ສຳນັກຂ່າວຕ່າງປະເທດ ລາຍງານໃນວັນທີ 14 ທັນວານີ້ວ່າ ຄະນະຜູ້ແທນ 3 ຝ່າຍ ໄດ້ແກ່ຝ່າຍກະບົດຕໍ່ຕ້ານລັດຖະບານຊີຣີ, ຣັດເຊຍ ແລະ ຕວກກີ ໄດ້ອອກມາຢືນຢັນຢ່າງເປັນທາງການ ໃນມື້ວານນີ້ (13 ທັນວາ) ກ່ຽວກັບການບັນລຸຂໍ້ຕົກລົງຢຸດຍິງ ແລະ ອົບພະຍົບປະຊາຊົນ ອອກຈາກເມືອງອະເລບໂປ ພາຍຫລັງທີ່ກອງທັບຊີຣີ ພາຍໃຕ້ການສະໜັບສະໜູນຂອງຣັດເຊຍ ແລະ ພັນທະມິດ ໄດ້ເປີດສາກບຸກໂຈມຕີ ເພື່ອປົດປ່ອຍເມືອງດັ່ງກ່າວ ຢ່າງໜັກໜ່ວງຕະຫລອດຫລາຍວັນທີ່ຜ່ານມາ ສົ່ງຜົນເຮັດໃຫ້ພົນລະເຮືອນຊາວຊີຣີ ແລະ ນັກຮົບຝ່າຍກະບົດ ໄດ້ທະຍອຍກັນເດີນທາງ ອອກຈາກເມືອງອະເລບໂປ ໃນມື້ນີ້ (14 ທັນວາ) ຊຶ່ງເປັນການປິດສາກການສູ້ຮົບກັນ ພາຍໃນເມືອງດັ່ງກ່າວນີ້ຢ່າງສິ້ນເຊີງ.
ການບັນລຸຂໍ້ຕົກລົງຢຸດຍິງຢູ່ເມືອງອະເລບໂປ ພາຍໃຕ້ຂໍ້ຕົກລົງ 3 ຝ່າຍ ດັ່ງກ່າວນີ້ ຖືເປັນໄຊຊະນະຄັ້ງຍິ່ງໃຫຍ່ ສຳລັບກອງທັບ ແລະ ລັດຖະບານຊີຣີ ພາຍໃຕ້ການນຳຂອງ ທ່ານ ບາຊາ ອັນ-ອັດຊາດ ຊຶ່ງຖືກກຸ່ມກະບົດຕໍ່ຕ້ານລັດຖະບານ ລຸກຮືຂຶ້ນຫວັງໂຄ່ນລົ້ມອຳນາດຂອງ ທ່ານ ອັດຊາດ ທີ່ຍາວນານມາກວ່າ 5 ປີ ນັບຕັ້ງແຕ່ປີ 2011 ເປັນຕົ້ນມາ.
ຕິດຕາມເຮົາທາງFacebook ກົດຖືກໃຈເລີຍ!