນຈະໄດ້ຊຸດສຳລັບປ່ຽນ 2 ຊຸດ ແລະທັງ 2 ຊຸດນີ້ເມື່ອໃສ່ແລ້ວຈະມີສະກິວພິເສດຢ່າງໜຶ່ງຄື: ເມື່ອເອົາປືນສັ້ນແນຍິງ ພະເອກຂອງເຮົາຈະຖືປືນພຽງມືດຽວ ແລະອັດຕາການຍິງຕໍ່ເນື່ອງຂອງປືນສັ້ນຈະສູງຂຶ້ນນຳ (ຄວາມໄວຊ່ຳກັບເອດ້າຍິງ) ນອກຈາກນີ້ ທາງສ່ວນຂອງແຄລຣ໌ກໍຈະມີຊຸດໃຫ້ປ່ຽນ 1 ຊຸດ ແລະໄດ້ປືນລູກໂມ້ມາອີກບອກ (ໃຊ້ລູກປືນຂອງປືນສັ້ນ) ໂດຍປືນລູກໂມ້ນີ້ຈະມີອັດຕາການຍິງຕໍ່ເນື່ອງຄືກັບລີອອນຕອນປ່ຽນຊຸດ. 

  • ກ່ອນໜ້າທີ່ເກມນີ້ຈະວາງຈຳໜ່າຍ ທາງທີມພັດທະນາເຄີຍໄດ້ວາງໂຕລະຄອນເອກຝ່າຍຍິງເປັນສາວນັກແວ້ນຜົມບລອນ ນາມວ່າ: ເອວຊ້າ ວອກເກີ້ ແຕ່ໃນພາຍຫຼັງກໍໄດ້ປ່ຽນເປັນ ແຄລຣ໌ ເຣດຟິວ ແທນ ທັງນີ້ກໍຍ້ອນສາເຫດທີ່ຕ້ອງການໃຫ້ມີຄວາມເຊື່ອມໂຍງກັບໂຕລະຄອນ ຄຣິສ ເຣດຟິວ ໂຕເອກຂອງພາກທຳອິດນັ້ນເອງ. 

  • Resident Evil 2 ສາມາດສ້າງປະກົດການຄັ້ງສຳຄັນໃນປີ 1998 ໂດຍເປັນເກມທີ່ເຮັດຍອດຈຳໜ່າຍໄດ້ໄວທີ່ສຸດໃນທະວີບອາເມຣິກາເໜືອພາຍໃນປີດັ່ງກ່າວ ທັງນີ້ ໃນຊ່ວງທ້າຍອາທິດຂອງມື້ວາງຈຳໜ່າຍ ໂຕເກມສາມາດເຮັດຍອດຂາຍໄປໄດ້ 380,000 ຊຸດ ແລະເຮັດຍອດຂາຍເທິງແພລັດຟອຣ໌ມ PS1 ໄປໄດ້ລວມທັງໝົດ 4.96 ລ້ານຊຸດ ນັບເປັນພາກທີ່ຂາຍດີທີ່ສຸດຫາກນັບສະເພາະໃນ 1 ແພລັດຟອຣ໌ມ ຖ້າບວກກັບພາກ Dual Shock Ver. ກໍລວມເປັນ 6.16 ລ້ານຊຸດພໍດີ ເຊິ່ງເມື່ອນັບຍອດຂາຍລວມແບບທຽບກັບທຸກພາກແລ້ວ ພາກ 2 ສາມາດເຮັດຍອດຂາຍໄດ້ເປັນອັນດັບ 4 ໂດຍເປັນຮອງພຽງພາກ 5 (6.9 ລ້ານຊຸດ), ພາກ 1 (6.33 ລ້ານຊຸດ ແບບລວມທຸກເວີຊັ່ນ) ແລະພາກ 6 (6.3 ລ້ານຊຸດ). 

ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!

ທີ່ມາ: online station