ເພຈໂຮງຫມໍເມືອງດາກຈຶງ ລາບງານໃຫ້ຮູ້ວ່າ ເມື່ອວັນທີ 30 ທັນວາ 2016 ທາງໂຮງຫມໍເມືອງດາກຈຶງ ແຂວງເຊກອງ ໄດ້ໃຫ້ທີມແພດໄປໃຫ້ຄວາມຊ່ວຍເຫລືອ ຍິງສາວ ຊົນເຜົ່າຕຣຽງ ທີ່ປະພຶດຜິດຮີດຂອງເຜົ່າ ຍ້ອນຖືພາກ່ອນແຕ່ງງານ ແລ້ວຖືກຊາວບ້ານໃຫ້ຫນີອອກໄປເກີດລູກຢູ່ປ່ານອກບ້ານພຽງລໍາພັງຜູ້ດຽວ. ລາຍງານກ່າວວ່າທີມແພດໄດ້ພາຜູ້ກ່ຽວ ພ້ອມລູກນ້ອຍເຂົ້າໄປຢູ່ເຮືອນຫລັງຫນຶ່ງ ໃນຕົວເມືອງດາກຈຶງ.
ກ່ອນຫນ້ານີ້ ຄືວັນທີ 29 ທັນວາ 2016 ເພຈໂຮງຫມໍເມືອງດາກຈຶງໄດ້ໂພສຮູບທີມແພດລົງໄປສັກຢາໃຫ້ເດັກນ້ອຍທີ່ຫາກໍເກີດຢູ່ຕູບນ້ອຍໆ ນອກບ້ານແຫ່ງຫນຶ່ງຂອງເມືອງດາກຈຶງ ເຊິ່ງເຮັດໃຫ້ເປັນຂ່າວດັງ ຜູ້ຄົນຕ່າງກໍເປັນຫ່ວງເປັນໃຍ ຈົນໃນທີ່ສຸດແມ່ລູກດັ່ງກ່າວກໍໄດ້ຮັບການຊ່ວຍເຫລືອ.
ຕ້ອງຂອບໃຂທີມແພດໂຮງຫມໍເມືອງດາກຈຶງ ແລະສື່ສັງຄົມອອນລາຍຄືເຟສບຸກທີ່ເຮັດໃຫ້ເກີດຄວາມມີມະນຸດສະທຳຂຶ້ນໃນຄັ້ງນີ້.
