6 ເກມສະຢອງຂວັນທີ່ສ້າງມາໂດຍການອີງຈາກເລື່ອງແທ້

0
1931

​ເກມແນວສະຢອງຂວັນຖືວ່າເປັນເກມປະເພດໜຶ່ງທີ່ຄົນນິຍົມຫຼິ້ນກັນຫຼາຍພໍສົມຄວນເປັນຕົ້ນແມ່ນ Resident Evil, Silent Hill ເຊິ່ງແນ່ນອນຢູ່ແລ້ວວ່າເປັນເລື່ອງທີ່ແຕ່ງຂຶ້ນມາ, ແຕ່ວ່າບາງເກມນັ້ນພັດມີການອ້າງອີງມາຈາກເລື່ອງທີ່ເກີດຂຶ້ນແທ້ມາດັດແປງເປັນເກມທີ່ຊ່ອຍເພີ່ມຄວາມສົມຈິງໄປອີກ ມາເບິ່ງພ້ອມກັນເລີຍວ່າມີເກມໃດແດ່. 

Kholat

Platform: Steam 

ເກມສະຢອງຂວັນສັນຊາດ Poland ທີ່ເປັນແນວຍ່າງສຳຫຼວດສາກທີ່ເຮົາຈະຕ້ອງຊອກຫານັກສຶກສາ 9 ຄົນທີ່ຫາຍໄປໃນພູເຂົາ Kholat Syakhi ໃນແຖບ Ural ປະເທດ Russia ອີກທັງຍັງໃຫ້ສຽງບັນຍານໂດຍ Sean Bean ອີກນຳ. 

ໂດຍເກມນີ້ມີການອ້າງອີງມາຈາກເຫດການທີ່ຊື່ວ່າ The Dyatlov Pass Incident
ໃນປີ ຄ.ສ 1959 ມີນັກຮຽນສະກີຈາກສະຖາບັນ Ural Polytechnical ຫາຍໄປ 9 ຄົນ ໃນແຖບເທືອກເຂົາ Ural ເປັນເວລາ 4 ເດືອນ, ໂດຍມີການກວດສອບຫຼັງຈາກທີ່ບໍ່ມີການສົ່ງຂໍ້ຄວາມກັບມາ ແລະສອງອາທິດຫຼັງຈາກນັ້ນກໍໄດ້ພົບຮອຍຕີນເທິງຫິມະທີ່ພາໄປພົບກັບສົບຂອງ 9 ຄົນນັ້ນ, ເຊິ່ງເປັນເຫດການທີ່ມີຊື່ສຽງກໍເນື່ອງມາຈາກສາເຫດການຕາຍທີ່ໜ້າສົງໄສ ໂດຍສາເຫດຫຼັກໆມາຈາກສະພາວະທີ່ອຸນຫະພູມໃນຮ່າງກາຍຕ່ຳ ແຕ່ວ່າຜູ້ຊາຍຄົນໜຶ່ງພັດມີອາການບາດເຈັບຢູ່ສະໝອງນຳ ທັງໆທີ່ບໍ່ມີຄວາມເສຍຫາຍທີ່ກະໂຫຼກຫົວເລີຍ ແລະ ຜູ້ຍິງຄົນໜຶ່ງລີ້ນຫາຍໄປ. ນອກຈາກນີ້ແຖວໆສົບຍັງມີເສດເຫຼັກເຕັມໄປໝົດ ເວົ້າໄດ້ວ່າເປັນເລື່ອງເລິກລັບຢ່າງໜຶ່ງທີ່ຫາຄຳຕອບບໍ່ໄດ້ໃນທີ່ສຸດ.   

 

The Town of Light

 


Platform:
Steam

ເກມແນວຍ່າງສຳຫຼວດສາກຄືເກມດ້ານເທິງນີ້ ໂດຍຈະຍ້າຍຈາກພູເຂົາແຖບຫິມະມາເປັນໂຮງໝໍໂລກຈິດ ເຊິ່ງໂຕເອກຈະຕ້ອງຍ່າງຄົ້ນຫາອະດີດຂອງຕົນເອງຢູ່ນີ້. 

ສຳລັບສະຖານທີ່ໃນເກມນີ້ແມ່ນຈຳລອງມາຈາກສະຖານທີ່ແທ້ທີ່ມີຊື່ວ່າ: Volterra Psychiatric Asylum ເປັນໂຮງໝໍໂລກຈິດທີ່ຕັ້ງຢູ່ທີ່ Itary ເຊິ່ງຮອງຮັບຄົນເຈັບໄດ້ເຖິງ 6,000 ຄົນ, ໂດຍສະພາບຄວາມເປັນຢູ່ນັ້ນໂຫດຮ້າຍຫຼາຍມີທັງການທົດລອງຊ໋ອດໄຟຟ້າ, ເຮັດການທົດລອງໂຕຢາຕ່າງໆກັບຄົນເຈັບເປັນຕົ້ນ. ພາຍໃນຮົ້ວກຳແພງຂອງໂຮງໝໍນີ້ ມີອ່າງລ້າງໜ້າ 20 ອ່າງ ແລະມີຫ້ອງນ້ຳໃຫ້ 2 ຫ້ອງສຳລັບທຸກໆຄົນເຈັບ 200 ຄົນ. ເຊິ່ງສະຖານທີ່ແຫ່ງນີ້ແມ່ນໄດ້ຖືກປິດໄປໃນປີ 1978 ເນື່ອງຈາກຜິດກົດໝາຍຫຼັກມະນຸດສະທຳແຕ່ກໍບໍ່ໄດ້ມີການທຸບຖິ້ມ. 

 

Fatal Frame

Platform: PlayStation 2, Nintendo 3DS, Wii, Wii U, Xbox

ເກມຖ່າຍຕິດວິນຍານທີ່ຈະພາເຮົາໄປພົບວິນຍານສຸດຫຼອນຕ່າງໆຜ່ານເລນກ້ອງຖ່າຍຮູບທີ່ມັກຈະຖືກນຳໄປປຽບທຽບກັບເກມ RE, Silent Hill ໂດຍເກມນີ້ເປັນເກມສະຢອງຂວັນເກມທຳອິດກະເວົ້າໄດ້ທີ່ຖືກສ້າງຂຶ້ນໃນສະຖານທີ່ແທ້ທີ່ມີຊື່ວ່າ: Himuro Mansion 

ສຳລັບສະຖານທີ່ນີ້ ເປັນສະຖານທີ່ທີ່ຢູ່ດ້ານນອກເມືອງໂຕກຽວທີ່ຕະກຸນ Himuro ນັ້ນເຮັດພິທີກຳທຸກໆ 50 ປີ ເພື່ອທີ່ຈະຫ້າມບໍ່ໃຫ້ສິ່ງຊົ່ວຮ້າຍໃນປະຕູໃຕ້ດິນຂອງແມນຊັ່ນປະກົດອອກມາເຊິ່ງພິທີກຳນີ້ຕ້ອງໃຊ້ຜູ້ຍິງທີ່ຍັງບໍ່ໄດ້ແຕ່ງງານມາໄຫວ້ ເຊິ່ງການບັນທຶກເຖິງພິທີກຳຄັ້ງສຸດທ້າຍນັ້ນສາວທີ່ຈະຖືກໃຊ້ບູຊາພັດໄປຮັກກັບຜູ້ຊາຍທີ່ຕ້ອງການຊ່ອຍນາງໜີຈາກພິທີກຳນີ້ ເຊິ່ງພໍ່ຂອງນາງກໍໄດ້ຮູ້ ແລະເຮັດການຂ້າລ້າງໝົດຄອບຄົວດ້ວຍດາບກ່ອນທີ່ຈະຂ້າໂຕຕາຍ ເຊິ່ງວິນຍານນີ້ຈະເຮັດພິທີກຳນີ້ກັບທຸກໆຄົນທີ່ເຂົ້າໄປໃນເຮືອນຫຼັງນີ້.  

Sherlock Holmes Vs. Jack the Ripper

Platform: Windows,Xbox 360

ເກມນັກສືບຊື່ດັງຈາກນິຍາຍ Sir Arthur Conan Doyle ທີ່ເປັນຄະດີກ່ຽວກັບຄາດຕະກອນຕໍ່ເນື່ອງຊື່ດັງຂອງອັງກິດ Jack The Ripper ນັ້ນເອງ. 

ຄົນໆນີ້ແມ່ນຄາດຕະກອນຕໍ່ເນື່ອງທີ່ຂ້າຜູ້ຍິງໂສເພນີໃນກຸງລອນດອນ ເຊິ່ງສິ່ງທີ່ເຮັດໃຫ້ມີຊື່ສຽງນັ້ນມາຈາກການທີ່ບໍ່ເຄີຍຖືກຈັບໄດ້ເລີຍນັ້ນເອງ ທັງໆທີ່ລາວສັງຫານເຫຍື່ອໄດ້ໂຫດສຸດໆ (ບໍ່ຂໍອະທິບາຍເດີ້) ເຮັດໃຫ້ຄະດີນີ້ຖືກປິດລົງໄປໂດຍຍັງຈັບຄົນຮ້າຍບໍ່ໄດ້ ແລະເປັນປິດສະໜາ ແລະທິດສະດີຄົບຄິດມາຈົນຮອດທຸກມື້ນີ້. 

Lizzie Borden: The PC Game

Platform: PC ຕາມຊື່ເກມເລີຍ

ເກມປະຈົນໄພແນວຊີ້ແລ້ວຄລິກພ້ອມດ້ວຍບັນຍາກາດວັງເວງຊວນສະຢອງນີ້ດ້ວຍໂຕເອງທີ່ຊື່ວ່າ: Lizzie Borden ນາງແມ່ນໃຜໃນຊີວິດແທ້ນັ້ນມາຮູ້ຈັກພ້ອມກັນເລີຍ. 

ເກີດເຫດການຄາດຕະກຳຂຶ້ນທີ່ລັດແມສຊາຊູເສດ ປະເທດ America ເສດຖີເຖົ້າກັບເມຍຖືກຄາດຕຳກຳໃນເຮືອນຂອງຕົນເອງຕອນກາງເວັນ ແລະຜູ້ຕ້ອງສົງໄສກໍຄື: Lizzie ລູກສາວຂອງເສດຖີເຊິ່ງມີການກວດສອບ ແລະວິເຄາະຫຼັກຖານຕ່າງໆຫຼາກຫຼາຍ ລວມໄປເຖິງຂຶ້ນໄປໄຕ່ສວນໃນຊັ້ນສານນຳ ແຕ່ແລ້ວຕຳຫຼວດກໍຂາດຫຼັກຖານທີ່ຊັດເຈນໃນການເອົາຜິດ Lizzie ເຮັດໃຫ້ນາງຖືກປ່ອຍໂຕອອກມາໃນທີ່ສຸດ. ແຕ່ຄົນສ່ວນໃຫຍ່ກໍຄິດວ່ານາງແມ່ນຄົນຮ້າຍແນ່ນອນ ເຖິງວ່ານາງຈະບໍ່ຖືກຕັດສິນເອົາຜິດແຕ່ກໍຖືກສື່ສິ່ງພິມໃນສະໄໝກ່ອນນຳໄປໃຊ້ແຕ່ງລະຄອນ, ນິຍາຍຕ່າງໆ ເພື່ອສະແດງໃຫ້ເຫັນວ່ານາງແມ່ນຄົນຮ້າຍ ແຖມເຮືອນທີ່ເກີດເຫດນັ້ນໄດ້ກາຍເປັນ “ໂຮງແຮມທີ່ໄດ້ຮັບຄວາມນິຍົມທີ່ຄົນມັກຈະໄປຖ່າຍຮູບກັນທີ່ໂຊຟາທີ່ພໍ່ຂອງນາງຖືກຂ້າ”

 

Watch Dog 2

Platforms: PlayStation 4, Xbox One, Windows

ຫຼາຍໆຄົນເຫັນຊື່ເກມແລ້ວອາດຈະງົງວ່າມັນເປັນເກມສະຢອງຂວັນບ່ອນໃດ? ແນ່ນອນວ່າບໍ່ມີ ແຕ່ເຮົາຂໍປິດທ້າຍໄປດ້ວຍເກມນີ້ ທີ່ມີພາລະກິດພິເສດທີ່ຈະໃຫ້ເຮົາຊອກຫາຄາດຕະກອນນາມວ່າ: Zodiac Killer

Zodiac Killer ຫຼືຄາດຕະກອນໂຊດິແອກ ແມ່ນຄາດຕະກອນຕໍ່ເນື່ອງເຊິ່ງກໍ່ເຫດໃນຊ່ວງທ້າຍ ຄ.ສ 1960 ໃນແຖບພື້ນທີ່ທາງຕອນເໜືອຂອງລັດແຄລິຟໍຣ໌ເນຍ ເຊິ່ງທາງການບໍ່ສາມາດລະບຸໂຕຕົນທີ່ແທ້ຈິງ ແລະແຮງຈູງໃຈຂອງລາວໄດ້ມາຈົນເຖິງປັດຈຸບັນ. ສຳລັບ ນາມວ່າ: ໂຊດິແອກ ນັ້ນຖືກປະດິດຂຶ້ນໂດຍໂຕລາວເອງ ລາວແທນໂຕເອງດ້ວຍຊື່ນີ້ໃນທຸກໆຈົດໝາຍທີ່ລາວສົ່ງເຖິງກົມຕຳຫຼວດ ແລະຖືກນຳອອກຕີພິມໃນໜັງສືພິມ ເຊິ່ງໃນຈົດໝາຍປະກອບດ້ວຍລະຫັດລັບສີ່ຊຸດສາມໃນສີ່ຊຸດນີ້ຍັງບໍ່ມີບຸກຄົນໃດສາມາດຖອດໄດ້ຈົນຮອດທຸກມື້ນີ້. 
ຂໍ້ຄວາມສ່ວນໜຶ່ງໃນຈົດໝາຍທີ່ລາວຂຽນຂຶ້ນເພື່ອນັບຄະແນນ

“Me = 37 SFPD = 0” (SFPD ໝາຍເຖິງກົມຕຳຫຼວດຊານຟຣານຊິສໂກ)

ສຳລັບທ່ານໃດທີ່ຮັກໃນການອ່ານຂ່າວໄອທີ, ເກມ ແລະ ອະນິເມະ ສາມາດຕິດຕາມໄດ້ທີ່ນີ້ ກົດຖືກໃຈເລີຍ!

ທີ່ມາ: online station