ສຳນັກຂ່າວຕ່າງປະເທດ ລາຍງານໃນວັນທີ 2 ມັງກອນຜ່ານມານີ້ວ່າ ສາຍການບິນຊິຕີລິ້ງ ຊຶ່ງເປັນສາຍການບິນລາຄາປະຢັດ ຢູ່ປະເທດອິນໂດເນເຊຍ ໄດ້ຖະແຫລງປົດ ທ່ານ ເຕກັດ ປູນາ ອາຍຸ 32 ປີ ອອກຈາກຕຳແໜ່ງນັກບິນຂອງບໍລິສັດ ຫລັງຈາກທີ່ກວດສອບຄລິບວີດີໂອຈາກກ້ອງວົງຈອນປິດພົບວ່າ ຜູ້ກ່ຽວມີອາການຄ້າຍຄືເມົາເຫລົ້າ ຫລື ຢາເສບຕິດ ໃນຂະນະເຂົ້າຮັບການກວດຄົ້ນຮ່າງກາຍ ແລະ ກະເປົາເຄື່ອງ ທີ່ຈຸດສະແກນຂອງສະໜາມບິນ, ຈາກນັ້ນ ຜູ້ກ່ຽວຍັງເຂົ້າສູ່ຫ້ອງນັກບິນຫລ້າຊ້າກວ່າກຳນົດ ແລະ ໄດ້ປະກາດຜ່ານໄມໂຄໂຟນ ດ້ວຍນ້ຳສຽງຂອງຄົນຢູ່ໃນອາການເມົາເຫລົ້າຢ່າງຊັດເຈນ ສົ່ງຜົນເຮັດໃຫ້ຜູ້ໂດຍສານຂອງຖ້ຽວບິນດັ່ງກ່າວຈຳນວນຫລາຍ ພາກັນລົງຈາກເຮືອບິນ ແລະ ຂໍຍົກເລີກການເດີນທາງ.
ທັງນີ້ ເຖິງແມ່ນສາຍການບິນດັ່ງກ່າວ ຈະແກ້ໄຂບັນຫາສະເພາະໜ້າ ດ້ວຍການປ່ຽນທີມນັກບິນໃໝ່ ແຕ່ກໍບໍ່ສາມາດສ້າງຄວາມເຊື່ອໝັ້ນກັບຄືນມາຈາກຜູ້ໂດຍສານໄດ້ ຈຶ່ງເຮັດໃຫ້ຜູ້ບໍລິຫານຂອງສາຍການບິນ ຈຳນວນ 2 ຄົນ ຕ້ອງລາອອກຈາກຕຳແໜ່ງ ເພື່ອຮັບຜິດຊອບກັບເຫດການທີ່ເກີດຂຶ້ນ.
ຕິດຕາມເຮົາທາງFacebook ກົດຖືກໃຈເລີຍ!