ກອງປະຊຸມສະຫລຸບວຽກງານປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) 6 ແຂວງພາກເໜືອປະຈຳປີ 2016 ທີ່ຈັດຂຶ້ນຢູ່ແຂວງໄຊຍະບູລີ ເມື່ອວັນທີ 5 ມັງກອນ 2017 ຜ່ານມານີ້ ໂດຍການເປັນປະທານຂອງທ່ານພົນໂທ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ໄດ້ຕີລາຄາວ່າ: ໃນໄລຍະໜຶ່ງປີຜ່ານມາຄະນະກຳມະການ ປກຊ-ປກສ ຂອງ 6 ແຂວງພາກເໜືອ, ໄດ້ຕັ້ງໜ້າສືບຕໍ່ປະຕິບັດສອງໜ້າທີ່ຍຸດທະສາດ ຄືປົກປັກຮັກສາ ແລະ ສ້າງສາປະເທດ ແລະ ການປະຕິບັດ, ມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມແຫ່ງລັດຢູ່ແຕ່ລະທ້ອງຖິ່ນ ແລະເອົາໃຈໃສ່ເຮັດວຽກງານ ປກຊ-ປກສ ທົ່ວປວງຊົນຮອບດ້ານ ເຮັດໃຫ້ປະເທດຊາດກໍຄື 6 ແຂວງພາກເໜືອ ສາມາດຮັກສາໄດ້ສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍດີ, ລະບົບການເມືອງຢູ່ຮາກຖານໄດ້ຮັບການປັບປຸງ, ເສດຖະກິດໄດ້ຮັບການພັດທະນາຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າ ໄດ້ຮັບການຍົກລະດັບດີຂຶ້ນ, ກຳລັງ ປກຊ-ປກສ ແຕ່ລະຂັ້ນໄດ້ຮັບການປັບປຸງໃຫ້ເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ
ທ່ານລັດຖະມົນຕີກະຊວງປ້ອງກັນປະເທດ ໄດ້ຊີ້ນຳຄະນະພັກ-ຄະນະບັນຊາແຕ່ລະຂັ້ນ, ແຕ່ລະກົມກອງຈົ່ງສືບຕໍ່ນຳພາຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ໃຫ້ເປັນຂະບວນກວ້າງຂວາງ, ສຶກສາອົບຮົມການເມືອງ-ແນວຄິດໃຫ້ສະມາຊິກພັກ-ພະນັກງານ, ປະຊາຊົນບັນດາເຜົ່າໃຫ້ຍົກສູງສະຕິລະວັງຕົວຕໍ່ກົນອຸບາຍທຳລາຍມ້າງເພຂອງສັດຕູ, ເພີ່ມທະວີຄວາມສາມັກຄີເປັນເອກະພາບ ພາຍໃນໃຫ້ເປັນປຶກແຜ່ນ ແລະ ສຸມທຸກກຳລັງຫັນລົງກໍ່ສ້າງຮາກຖານການເມືອງ, ສ້າງບ້ານ-ກຸ່ມບ້ານພັດທະນາຕິດແໜ້ນກັບການກໍ່ສ້າງກົມກອງຮາກຖານເຂັ້ມແຂງ-ໜ່ວຍພັກເຂັ້ມແຂງ-ຮູ້ນຳພາຮອບດ້ານໃຫ້ນັບມື້ກວ້າງ ຂວາງເລິກເຊິ່ງ, ຮັບປະກັນໃຫ້ 6 ແຂວງພາກເໜືອ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພຢ່າງໜັກແໜ້ນ, ເພື່ອຮັບປະກັນໃຫ້ການພັດທະນາເສດຖະກິດ-ສັງຄົມຂອງແຕ່ລະແຂວງດຳເນີນໄປດ້ວຍບັນຍາກາດທີ່ດີ ແລະ ສືບຕໍ່ແກ້ໄຂຄວາມທຸກຍາກຂອງປະຊາຊົນໃຫ້ຫລຸດລົງເທື່ອລະກ້າວ.
ຂ່າວ: ໜັງສືພິມ ລາວພັດທະນາ