ໃນວັນທີ 9 ມັງກອນ 2017 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ພ້ອມຄະນະໄດ້ລົງຢ້ຽມຢາມພື້ນຖານການຜະລິດ ແລະ ແຫລ່ງທ່ອງທ່ຽວຢູ່ເມືອງໂຂງ ແຂວງຈໍາປາສັກໂດຍໃຫ້ກຽດຕ້ອນຮັບຢ່າງອົບອຸ່ນຈາກບັນດາການນໍາແຂວງ ແລະ ເມືອງທີ່ກ່ຽວຂ້ອງ.
ການເຄື່ອນໄຫວຢ້ຽມເມືອງດັ່ງກ່າວໃນໂອກາດເຂົ້າຮ່ວມພິທີເປີດດ່ານສາກົນ ໜອງນົກຂຽນ-ຕຣາປຽງ ກຣຽນ ລະຫວ່າງ ສອງປະເທດ ຄື: ສາທາລະນະລັດ ປະຊາທິປະໄຕ ປະ ຊາຊົນລາວ ແລະ ຣາຊະອານາຈັກ ກຳປູເຈຍທີ່ຈະມີຂຶ້ນໃນວັນທີ 10 ມັງກອນ 2017 ນີ້ ທີ່ແຂວງຈໍາປາສັກ.
ດ່ານສາກົນ ໜອງນົກຂຽນ-ຕຣາປຽງກຣຽນ ຈະເປັນດ່ານສາກົນ ແຫ່ງ ທໍາອິດ ລະຫວ່າງ ສປປ ລາວ ແລະ ຣາຊະ ອານາຈັກ ກໍາປູເຈຍ, ເຊິ່ງຜ່ານມາ ເຄີຍເປັນດ່ານທ້ອງຖິ່ນ ເພື່ອອໍານວຍຄວາມສະດວກໃຫ້ແກ່ການໄປມາຫາສູ່ກັນ ລະຫວ່າງ ປະຊາຊົນແຂວງ ຈຳປາສັກ ແຫ່ງ ສປປ ລາວ ແລະ ແຂວງ ຊຽງແຕງ ແຫ່ງ ຣາຊະອານາຈັກ ກຳປູເຈຍ. ໃນວັນທີ 9 ເມສາ 2009, ລັດຖະບານສອງປະເທດ ໄດ້ຕົກລົງເຫັນດີຍົກລະດັບໃຫ້ເປັນດ່ານສາກົນ, ໂດຍຄວາມພະຍາ ຍາມ ຂອງສອງຝ່າຍ ໃນການກະກຽມດ້ານຕ່າງໆ ທັງເປັນການກໍ່ສ້າງພື້ນຖານໂຄງລ່າງ ແລະ ຂັ້ນຕອນເອກະສານລະບຽບການກ່ຽວຂ້ອງ ເພື່ອສ້າງດ່ານແຫ່ງນີ້ ໃຫ້ກາຍເປັນດ່ານສາກົນ ຈົນສຳເລັດ.
ການເປີດດ່ານສາກົນດັ່ງກ່າວ, ແມ່ນມີຄວາມໝາຍຄວາມສໍາຄັນປະຫວັດສາດ ສຳລັບສອງປະເທດທີ່ເກີດຂຶ້ນ ໃນທ່າມກາງບັນຍາກາດທີ່ສອງປະເທດ ໄດ້ສະເຫລີມສະຫລອງວັນສ້າງຕັ້ງສາຍພົວພັນການທູດສອງປະເທດ ລາວ-ກໍາປູເຈຍ-ກໍາປູເຈຍ-ລາວ ຄົບຮອບ 60 ປີ ແລະ ທັງຈະເປັນການຕອບສະໜອງຄວາມມຸ້ງມາດປາດຖະໜາ ຂອງປະຊາ ຊົນສອງປະເທດ ທີ່ຢາກຮັດແໜ້ນສາຍພົວພັນມິດຕະ ພາບ ທີ່ເປັນມູນເຊື້ອມາແຕ່ດົນນານ ແລະ ການຮ່ວມມືອັນດີ ລະຫວ່າງ ປະຊາຊົນສອງປະເທດ ໃຫ້ ແໜ້ນແຟ້ນຍິ່ງໆຂຶ້ນ ໂດຍຜ່ານການໄປມາຫາສູ່ກັນໃຫ້ຫລາຍຂຶ້ນ ແລະ ສະ ດວກສະບາຍຕາມບໍລິເວນຊາຍແດນ ແລະ ຈະເປັນການຊຸກຍູ້ສົ່ງເສີມການທ່ອງທ່ຽວ ລະຫວ່າງ ປະຊາຊົນສອງຊາດ ກໍຄືຕໍ່ຕ່າງ ປະເທດ.
ຂ່າວຈາກ: ສຳນັກຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!