ທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ ຜູ້ຮັບຜິດຊອບວຽກງານຂົງເຂດເສດຖະກິດມະຫາພາກ ແລະ ພັດທະນາຕົວເມືອງໄດ້ລາຍງານໂຄງການທາງດ່ວນ ຄູ່ຂະໜານ ຖະໜົນໄກສອນ ພົມວິຫານ ຕິດກັບໂຄງການເມືອງດອກຈຳປາ (ອ່າງໂຕ່ງນ້ຳບຶງທາດຫຼວງ) ຕໍ່ກອງປະຊຸມສະໃມສາມັນເທື່ອທີ 2 ຂອງສະພາປະຊາຊົນນະຄອນຫຼວງວຽງຈັນຊຸດທີ I ໃນຕອນເຊົ້າຂອງວັນທີ 11 ມັງກອນ 2017ວ່າ ໂຄງການກໍ່ສ້າງທາງດ່ວນ ຄູ່ຂະໜານ ຖະໜົນໄກສອນ ພົມວິຫານ ໄດ້ຖືກລິເລີ່ມບົນພື້ນຖານການຜັນຂະຫຍາຍໂຄງການປ້ອງກັນ ແລະ ແກ້ໄຂລົດຕິດຕາມທ້ອງຖະໜົນ.
ໂຄງການດັ່ງກ່າວຈະສ້າງເປັນຖະໜົນເບຕົງເສີມເຫຼັກ ຝາກລະ 3 ເລນ ລວມຄວາມກ້ວາງ 70 ແມັດ ບວກເຂດສະຫງວນແລວທາງຕື່ມອີກ 40 ແມັດ ລວມຄວາມກ້ວາງທັງໝົດ 110 ແມັດ.
ໂຄງການກໍ່ສ້າງທາງດ່ວນ ຄູ່ຂະໜານຖະໜົນໄກສອນ ພົມວິຫານ ໄລຍະທີ 1 ມີຄວາມຍາວ 14.08 ກິໂລແມັດ ເລີ່ມແຕ່ສູນການຄ້າລາວໄອເຕັກ-ຕະຫຼາດຫົວຂົວ-ເມືອງດອກຈຳປາ (ເຂດສະຫງວນອ່າງໂຕ່ງນ້ຳບຶງທາດຫຼວງ)-ໜອງໜ່ຽງ-ຖະໜົນ 450 ປີ- ສະຖານີລົດໄຟ- ຖະໜົນ 13 ໃຕ້-ດົງໝາກຄາຍ ກວມເອົາສອງເມືອງ (ເມືອງໄຊເສດຖາ ແລະ ເມືອງ ໄຊທານີ) ຄາດຄະເນງົບປະມານທີ່ໃຊ້ໃນການກໍ່ສ້າງ ປະມານ 150-200 ລ້ານໂດລາສະຫະລັດ.
ເນື້ອໃນຂ່າວຈາກ: ໜັງສືພຶມ ເສດຖະກິດ-ການຄ້າ
ພາບປະກອບຈາກ: ອິນເຕີເນັດ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!