ສຳນັກຂ່າວຕ່າງປະເທດ ລາຍງານໃນວັນທີ 13 ທັນວານີ້ວ່າ ທ່ານ ເຊີເກ ລາບຣອບ ລັດຖະມົນຕີກະຊວງການຕ່າງປະເທດຣັດເຊຍ ໄດ້ອອກມາເປີດເຜີຍວ່າ ການເຈລະຈາລະຫວ່າງຣັດເຊຍ ແລະ ສະຫະລັດອາເມຣິກາ ກ່ຽວກັບການປະທະກັນຢູ່ຊີຣີ ໄດ້ກ້າວເຂົ້າສູ່ສະພາບບໍ່ມີທາງອອກ ພ້ອມທັງລະບຸອີກວ່າ ການບຸກໂຈມຕີຂອງກຸ່ມກໍ່ການຮ້າຍລັດອິດສະລາມ ຫລື ໄອເອັສ ຢູ່ເມືອງພັນໄມຣາ ອາດແມ່ນມາດຕະການຂອງອາເມຣິິກາ ແລະ ບັນດາພັນທະມິດໃນພາກພື້ນຈັດຕັ້ງຂຶ້ນ ເພື່ອເປັນກົນອຸບາຍແນໃສ່ແກ່ຍາວເວລາ ໃຫ້ແກ່ບັນດາກຸ່ມກະບົດຕໍ່ຕ້ານລັດຖະບານຊີຣີ ຢູ່ເມືອງອະເລບໂປ ທີ່ກຳລັງຖືກໂຈມຕີຢ່າງໜັກໜ່ວງ ໂດຍກອງກຳລັງຂອງລັດຖະບານຊີຣີ ພັນທະມິດ.
ທ່ານ ລາບຣອບ ຍັງໄດ້ກ່າວອີກວ່າ ຣັດເຊຍ ພ້ອມແລ້ວທີ່ຈະຈັດຕັ້ງການເຈລະຈາກັບອາເມຣິິກາ ກ່ຽວກັບການເປີດຊ່ອງທາງໃຫ້ບັນດາກຸ່ມກະບົດ ຖອນກຳລັງອອກຈາກເມືອງອະເລບໂປ ຢ່າງວ່ອງໄວ, ແຕ່ບັນຫາດັ່ງກ່າວນີ້ ຈຳເປັນຕ້ອງໄດ້ຮັບການເຫັນດີເປັນເອກະພາບ ຈາກທັງສອງຝ່າຍ ກ່ອນທີ່ຈະມີການເຊັນຂໍ້ຕົກລົງຢຸດຍິງ.
ຕິດຕາມເຮົາທາງFacebook ກົດຖືກໃຈເລີຍ!