ສຳນັກຂ່າວຕ່າງປະເທດ ລາຍງານໃນວັນທີ 15 ທັນວາຜ່ານມານີ້ວ່າ ເຈົ້າໜ້າທີ່ຣັດເຊຍ ແລະ ຊີຣີ ກຳລັງດຳເນີນການອົບພະຍົບກຸ່ມກະບົດ ທີ່ຍັງຫລົງເຫລືອຢູ່ໃນພື້ນທີ່ພາກຕາເວັນອອກຂອງ ເມືອງອະເລບໂປ ປະເທດຊີຣີ ຫລັງຈາກທີ່ກອງທັບຊີຣີ ເປີດບັ້ນຮົບປົດປ່ອຍເມືອງດັ່ງກ່າວ ແລະ ກຸ່ມກະບົດໄດ້ຍອມຈຳນົນ ດ້ວຍການຍອມຮັບຂໍ້ຕົກລົງຢຸດຍິງ ແລະ ອົບພະຍົບອອກຈາກເມືອງດັ່ງກ່າວ. ກະຊວງປ້ອງກັນປະເທດຣັດເຊຍ ໄດ້ຖະແຫລງວ່າ ກຸ່ມກະບົດ ຈະຖືກອົບພະຍົບໄປເມືອງອິດລິບ ທາງພາກຕາເວັນຕົກສຽງເໜືອ ດ້ວຍຂະບວນລົດເມ 20 ຄັນ ແລະ ລົດໂຮງໝໍອີກ 10 ຄັນ.
ທັງນີ້ ການອົບພະຍົບອອກຈາກອະເລບໂປ ຂອງກຸ່ມກະບົດຕໍ່ຕ້ານລັດຖະບານຊີຣີຄັ້ງນີ້ ຖືເປັນໄຊຊະນະຄັ້ງປະຫວັດສາດຂອງ ປະທານາທິບໍດີ ບາຊາ ອັນ-ອັດຊາດ ແຫ່ງ ຊີຣີ ທີ່ຖືກກຸ່ມກະບົດດັ່ງກ່າວລຸກຮືຂຶ້ນຕໍ່ຕ້ານ ຫວັງໂຄ່ນລົ້ມອຳນາດຂອງທ່ານ ຕັ້ງແຕ່ເດືອນມີນາປີ 2011 ຜ່ານມາ.
ຕິດຕາມເຮົາທາງFacebook ກົດຖືກໃຈເລີຍ!