ເກັ່ງ! ນັກຮຽນມ.ສ ປາກເຊ ຄອງອັນດັບ 1ໃນການແຂ່ງຂັນຖາມ – ຕອບ ຄວາມຮູ້ກ່ຽວກັບອາຊຽນລະດັບຊາດ***
ນາງ ສຸກພະໄທ ລັງສີ ນັກຮຽນຊັ້ນ ມ.6 ຂອງໂຮງຮຽນມັດທະຍົມສົມບູນ ( ມ.ສ ) ປາກເຊ ແຂວງຈຳປາສັກ ສາມາດຄອງອັນດັບໜຶ່ງ ໃນການແຂ່ງຂັນຖາມ – ຕອບຄວາມຮູ້ອາຊຽນລະດັບຊາດ ແລະ ໃນທ້າຍເດືອນນີ້ກໍ່ຈະໄດ້ໄປແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນທີ່ນະຄອນຫຼວງຮ່າໂນ້ຍ ສ.ສ ຫວຽດນາມ ຊຶ່ງຈະມີນ້ອງນັກຮຽນທີ່ເປັນຕົວແທນຈາກ 10 ປະເທດ ອາຊຽນເຂົ້າຮ່ວມແຂ່ງຂັນ.
ໂດຍການແຂ່ງຂັນຖາມ – ຕອບຄວາມຮູ້ອາຊຽນລະດັບຊາດປະຈຳປີ 2014 ຫຼື National ASEAN Quiz 2014 ໄດ້ຈັດຂຶ້ນໃນວັນທີ 24 ກໍລະກົດ 2014 ຜ່ານມາ ທີ່ສະໜາມກິລາບູໂດ ນະຄອນຫຼວງວຽງຈັນ, ມີຕົວແທນນັກຮຽນຈາກ 3 ພາກຄື: ພາກເໜືອ ຫຼວງພະບາງ, ພາກກາງ ສະຫວັນນະເຂດ, ພາກໃຕ້ ແຂວງຈຳປາສັກ ແລະ ຈາກໂຮງຮຽນ 9 ແຫ່ງໃນນະຄອນຫຼວງ ທັງໝົດ 36 ນ້ອງເຂົ້າແຂ່ງຂັນ.
ທ່ານ ນາງ ຂັນທະລີ ດ້ວງນຸລັກ ຜູ້ອຳນວຍການໂຮງຮຽນ ມ.ສ ປາກເຊ ໃຫ້ສຳພາດໃນວັນທີ 31 ກໍລະກົດ ທີ່ຜ່ານມາວ່າ: ພາຍຫຼັງທີ່ໄດ້ຮັບແຈ້ງການຈາກກະຊວງສຶກສາ ກໍ່ຄືພະແນກສຶກສາທິການ ແລະ ກິລາແຂວງ ທາງໂຮງຮຽນກໍ່ໄດ້ຄັດເລືອກເອົານ້ອງນັກຮຽນໃນໂຮງຮຽນຈຳນວນ 3 ນ້ອງທີ່ຮຽນເກັ່ງ ແລະ ມີຄວາມຮູ້ດ້ານພາສາອັງກິດເຂົ້າສອບເສັງຄັດເລືອກຮ່ວມກັບນ້ອງນັກຮຽນຈາກ ມ.ສ ແລະ ມ.ປາຍ ທົ່ວແຂວງ ຊຶ່ງຜົນການສອບເສັງ ນາງ ສຸກພະໄທ ລັງສີ ຈາກໂຮງຮຽນ ມ.ສ ປາກເຊຂອງພວກເຮົາແລະ ອີກນັກຮຽນຊາຍ 2 ນ້ອງ ຈາກໂຮງຮຽນ ມ.ປາຍພອນສະຫວັນ ແລະ ມ.ສ ໂພນໄຊ ສາມາດຜ່ານເຂົ້າໄປແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນ ທີ່ນະຄອນຫຼວງວຽງຈັນຮ່ວມກັບນັກຮຽນໃນທົ່ວປະເທດ ແລະ ນາງ ສຸກພະໄທ ລັງສີ ກໍ່ສາມາດຍາດໄດ້ອັນດັບທີ 1ໃນຈຳນວນ 3 ນ້ອງທີ່ເສັງໄດ້ ເພື່ອກຽມໄປແຂ່ງຂັນຕໍ່ທີ່ຮ່າໂນ້ຍ ສ.ສ ຫວຽດນາມ ໃນທ້າຍເດືອນສິງຫານີ້ ຮ່ວມກັບນັກຮຽນ 10 ປະເທດໃນກຸ່ມອາຊຽນ.
ໃນໂອກາດນີ້ ນາງ ສຸກພະໄທ ລັງສີ ກ່າວວ່າ: ຜ່ານການແຂ່ງຂັນຖາມ-ຕອບຄວາມຮູ້ກ່ຽວກັບອາຊຽນຜົນປາກົດວ່າ ນ້ອງໄດ້ເປັນອັນດັບທີ 1 ໃນ 3 ຄົນ ທີ່ຈະໄດ້ໄປແຂ່ງຂັນຕໍ່ທີ່ນະຄອນຫຼວງຮ່າໂນ້ຍໃນທ້າຍເດືອນນີ້ ຊຶ່ງ 2 ຄົນທີ່ໄດ້ໄປນຳກັນນັ້ນເປັນເພດຍິງຈາກໂຮງຮຽນໃນນະຄອນຫຼວງວຽງຈັນ. ຈາກຜົນການແຂ່ງຂັນນີ້ ນ້ອງເອງຮູ້ສຶກຕື່ນເຕັ້ນດີໃຈ ເພາະບໍ່ຄິດບໍ່ຝັນວ່າຈະເສັງໄດ້; ເປັນຄວາມພາກພູມໃຈຢ່າງຍິ່ງທີ່ນ້ອງເອງສາມາດສ້າງຊື່ສຽງໃຫ້ແກ່ແຂວງຈຳປາສັກ, ສ້າງຊື່ສຽງໃຫ້ແກ່ໂຮງຮຽນ ແລະ ສ້າງຊື່ສຽງໃຫ້ແກ່ຄອບຄົວ ແລະ ຕົນເອງ. ໃນນາມທີ່ເປັນຕົວແທນໃຫ້ແກ່ປະເທດລາວທີ່ຈະໄດ້ໄປແຂ່ງຂັນ ຖາມ-ຕອບຄວາມຮູ້ກ່ຽວກັບອາຊຽນທີ່ຮ່າໂນ້ຍໃນທ້າຍເດືອນນີ້ ນ້ອງເອງຈຶ່ງຕ້ອງຄຸມຮຽນຫຼາຍກວ່າເກົ່າທັງຄວາມຮູ້ກ່ຽວກັບອາຊຽນ ແລະ ພາສາອັງກິດ. ສຳລັບຂອງຂັວນລາງວັນທີ່ໄດ້ຮັບ ແມ່ນໄດ້ຮັບໃບຍ້ອງຍໍ 1ໃບ, ຂັນລາງວັນ 1ໜ່ວຍ, ຄອມພິວເຕີຕັ້ງໂຕະ 1ໜ່ວຍ ແລະ ເງິນ 300 ໂດລາສະຫະລັດ.
ທ່ານ ຜູ້ອຳນວຍການ ໂຮງຮຽນ ມ.ສ ປາກເຊກ່າວຕື່ມວ່າ: ຮູ້ສຶກພາກພູມໃຈເປັນຢ່າງຍິ່ງ ທີ່ນັກຮຽນຂອງໂຮງຮຽນຕົນສາມາດຍາດໄດ້ອັນດັບທີ 1 ເພາະໄດ້ເປັນໃບໜ້າໃໝ່ ແລະ ສ້າງພາບພົດທີ່ດີໃຫ້ແກ່ໂຮງຮຽນ; ພ້ອມນີ້ກໍ່ເປັນການກະຕຸກຊຸກຍູ້ ປູກຈິດສຳນຶກໃຫ້ນ້ອງນັກຮຽນໃນໂຮງຮຽນກໍ່ຄືໂຮງຮຽນແຫ່ງອື່ນໆ ໃຫ້ມີຄວາມກະຕືລືລົ້ນຢາກຮຽນ ເພື່ອສ້າງຊື່ສຽງໃຫ້ແກ່ຕົນເອງ, ຄອບຄົວ, ໂຮງຮຽນ, ແຂວງ ແລະ ປະເທດຊາດ.
ສ່ວນຄວາມຫວັງໃນການເຂົ້າແຂ່ງຂັນທີ່ນະຄອນຫຼວງຮ່າໂນ້ຍນັ້ນ ນາງ ສຸກພະໄທກ່າວວ່າ: ມີຄວາມຫວັງຢາກຕິດ 1 ໃນ 3 ແຕ່ບໍ່ຮູ້ວ່າຄວາມສາມາດຂອງເຮົາຊິເຮັດໄດ້ ຫຼື ບໍ່; ແຕ່ເຖິງຢ່າງໃດກໍ່ຕາມ ນ້ອງກໍ່ຈະພະຍາຍາມເຮັດໃຫ້ສຸດຄວາມສາມາດ ແລະ ດີທີ່ສຸດ.
ຂ່າວ-ພາບ: ສຸລິນ ໜັງສືພິມຈຳປາໃໝ່
