ວັນທີ 12 ມັງກອນ 2017 ທີ່ທໍານຽມປະທານປະເທດ(ຫໍຄໍາ), ທ່ານ ບຸນຍັງ ວໍລະຈິດ ປະ ທານປະເທດແຫ່ງ ສປປ ລາວ ໄດ້ຕ້ອນຮັບ ທ່ານ ດຣ.ໂທນີ ທານ ເກັງ ຢໍາ ປະທານາທິບໍດີ ແຫ່ງ ສ.ສິງ ກະໂປ ພ້ອມພັນລະຍາ ແລະ ຄະນະຢ່າງສົມກຽດໃນໂອກາດທີ່ເດີນ ທາງມາຢ້ຽມຢາມທາງລັດຖະກິດຢູ່ ສປປ ລາວ ໃນລະຫວ່າງວັນທີ 11-14 ມັງກອນ 2017 ນີ້.
ພາຍຫລັງສໍາເລັດພິທີຕ້ອນຮັບ, ຜູ້ນໍາທັງສອງ ໄດ້ສືບຕໍ່ດໍາເນີນການພົບປະສອງຝ່າຍທີ່ທໍານຽບປະທານປະເທດ ເພື່ອແຈ້ງສະພາບການພັດທະນາເສດຖະກິດ-ສັງຄົມຂອງປະເທດ ແລະ ຕີລາຄາສູງຕໍ່ໝາກຜົນການຮ່ວມມືຂອງສອງຝ່າຍ ນັບແຕ່ໄດ້ສ້າງຕັ້ງສາຍພົວພັນການທູດນໍາກັນໃນປີ 1974 ເປັນຕົ້ນມາເຫັນໄດ້ວ່າສາຍພົວພັນມິດຕະພາບ ແລະ ການຮ່ວມມືຢ່າງໃກ້ຊິດຂອງສອງປະເທດນັບມື້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ, ໃນນີ້ຜູ້ນໍາສິງກະໂປ ກໍໄດ້ຕີລາຄາສູງຕໍ່ບົດບາດການເປັນປະທານອາຊຽນຂອງ ສປປ ລາວ ແລະ ການເປັນເຈົ້າພາບຈັດກອງປະຊຸມສຸດຍອດອາຊຽນໃນປີ 2016 ສໍາເລັດດ້ວຍດີ. ຈາກນັ້ນຜູ້ນໍາລາວ ໄດ້ຕີລາຄາສູງຕໍ່ການປະກອບສ່ວນຂອງສິງກະໂປ ໃນວຽກງານອາຊຽນ ແລະ ຂອບໃຈຕໍ່ການຊ່ວຍເຫລືອ ສປປ ລາວ ຕະຫລອດໄລຍະການເປັນປະທານອາຊຽນໃນປີ 2016. ໃນຊຸມປີມານີ້, ການພົວພັນສອງຝ່າຍໄດ້ມີໝາກຜົນຕົວຈິງອັນສໍາຄັນ, ໂດຍສະເພາະການເປີດຖ້ຽວບິນຈາກສິງກະໂປ-ວຽງຈັນ-ຫລວງພະບາງ ຂອງບໍລິສັດ ຊິວແອຂອງສິງກະ ໂປ ແລະ ການລົງນາມໃນສັນຍາຮ່ວມເສັ້ນທາງບິນນໍາກັນ ແລະ ອີກຜົນສໍາເລັດໜຶ່ງແມ່ນການບັງຄັບໃຊ້ສັນຍາວ່າດ້ວຍການຫລີກເວັ້ນການເກັບອາກອນຊໍ້າຊ້ອນ ແລະ ສະກັດກັ້ນການຫລົບຫລີກການເສຍອາກອນລາຍໄດ້ ລະຫວ່າງ ສອງປະເທດ. ໃນໄລຍະຜ່ານມາສິງກະໂປ ໄດ້ສະໜັບສະໜູນຊ່ວຍ ເຫລືອ ສປປ ລາວ ໃນດ້ານການພັດທະນາຊັບພະຍາກອນມະນຸດ ໃນນັ້ນ ໄດ້ໃຫ້ທຶນການສຶກສາໄລຍະຍາວ ແລະ ຝຶກອົບຮົມໄລຍະສັ້ນທັງຢູ່ປະເທດສິງກະໂປ ແລະ ຢູ່ສູນລາວ-ສິງກະໂປທີ່ນະຄອນຫລວງວຽງຈັນ; ສົ່ງອາສາສະໝັກຊາວໜຸ່ມມາຊ່ວຍເຫລືອບັນດາໂຮງຮຽນ ແລະ ຊຸມຊົນຕ່າງໆ ສອນພາສາອັງກິດ,ຄອມພິວເຕີ,ການຮັກສາສິ່ງແວດລ້ອມຫລາຍກວ່າ 1.500 ຄົນ ນັບແຕ່ປີ 2008 ເຖິງປັດຈຸບັນ ແລະ ປະກອບສ່ວນທຶນຮອນກໍ່ສ້າງໂຮງຮຽນຈໍານວນໜຶ່ງ.
ພ້ອມນັ້ນຍັງມີອາສາສະໝັກແພດທີ່ເປັນຊ່ຽວຊານດ້ານຕ່າງໆ ຈໍານວນຫລາຍຮ້ອຍຄົນມາຊ່ວຍເຫລືອປິ່ນປົວໃນຫລາຍຂົງເຂດ; ສ່ວນການລົງທຶນຂອງບັນດານັກທຸລະກິດ ສິງກະໂປ ຢູ່ລາວ ກໍໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວຢ່າງຕັ້ງໜ້າ. ນອກຈາກນີ້, ສອງຝ່າຍຍັງໄດ້ແລກປ່ຽນຄໍາຄິດຄໍາເຫັນຕໍ່ກັບສະພາບການພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.
ໃນວັນດຽວກັນ, ທ່ານ ດຣ.ໂທນີ ທານ ເກັງ ຢໍາ ພ້ອມດ້ວຍຄະນະກໍໄດ້ເດີນທາງໄປວາງພວງມາລາທີ່ ອານຸສາວະລີນັກຮົບນິລະນາມ ແລະ ຢ້ຽມຊົມພະທາດຫລວງວຽງຈັນອີກດ້ວຍ.
ແຫລ່ງຂ່າວຈາກ: ສຳນັກຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!