ຕາມແຫລ່ງຂ່າວຈາກທ້ອງຖິ່ນ: ໃນທ້າຍເດືອນ ກໍລະກົດທີ່ຜ່ານມານີ້ ທ່ານ ຄອນຄຳ ວົງກາຍສາ ຫົວໜ້າຫ້ອງການແຮງງານສະຫວັດດີການສັງຄົມເມືອງ ທັງເປນຜູ້ຊີ້ນຳກຸ່ມບ້ານທີ 4 ໄດ້ສົມທົບກັບຫ້ອງການ ທລຍ ເມືອງພີນ ແລະຜູ້ປະສານງານ ທລຍ ກຸ່ມບ້ານທີ 4 ໄດ້ນຳພາພໍແມ່ປະຊາຊົນ ບ້ານຫິນສະໂງມ ຈຳນວນເກືອບ 100 ຄົນ ທຳການພ້ອມກັນເຮັດອະນາໄມ ຕາມຂອບເສັ້ນທາງເລກ 9 ບໍລິເວນທ້ອງຖິ່ນຂອງຕົນ ນອກຈາກນີ້ກໍພ້ອມກັນເຮັດອະນາໄມສະຖານທີ່ສຳຄັນຂອງບ້ານ ເປັນຕົ້ນແມ່ນຫ້ອງ ການບ້ານ ແລະສະຖານທີ່ເດີ່ນບ້ານສາທາລະນະ ທັງນີ້ກໍ່ເພື່ອຄວາມເປັນລະບຽບຮຽບຮ້ອຍ ແລະສະອາດງາມຕາ.
ທ່ານ ບຸນເກີດ ຜູ້ປະສານງານ ທລຍ ກຸ່ມບ້ານທີ 4 ໃຫ້ສຳພາດແກ່ນັກຂ່າວວ່າ: ການສ້າງຂະບວນການໃນຄັ້ງນີ້ກໍ່ເພື່ອເປັນຜົນງານໄວ້ຂ່ຳນັບຮັບຕ້ອນວັນສຳຄັນຂອງຊາດໃນນີ້ວັນຊາດທີ 2 ທັນວາແລະວັນສ້າງຕັ້ງພັກປະຊາຊົນປະຕິວັດລາວທີ່ ຈະໝູນວຽນມາບັນຈົບຄອບຮອບອີກວາລະໜຶ່ງ.
ຂ່າວແຈ້ງຕື່ມວ່າ: ໄປພ້ອມກັບການສ້າງຂະບວນການ ປະຊາຊົນຊາວບ້ານຫິນສະໂງມ ຍັງໄດ້ປຸກລະດົມກັນປະກອບສ່ວນທາງດ້ານ ແຮງງານເພື່ອທຳການກໍ່ສ້າງເຮືອນພັກໃຫ້ພະນັກງານແພດໝໍທີ່ປະຈຳຢູ່ສຸກສາລາ ໂດຍໄດ້ພ້ອມກັນຂົນວັດສະດຸກໍ່ສ້າງເຊັ່ນ: ຫິນ-ຊາຍ ແລະປະກອບໄມ້ຄ້ຳແບບ ອື່ນ ຊຶ່ງການກໍ່ສ້າງເຮືອນພັກພະນັກງານແພດແມ່ນໄດ້ດຳເນີນໄປໄດ້ສ່ວນໃດສ່ວນໜຶ່ງ ໂດຍແມ່ນ ກອງທຶນຫລຸດຜ່ອນຄວາມທຸກຍາກ ປະຈຳເມືອງພີນໃຫ້ການສະໜັບສະໜູນ ./