ໃນວັນທີ 30 ທັນວາ 2016 ຜ່ານມານີ້ ການຝຶກອົບຮົມ ວຽກງານວິຊາສະເພາະ ຂອງລະບົບວົງຈອນປິດ ໄດ້ສຳເລັດລົງ ເຊິ່ງໄດ້ດໍາເນີນມາເປັນເວລາ 10 ວັນ, ພາຍໃຕ້ການເປັນປະທານ ຂອງທ່ານ ພົຈວ ຫອງເຫລັກ ມັງໜໍ່ເມກ ຫົວໜ້າກົມໃຫຍ່ຕໍາຫລວດ ໃຫ້ກຽດເຂົ້າຮ່ວມ ມີທ່ານ ພົຕ ສິນທະວົງ ໄຊຍະກອນ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຫົວໜ້າກົມ, ຮອງກົມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໃນຄັ້ງນີ້, ເປັນການຍົກລະດັບຄວາມຮູ້, ຄວາມສາມາດ ໃຫ້ແກ່ບັນດາຜູ້ເຂົ້າຮ່ວມ ຝຶກອົບຮົມໄດ້ຮຽນຮູ້ ຄວາມຮູ້ພື້ນຖານດ້ານລະບົບວົງຈອນປິດ, ໃນການບໍາລຸງຮັກສາ, ການຄຸ້ມຄອງ ນຳໃຊ້ວັດຖຸອຸປະກອນ ເຕັກນິກ ໃຫ້ມີຄວາມຮັບປະກັນ ແລະມີປະສິດທິຜົນສູງສຸດ.
ໃນພິທີດັ່ງກ່າວ, ທ່ານ ພົຕ ສິນທະວົງ ໄຊຍະກອນ ໄດ້ສະແດງຄວາມຊົມເຊີຍ ຕໍ່ຄະນະຮັບ ຜິດຊອບຊຸດອົບຮົມ ກໍຄື ຄະນະກົມໃຫຍ່ຕຳຫລວດ ພ້ອມດ້ວຍຄູ-ອາຈານ ທີ່ໄດ້ເອົາໃຈໃສ່ສິດສອນ ແລະ ສາມາດຍົກລະດັບຄວາມຮູ້ພື້ນຖານ ດ້ານໄອທີ, ເຕັກນິກວິຊາສະເພາະ ໃຫ້ແກ່ຜູ້ມາເຂົ້າຮ່ວມອົບຮົມເປັນຢ່າງດີ. ພ້ອມນັ້ນ, ທ່ານ ໄດ້ໃຫ້ທິດຊີ້ນຳ ຕໍ່ພະນັກງານ ແລະສໍາມະນາກອນ ທີ່ສຳເລັດການອົບຮົມ ໃນຄັ້ງນີ້ ໂດຍເນັ້ນເຖິງບົດບາດຄວາມສຳຄັນ ແລະ ຄວາມຮຽກຮ້ອງຕ້ອງການ ທາງດ້ານວຽກງານປ້ອງກັນຊາດ, ປ້ອງກັນຄວາມສະຫງົບ ໂດຍສະເພາະການຮ່ວມມືສາກົນ ໃນໄລຍະໃໝ່ ເຊິ່ງແມ່ນໄລຍະທີ່ກຳລັງປະຕິບັດມະຕິ IX ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VII ໂດຍເລັ່ງໃສ່ການປະຕິບັດ ບຸກທະລຸ 4 ດ້ານ ທີ່ພັກ ໄດ້ວາງອອກໃນກອງປະຊຸມໃຫຍ່ຄັ້ງທີ IX ຂອງພັກ. ພ້ອມທັງກ່າວວ່າ: ຄວາມຮູ້ພື້ນຖານທີ່ໄດ້ຮັບ ໃນເທື່ອນີ້ ຈະຊ່ວຍໃຫ້ຜູ້ເຂົ້າຮ່ວມອົບຮົມ ສາມາດນຳ ໃຊ້ເຂົ້າ ໃນວຽກງານຕົວຈິງຂອງຕົນ ແລະ ເປັນພື້ນຖານເພື່ອສືບຕໍ່ຄົ້ນຄ້ວາຮ່ຳຮຽນ ໃນຂັ້ນຕໍ່ໄປ
ຂ່າວ: ສຳນັກຂ່າວສານປະເທດລາວ